《愛在。貴族學園》: Ch 35 ~ 陸運會之四 Part 5

Ch 35 ~ 陸運會之四 Part 5（連載日期：2026/07/12）

「喬喬你……你講真咖！？你竟然會問呢啲嘢？！咁你今朝問咗佢啲咩嚟呀？」

韻喬於是就點點頭，然後就話「其實我都好直接咁問佢，到底你對殷殷嘅感覺係點……」韻喬好冷靜咁講返頭先嘅事「因為其實我都注意到，呢幾日禮謙係對你好奇怪，所以我先自己問咋，但原來你都想知道答案咖！我地真係心有靈犀啦哈哈殷殷！」
 
「咩喎張韻喬！咁我都知道你一直都好明白我嘅，不過重點……謙謙佢…..點樣答你呀？」天殷非常怕醜咁一臉期待答案。

「其實呢，禮謙就同我講話對你冇咩意思，都係話嗰包奶都係因為咁啱買多咗，所以先請你飲咋喎。但係……」韻喬於是繼續講。





「但係你覺得禮謙講大話？」天殷反問道。
 
「我就覺得係啦，畢竟佢喺答我嘅時候，眼神好閃縮不特止，仲走去話咩你其實條件都好好，但唔知點解又唔見你有拍拖，甚至喺學校同男同學傳緋聞嘅事…」韻喬回答道。
 
「所以你覺得其實禮謙可能……對我有意思？」天殷非常疑惑咁講。

「到底係咪鍾意你呢，我就覺得似係啦，但我就唔係太肯定嘅。不過，我可以肯定嘅就係，禮謙已經有鍾意嘅人…….」韻喬說道「所以，如果有一日，禮謙真係同你表白嘅話，你會諗住點做？」
 
天殷呢個時候嘅表情又有少少奇怪，但為免畀韻喬睇穿，於是就話...





「其實我都冇諗得太多啊。不過，如果謙謙真係要同自己心愛嘅女仔表白嘅話，身為好朋友嘅我，點都會支持同埋祝福佢嘅！」
 
「如果真係咁就好啦！」韻喬道「不過話說小軒應該拉完筋啦啵，我地都係返去睇下兩個喺度搞咩鬼先！至於禮謙，我都再試下套佢口風先，睇下到底佢鍾意邊個哈哈哈！」之後天殷就同韻喬一齊返去搵俊軒同禮謙。
 
「點啊小軒，你拉完筋未啊？」韻喬問道「我差唔多啦喬喬，而且今日狀態我都好fit！呢個800米我一定要贏到金牌返嚟！」俊軒胸有成竹咁講。

「但係如果你拎唔到金牌咁點先？嘿嘿嘿！」天殷一邊奸笑一邊講。

「啊李小姐，你真係掃興咖喎！我尋日1500米都係因為輸畀嗰少少運氣咋嘛！你估我真係冇資格攞金牌啦喎！？」俊軒即刻幫自己辯護。
 




「如果俊軒拎唔到，咪用我個200米去代替囉殷殷！」禮謙此時突然插嘴道，而呢句就係對住天殷講，搞到天殷都好唔好意思。
 
「下，但係800米賽跑塊獎牌，可能小軒就係用嚟送畀喬喬咖喎！如……如果用你咗塊牌去代替嘅話，個意思咪已經完全唔同咗囉？！」天殷好緊張咁講出呢句。
 
「呃…唔使咁緊張喎殷殷，我一定會盡力拎到金牌嘅，放心，包喺我身上啦！」俊軒拍心口道。

「如果唔得咁點先？」韻喬此時好質疑咁講「你最好唔好亂咁應承人嘢啵！因住型道盡頭便是柒啊傻仔！」
 
「你同我定啦張韻喬！我一定唔會畀立flag呢件事發生喺我身上嘅！咦，我夠鐘要去召集啦，等我跑完之後先再見啦！」俊軒聽到司令臺嘅召集廣播之後，就自己走去報到區，而其他三個人就走去核對自己有冇晉級。

不過，幸好得到上天眷顧，頭先跑第四嘅禮謙都可以入到決賽。至於韻喬，都非常順利進入200米複賽。
 
「嘩！我真係好彩，跑到咁都晉到級！」禮謙摸一下自己心口咁講。

「我知你一定得嘅！雖然頭先我都見到競爭好激烈。」韻喬搭住禮謙膊頭道。





「既然都入到決賽，就一定要加油啦，預祝你可以拎到牌先！」天殷都勉勵禮謙。
 
之後三個人又走去小食部，諗住買食物，點知小食部喺太早時間未有特別食物可以食，得三文治之類嘅早餐食物「想食其他野就晏啲過嚟啦！」小食部阿姨道，於是三個人就行返出去，而俊軒呢個時候仍然等緊比賽。
 
不過好快...

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer