《愛在。貴族學園》: Ch 35 ~ 陸運會之四 Part 4

Ch 35 ~ 陸運會之四 Part 4（連載日期：2026/07/04）

不過好可惜，最後衝過終點嘅時候，韻喬畀一個師姐過頭，以第二名完成呢個200米比賽。
 
就喺呢個時候，韻喬被迎來一個擁抱，基本上一下就認得出係俊軒抱住自己，於是就扭計話「唉呀小軒啊！頭先最後一刻先畀人過咗頭，真係唔抵啊！」

「唔緊要啦喬喬，跑到第二你已經好叻咖啦，只不過你真係差少少運氣啫，我諗複賽你都一定會過到咖！」俊軒繼續安慰韻喬咁講。
 
「係囉，頭先見到小喬你可以帶頭，真係有少少型喎！我自己都做唔到！」喺附近嘅禮謙，見到韻喬同俊軒之後都走過嚟。





就講講下嘅時候，就連天殷都喺看台上面跑咗落嚟「係喎，之前練習嘅時候，謙謙同喬喬好似冇一齊跑過200米。唔知兩個一起比賽嘅話，邊個會贏呢？」
 
「我all in小喬！兄弟呢個我真係冇辦法，因為佢係我未婚妻嚟，文武雙全，一定要支持啦！」俊軒第一個出聲。

不過韻喬隨即一拳打落去俊軒個肚度，紅都面哂咁話「喂！咩…..咩咩未婚妻啊你？！我幾時應承過話一定要嫁畀你咖？而且，我點知第日你會唔會喺出面收埋其他女人咖！」

禮謙同天殷聽到之後都哈哈大笑「嘿嘿嘿，小軒，呢世就好好畀喬喬小姐好好咁關愛啦。」天殷嘲笑俊軒道「不過呢，如果講到賽跑嘅話，我估到最後都可能會係謙謙跑得快過喬喬喎！」
 
禮謙聽到天殷認為，自己跑得快過韻喬之後眼都凸埋，而且自己塊面都有少少紅。「下，小喬唔係你嘅好姐妹咩？做咩唔支持好姐妹，反而調轉槍頭走嚟支持我呀天殷你？」
 




「咁始終謙謙你都係個男仔嘛！男仔力氣大過女仔，跑得快過喬喬都好正常啦，唔係咩？」天殷就替自己嘅選擇做出解釋

「但係唔緊要啦，反正要比嘅，隨時都可以再去比嘅啫，大不了之後搵日落嚟跑！而且我都唔一定會慢過禮謙！」韻喬下戰書道。
 
「隨時歡迎挑戰。話說，小軒你個800米幾時跑？」

「我估跑埋400米之後就會到我，應該唔會太耐，我都係去拉一拉定筋好啦！禮謙你想陪我定想休息一下？」禮謙話ok，於是俊軒一行人就走去運動場看臺後面嘅空地幫手拉筋。
 
而喺俊軒拉筋嘅時候，天殷突然之間拉咗韻喬去一邊，搞到韻喬都有少少愕然...





「殷殷，你有緊要嘢想同我講？做咩要突然之間拉我埋一邊？」不過呢個時候天殷塊面已經紅哂。

「喬喬呀，唔知你……你有冇……發現，自從你同小軒一齊咗之後，禮謙佢……對我嘅態度好似…….好奇怪咁？」天殷吞吞吐吐咁講。
 
「哦，原來你係想同我講呢件事，唔怪得你要拉埋我一邊先講啦！嘿嘿嘿！」韻喬一邊飲嘢補充水分一邊寸下天殷咁「不過，其實喺今朝開跑之前，我都有問過禮謙類似嘅問題。」
 
天殷聽到韻喬呢句之後大吃一驚，因為天殷完全冇諗過呢樣嘢，應該話，估唔到韻喬會咁大膽咁做...

「喬喬你……你講真咖！？你竟然會問呢啲嘢？！咁你今朝問咗佢啲咩嚟呀？」

韻喬於是就點點頭，然後就話…

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer