《愛在。貴族學園》: 特別篇 5 ~ 萬聖學園祭 Part 2

特別篇 5  ~ 萬聖學園祭 Part 2（連載日期：2025/10/31）

之後幾日，陸陸續續都有同學交上唔少建議，而班會佢地自己内部都討論過，到底應該要用邊啲建議，所以最後喺星期五放學之後，全班5A都留喺班房度討論。

建龍一開始都好多謝大家嘅意見「不過我就發現，有好幾位同學都同我講，我地應該用Halloween做主題…」

建龍一講出呢句嘅時候，大家都即刻好驚訝「而且重點都係，我地可以嘗試做鬼屋，如果挑戰成功就派糖之類。或者呢個係大家嘅共識？」

就喺大家再議論紛紛嘅時候，坐喺自己位嘅韻喬同天殷，聽到用萬聖節鬼屋做學園祭嘅題目，天殷都即刻話「萬聖節鬼屋都應該幾好吧喬喬？而且依家出面主題公園都開始有Halloween玩啦，附近海洋公園都好似有鬼屋玩？」





平時屬於認真魔人，兼好少去主題樂園嘅韻喬就即刻話「聽講就話有啦，但係我都冇玩過啦，而且啲飛都唔平喎，如果全部鬼屋都玩嘅話…」

韻喬講完之後，天殷都認同學霸喬嘅觀點「都係嘅，之前去嘅時候都排好多人，最後都係玩唔哂，不過我都可以畀啲相你睇下嘅喬喬！」

「都好喎！橫掂自己冇份去就睇下人地嘅！」之後天殷就喺電話裏面，打開自己往年去海洋公園玩Halloween嘅相，然後就同韻喬介紹。

睇完之後，韻喬心裏面都好羡慕天殷可以玩得咁開心，而令到自己都有少少心動，天殷今次反而睇得穿韻喬喺度諗咩「做咩啊喬喬？見你睇相都睇到心心眼咁嘅？很想要吧？」

「你就唔好隊我出嚟啦殷殷…」韻喬好難為情咁講「見你玩得咁開心，搞到我都真係心動。不過…」





「不過咩啊喬喬？」天殷之所以咁問，都係因為韻喬塊面突然間變黑咗。

「（點解你會同個花心flirt女王一齊去Halloween咖？！）」韻喬原來係因為見到天殷同俊軒去海洋公園玩Halloween嘅相而感到不滿，所以嘟住嘴而且好細聲咁問天殷到底係咩一回事。

天殷於是就同韻喬解釋話「嗰陣軒仔姐姐邀請埋我吖嘛，咁人地姐姐都邀請到我，我都好難推咖啵喬喬…」

「咁，又好似有你嘅道理嘅！始終嗰個都係人地家姐邀請你，你地又關係密切，你都好難唔去。」韻喬嘅脾氣都稍為降低咗…「不過殷殷你覺得真係搞Halloween主題機會幾大吖啦？」

天殷諗一諗就話「機會都幾大下，你見我地大家都咁高興喺度傾，就已經知道大家都想做呢個主題啦！」天殷之所以會咁講，都係因為呢個方案真係有好多同學認真討論。





天殷見到韻喬個樣就即刻話「如果真係搞Halloween嘅話，不如我同你…」

「同張韻喬做咩啊？殷殷！」韻喬一聽到呢把聲，就即刻想行開話「呃，我都係唔阻住你地啦！再見！」

「我同喬喬之間嘅嘢唔關你事啊林俊軒！」天殷為咗保護好姐妹，就唯有暫時犧牲一下自己同俊軒作為世交嘅關係；但就算天殷咁講都好，韻喬塊面都仲係好黑。當然，俊軒見到之後都好無奈。

結果去到最後，大家都大比數贊成去搞萬聖節鬼屋做學園祭，同時班會都開始做計劃書畀學校，喺交到Ms張手上之前，大家都好畀心機去做資料收集，甚至大家都幫班會去做計劃書，呢種團結自然得到Ms張嘅歡心。

同一時間，大家都為咗等5A可以贏到比賽，於是全班都願意自費，去參加兩大主題樂園嘅萬聖節活動。

不過因為係班嘅活動，所以韻喬都變咗要同埋俊軒一齊去。

然而，天殷就主動話要陪韻喬，所以就擺低俊軒，叫俊軒同禮謙自己去玩。

喺海洋公園裏面，大家都有畀錢玩鬼屋，唔少5A嘅同學都被鬼屋裏面啲「鬼」嚇到尖叫連連，甚至有女同學因此嚇到喊而挑戰鬼屋失敗，要由其他男同學幫手扶返出去。但大家都玩得好高興，甚至有同學仲想話私底下去玩多次。





之後嘅另一個周末，5A全班就去參加迪士尼嘅萬聖節活動，除咗萬聖節限定活動之外，平時嘅機動遊戲佢地都有玩，就連韻喬都玩幾次過山車；但相對於海洋公園着重嘅鬼屋互動，迪士尼就偏重喺反派角色見面同表演互動，呢方面就同學們比較喜歡海洋公園嘅活動，而迪士尼可取嘅地方，就係角色嘅還原度，以及服裝嘅設計都比海洋公園好。

所以到最後，喺得到學校同意嘅計劃書之下，佢地設計咗一個關於迪士尼反派角色嘅鬼屋，同時都開始做準備材料同服裝嘅工作。

雖然佢地都只係一班中學生，但係喺設計以及預備嘅時候，都顯得有板有眼，不過學校都唔容許家長有太多參與，目的都係想同學喺參與學園祭嘅過程中，學到自己解決問題，以及培養團隊合作嘅重要性。

除咗有道具、服裝之外，韻喬、天殷、俊軒、禮謙等幾位有讀表演藝術科嘅同學，自然就成為扮鬼嚇人嘅不二人選，為咗可以等自己扮得更加似，佢地喺放學之後，都不停去睇相關嘅作品熟習角色…

「點啊，李天殷？到底你管唔管得掂你兩個巴渣女咖？」當韻喬喺李家大宅裏面，同天殷一齊睇緊某一套卡通電影，學緊點樣去做呢個角色。

天殷一如平日唔怕事嘅口吻答韻喬話「簡單啦喬喬，都係叫佢地靜下、派下糖咋嘛！」

「哈！你就真係以為咁簡單啊！你又要嚇人，又要主持通關遊戲，又要派糖！你做地唔好的話我呢個萬惡之后唔會放過你啊！」雖然韻喬一本正經，但係聽到韻喬咁嘅語氣，天殷就即刻破防笑唔到「哈哈哈哈！笑死我啦！」





「你笑咩啊李天殷！」韻喬即刻鼓起泡鰓表達不滿，但天殷都繼續笑話「你真係啊張韻喬，明明你當初話唔要聽軒仔意思做女魔頭，但依家你自己又咁上心個角色！唔通喬喬你…」

「冇呀！」韻喬講嘅時候塊面已經好紅，完全唔係黑魔后白中帶綠嘅面色一樣「我先…先唔係你諗嗰樣啊！你快啲投入角色然後換衫啊！」搞完一大輪，天殷都終於試到衫，整體效果韻喬同天殷都覺得非常滿意。

當然，韻喬都有試着自己套服飾，天殷見到之後就更加滿意，但用一個似係揶揄嘅語氣同韻喬講「果然學校嘅平民女神真係名不虛傳，着咩都咁靚咁好睇嘅！真係好離譜啊！」

韻喬即可刻色上身話「Well Well，因為都有名你叫，我係女神，而且我好歹都係萬惡之后，點會唔好睇！」天殷見到韻喬咁入戲都即刻破防大笑「喬喬你真係咁快入到戲嘅！」

但此時韻喬塊面都已經好紅，好怕醜咁話「殷殷你唔好笑我啦！而且套衫都好顯身材下！有啲怕醜！」

「你唔怕啦喬喬！我都知道你一定keep到嘅！」「希望啦！」兩個女仔之後都係繼續睇片。

至於另一方面嘅男子組，俊軒同禮謙除咗要顧好自己角色之外，佢地仲要幫手處理埋set場嘅道具。

不過既然俊軒同禮謙同時都要負責扮演角色嚇人，所以佢地兩個喺呢方面嘅workload都比較少，甚至俊軒都仲有時間畀林太逼去相睇party，結果就係…俊軒搵咗韻喬過橋，最後俊軒都慢慢開始同韻喬重新熟絡。





去到學園祭之前一個星期，大家喺兼顧學業之時，同時都要繼續學園祭間鬼屋嘅準備工作，放學之後大家都繼續留喺班房開會，基本上都會同建龍呢個班會主席同埋Ms張匯報進度。

Ms張有時候放學開完會之後，都會到班房探下大家。

但係因為有部分相對大型嘅裝飾，大家都因為怕畀隔離班見到，所以就將佢地放喺另一個同學屋企個大倉度，然後先慢慢送去學校。

當然，就算保密功夫做得幾好都好，Secret之上點都會有人透露下，而正正都因為咁，建龍就更加覺得自己嘅決定係正確嘅。

不過...

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer