《愛在。貴族學園》: Ch 37 ~ 陸運會之六 Part 4

Ch 37 ~ 陸運會之六 Part 4（連載日期：2026/10/25）

「我地知道啦，俊軒師兄，prefect姐姐，真係好對唔住。」男同學低頭道。

「嗯……我都會好好保護自己嘅身體。俊軒師兄，你同韻喬師姐都一定要幸福啊！」女同學好衷心同俊軒講。
 
「乖啦！我同韻喬師姐多謝你地兩個先！」俊軒對呢兩位同學講。不過，雪盈突然之間對一下手表，再向俊軒打個眼色，用嚟提示俊軒。

俊軒好快都get到雪盈嘅意思，於是就問兩個師弟妹「話說，韻喬師姐就快會有100米嘅比賽，我都準備去捧女朋友場，你地同唔同我地一齊去睇師姐啊？」





「乜我地……可以咩？」女同學道。

「點解唔可以呀？我都準備去睇小喬嘅比賽喎，而且都係睇個比賽姐，大家都係同學嚟，冇咩嘅！係就行啦咁！唔係就miss咗比賽咖啦！」雪盈知道時間無多，於是就直接叫埋兩個同學去。
 
好快佢地四個人就走到運動場前方，但呢個時候3000米長跑嘅比賽依然繼續緊。所以俊軒就望向報到區，同上面嘅韻喬、天殷同禮謙揮手。而韻喬佢地見到俊軒同雪盈之後都有揮手。

不過，當個form 2嘅男同學，第一次見到韻喬之後，就同俊軒講...

「俊軒師兄，你就好啦，可以有一個咁靚嘅、讀書又好嘅女仔做你女朋友！」男同學投以羡慕嘅眼光望向報到區看台上嘅韻喬。
 




而身邊嘅女同學表情就變得有少少怪怪地「韻喬師姐係就係好靚，不過，你做咩望住人地韻喬師姐望到眼甘甘咁呀？衰人！哼！」

佢鼓起泡腮之後就即刻走咗去，搞到個男同學都要追落去「等埋我啊！」

雪盈同俊軒見到之後，都同對方苦笑一下，就好似覺得有兩個小朋友喺度學人拍拖咁...

「雖然最後都係冇交到人去訓導嗰度，不過都係算啦，當畀個機會，經過今次之後我諗佢地應該唔會再亂嚟啦吧！」

雪盈講完之後，俊軒同埋佢都向住其他三人用口型講咗句「加油！」，然後就一齊走咗去看台接近終點線嘅位置附近，等候三位好朋友衝線。
 




而喺報到取看台上面，韻喬當然都有見到頭先發生嘅事，但係就好好奇對偷情嘅陌生男女同學係咩人，於是就……

「禮謙啊，你知唔知頭先喺小軒隔離嗰兩個同學，係邊個嚟咖？」韻喬先問就坐喺自己正上方嘅禮謙。

不過「呃…我都唔係咁清楚喎小喬，嗰兩個同學我都未見過，應該唔係我地form嘅人啦，我自己感覺嗰兩個同學好似好細個咁。」禮謙聳聳膊頭道。

一旁嘅天殷都聽到兩個人嘅對話。而韻喬都有問過天殷，但天殷都表示唔清楚。
 
「都唔知林俊軒個衰人，趁我坐咗喺度又走咗去識啲咩人！」韻喬此時已經有少少不爽，但係在場嘅其他對手，喺聽到韻喬咁樣吐槽之後，就唔係太認同韻喬嘅諗法啦...

「哎呀張韻喬同學，你就唔好咁多疑啦，畢竟林俊軒同學都係一個靚仔，有其他form嘅花癡會有反應都好正常啫…」一個Form 6同學道。

「Stepahine，你就講得冇錯啦，我自己就覺得，以林俊軒同學呢種背景，一定會有女同學主動走埋去嘅都見過咖。不過，林俊軒同學或者女同學自己，會唔會繼續交流落去，就係另一回事咋嘛！」另一個Form 6師姐道。

韻喬聽到之後都好無奈，而天殷都點頭同意班師姐嘅講法...





「係囉喬喬呀，其實你不如之後先再問返軒仔到底發生咩事先，會唔會好少少呀？而且頭先有雪盈喺度，我就覺得唔應該關軒仔事啦……」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer