《愛在。貴族學園》: 特別篇 5 ~ 萬聖學園祭 Part 3

特別篇 5  ~ 萬聖學園祭 Part 3（連載日期：2025/11/19）

不過，去到學園祭嘅前嘅星期四，正當大家都做最後準備嘅時候，偏偏韻喬就因為肺炎關係而請假，大家由天殷口中知道韻喬缺席嘅原因之後，除咗韻喬嘅健康得到大家關注之外，大家就喺到煩惱韻喬嘅角色應該由邊個代替。

建龍喺一邊幫手將裝飾裝到預定位置嘅時候，一邊喺度諗到底有邊個可以代替韻喬嘅位置。

於是佢set好其中一個鬼屋嘅機關之後就話「雪盈、殷殷，可唔可以出去走廊到傾兩句？」「哦，好啊！」

於是雪盈同天殷就跟建龍出去，然後就話「雪盈，你都知小喬佢因為肺炎入咗醫院啦！」





「呢個我都知，殷殷有講…」雪盈回答嘅時候有少少想寸建龍「但係殷殷，小喬個醫生有冇話小喬要留醫幾耐啊？」

「醫生冇講啊，但因為喬喬佢發高燒，而且都要吊鹽水，所以喺學園祭之前，喬喬都應該出唔切院。」天殷回答返雪盈嘅疑問同時，建龍心裏面都繼續盤算要點樣處理韻喬嘅問題。

其實經過整過中四嘅相處，再加上低年級嘅時候，建龍同雪盈都有同過班，所以雪盈其實心裏面都大約知道建龍嘅諗法「建龍你…其實係咪想我代替張韻喬個位？」

建龍好快就點頭承認「係，因為我自己覺得，韻喬同學個位因為係鬼屋最後一關，而且個角色原設係萬惡之后，當然要有人守住個大佬關卡！」

一個簡潔而有力嘅理由，就可以將雪盈呢個做喺門口負責接待嘅同學，一變而成第二位萬惡之后...





「原本我個位就等文曦幫手啦！最多都係文曦辛苦少少，我諗文曦應該可以掛？」雪盈問天殷同建龍。

天殷於是就話「都可以嘅，但係要問埋文曦意思，不如就依家講埋啦？」建龍同雪盈點點頭就同意，於是就喺班房裏面叫文曦出去，問下文曦意思...「你講呢個我可以啊雪盈！你就去替小喬個位啦！」

「多謝你啊文曦！」雪盈嘅眼神充滿感激，天殷跟住之後都話「我都係你地兩個就真。不過呢，小喬原本套costume都幾多配件下，而且着上身都要啲技巧喎，你要唔要試下套衫先啊？」

「下，小喬同學套衫點解會喺你度嘅殷殷？」文曦聽到之後覺得好奇怪，於是就問天殷，天殷就解釋話...

「咁係因為小喬話自己屋企地方太細，而且如果本來話星期六着住出去就好唔方便嘛，所以咪將套衫擺喺我屋企囉。」





「雪盈啊，不如你一陣間同我去我屋企，睇下套衫啱唔啱你？」天殷因為見唔係剩低好多時間畀雪盈準備，所以就即刻問雪盈有冇時間去李家大宅試衫。

雪盈好快就應承天殷，而且都通知家人稍後去李家大宅接自己返去。

放學之後，雪盈就跟咗天殷上車去李家大宅，去到之後，天殷就直接帶雪盈上自己間房「雪盈你坐喺個度等我一陣啊，我拎喬喬套衫出嚟先！」

「好啊！謝謝你啊殷殷！」天殷跟住就自己一個去衣帽間拎衫。

喺等天殷嘅短短一分鐘裏面，雪盈見到天殷房裏面有幾張相喺度，包括天殷分別同俊軒以及韻喬嘅合照。

當中俊軒同天殷喺細個時候嘅合照，感覺都比較親昵，令到雪盈都有一刻覺得，韻喬會唔會成為俊軒同天殷之間嘅第三者。

但就喺雪盈仲喺度作多餘嘅猜測嘅時候，天殷就已經將原本韻喬套衫，搬到雪盈眼前。

雪盈見到之後為之驚艷，同天殷講「嘩！原來小喬為個學園祭而搵到呢件咁還原嘅服啊？」





「係呀，雪盈！其實小喬為今次花好多心機去準備，不過好可惜啊，最後喬喬都因為病咗而參加唔到…」天殷講嘅時候都有少少唔開心「我都怕呢個會係喬喬一生嘅遺憾嚟。」

「但係，依家都由我去幫小喬完成呢件事，至少個遺憾都冇咁大呢？」雪盈即刻安慰一下天殷嘅情緒，然後天殷都話「好啦女班長，你試下條裙先啦！」於是天殷就幫雪盈換裙。

好快，喺天殷幫助之下，雪盈都終於着好原本屬於韻喬嘅服裝「嘩，難怪小喬堅持一定要做鬼屋最後一關啦！真係好型好grand啊！」

「當然啦，話到明係萬惡之后喎，當然係最grand啦！」天殷再幫雪盈帶好個頭飾之後就話「你依家試下扮下角色講嘢啦！」

「Well Well! What a glittering assemblage! 有冇好似呀殷殷？」雪盈就即刻角色上身咁，搞到天殷都讚不絕口「好還原啊你都做得！咁嗰日我地都應該冇大問題啦！」

「希望啦殷殷！而且我自己都要試下個妝先啊，但係依家都好似有啲夜咁！」雪盈對一對表之後就同天殷講。

天殷於是就話「嗯...都係嘅！不如你聽日先再試下個妝吧！快啲返去食飯休息啦你都！」「知道！咁聽日我下晝再上嚟？」雪盈先慢慢放地頭飾。





「可以啊！辛苦你啦！」「唔辛苦，都係為件事好啫！」天殷喺雪盈講完之後，就幫對方慢慢除返套衫換返校服，然後雪盈就離開李家大宅。

去到星期五，學校為咗等同學有時間準備學園祭所需要嘅裝飾，所以當日就係學校假期。

雖然如此，絕大部分同學都有返學校幫手，學園祭嘅氣氛都越來越濃厚。

當然，陳校長同其他老師，都有去學校唔同地方，睇下同學們籌備嘅進度如何。

喺返學校幫手之前，雪盈都再一次上去李家大宅，無非都係想試下化一次個妝，然後再試多次套衫...

「嘩，成個氣勢都已經喺度，聽日你一定得嘅！」天殷見到雪盈之後就咁講，而雪盈都即刻話「唔敢當，本來應該係屬於小喬嘅！」

然後天殷就影咗雪盈呢身造型，畀喺醫院嘅韻喬睇。韻喬收到之後好快就回應話雪盈着得更加好睇，相似同還原度比起自己更加高，但同時韻喬都表達返，自己未能夠參與呢屆學園祭嘅遺憾。

而雪盈都感覺到韻喬嘅唔開心，就唯有喺電話裏面同韻喬講「放心交畀我啦小喬，我一定會幫大家做好你個角色嘅！你就繼續好好咁養病啦，因為我地5A都等緊你返嚟啊！」





「知道啦！多謝你啊雪盈！」韻喬都嘗試打起精神去回答，然後天殷好快都收線。

喺試好個妝之後，雪盈都同天殷收拾好行裝，然後就將套衫、道具帶返學校，然後就幫手喺班房裏面set場。

當俊軒同禮謙見到天殷同雪盈有少少辛苦咁，各自將套衫帶返班房嘅時候，就即刻上前話「嘩，殷殷、雪盈，你地兩個要唔要幫手啊？」

「唔使啊林俊軒！同埋你唔好塞住條路，等我地放低啲服先！」於是俊軒就聽天殷講，讓出位置等天殷同雪盈都放低套服。

禮謙見到雪盈手上原本屬於韻喬套服嘅時候，就露出一個好驚恐嘅表情話「嘩雪盈！你套服咁靚嘅？不過好似好大件好重喎！」

喺身邊嘅天殷聽到之後，就即刻望實俊軒，然後就好寸咁話「你問下你自己個死黨啊林俊軒先生，之前去完迪士尼開會嘅時候，同大家講過啲咩先啦！」

「喂搞錯啊李天殷，你將個責任直接推落我度都有嘅？！」俊軒聽到天殷咁講之後，就非常不滿咁反駁。





天殷於是都駁多俊軒一次嘴話「咩啊！係你自己話要有呢個角色喎！」

「我都係講下咋喎！我點知小喬個傻女又真係會聽你講先得咖！？」一下子，天殷同俊軒兩個好朋友居然嘈起嚟。

喺旁邊嘅雪盈同其他同學，見到呢個情況，都即刻想隔開俊軒同天殷，不過禮謙就話「你地兩個玩還玩，都唔好傷到和氣啊！」

「放心，我地冇事！我地習慣咗咁樣！」俊軒同天殷居然同時講，搞到氣氛就更加尷尬。所以佢地最後咩都冇再講，只係繼續幫手佈置5A呢間“鬼屋”。

佢地結果一搞就搞到差唔多夜晚6點「啊我地終於都整好啦！」建龍將最後一塊板固定好喺位置之後，大家就隨即歡呼起嚟，因為都代表大家過去一段時間嘅辛勞，終於都要到準備收到回報嘅階段。

大家仲話要玩一次個鬼屋，睇下到底整個設計有冇問題，於是幾位要扮鬼嘅就即刻埋位，然後就做返預定嘅動作同反應。

喺俊軒同天殷，仲有韻喬佢地幾位嘅設計之下，一衆同學都突然之間畀鬼嚇到好緊張，甚至喺鬼未有上妝嘅狀態之下，大家都玩到有啲誇張。

至於依然留醫嘅韻喬，就透過天殷拍嘅片，去睇下大家醉心完成嘅傑作「又整得幾好喎你地！咁正得唔得咖？」

「點解唔得啊小喬？」呢句說話就係由雪盈講嘅，而天殷同俊軒見到韻喬笑得咁開心，就知道呢個認真魔人好滿意今次個效果。

韻喬於是再喺個電話裏面繼續話「雪盈都做得好似啊！睇嚟我嘅擔心都應該係多餘啦喎！」

雪盈即刻好怕醜咁話「我都係要做好自己本分，去代替你嘛！咁當然都要做到最好，先會對得住你對我嘅付托啦！」

「雖然我尋日都已經講過，但係我都好多謝全班嘅付出咖！」韻喬聽完之後都好感動，而同一時間建龍都路過，於是就同韻喬話...

「唔使多謝我地喎！反而係我多謝你同小軒佢地幾個陪我癲就真！」建龍一時冇意識到，唔可以喺韻喬面前提起俊軒。

但係韻喬依家都冇太大反應，只係喺度大笑「你多謝林俊軒個衰人得咖啦！因為係佢要我陪佢癲咋！」

俊軒聽到韻喬咁樣屈自己之後，完全冇任何機會反駁，而且俊軒都考慮到，如果自己再駁韻喬嘴的話，自己都難保去到醫院見韻喬嘅時候，韻喬唔會報復自己。而天殷就係知道俊軒喺度諗咩，於是就偷偷地喺度笑。

喺同建龍講完之後，韻喬都私底下再搵天殷，話因為當日都已經好晏，所以就叫佢地唔好再去醫院探病，反而都叫佢地休息下，順便都要再爭取時間，練習一下自己嘅角色喎。

等咗期待咗咁耐，終於都去到學園祭當日。5A全班為爭取時間做最後準備，同埋等有裝扮嘅同學化妝，於是都好早返到班房準備。普通同學嘅衫可能都比較簡單，最多都係加多個鬼面具就已經可以。

不過，要着全裝嘅幾隻鬼，就要花好多時間去上妝同換衫，而且因為佢地都要遷就鬼屋嘅設計，地方就更加淺窄。喺大家都化好妝、準備好嘅時候，大家都互相打氣同影第一轉嘅相。

之後部分5A嘅同學，就落去學校操場聽陳校長嘅說話，之後就正式開始學園祭。

當然，有份落去嘅同學除咗要宣傳之外，佢地都會自肥參加下其他班級嘅活動，好多學會都係搞唔同攤位，同大家玩下小遊戲。

正因為當日都係學校嘅開放日。所以除咗有學會擺檔吸引學生加入，同埋等家長可以感受到學校一直嘅多元文化，希望可以吸引到更多學生報讀，所以學校都會安排入學講座，同有興趣嘅學生家長講解。

至於5A佢地，因為佢地喺班房擺鬼屋嘅關係，所以就要更加派人落去操場上面派傳單，吸引啲人上去佢地度玩鬼屋。

但起初都係同一層其他班嘅人去玩，但玩下玩下一傳十、十傳百咁，好多學會同其他樓嘅人都走去5A度挑戰鬼屋。

而其實佢地玩法都好簡單，全部都係畀鬼嚇之後，就要喺10秒之内答問題，答到嘅話就會有一粒糖加晉級券，如果全部關卡都可以通過的話，去到終點5A就會有一份比較大嘅禮物，但如果中間有一關錯的話，後面就只有俾鬼嚇嘅部分。

而且5A佢地玩得鬼屋，自然都想睇下啲參加者有咩反應，所以佢地都set咗幾個閉路電視喺幾個位，一來可以控制遊戲嘅節奏同計分，另一方面都可以等佢地見到參加者被鬼嚇到傻嘅樣。

然而，因為私隱問題，所有參加者入去之前，5A嘅同學都會問大家，到底之後要唔要返張相，不過到最後大家都會想要即影即有相機影嘅相，多過自己喺鬼屋裏面嘅驚嚇照。

終於都去到午飯時間，鬼屋都暫時關閉，等幾個要扮鬼嘅同學，都可以有抖下嘅機會；而同一時間，天殷都打電話畀韻喬，等韻喬都同大家傾下計解悶「救命啊！小喬你套服真係好熱啊！」最重裝嘅雪盈同韻喬抱怨。

喺醫院度繼續溫習嘅韻喬於是就話「但係頭先聽文曦講，好多玩家都好鐘意你個角色喎！」

「咁都係你選角選得好啫小喬！」喺度食飯嘅文曦答返韻喬「不過聽講話個角色原本係俊軒揀嘅？」

「冇錯！係我揀嘅！」要扮演另一個惡人角色嘅俊軒，即刻喺大家面前邀功，結果當然就係換嚟韻喬嘅不滿與鄙視...

「哼！你做個角色咁簡單，就梗係可以講得咁輕鬆啦！你自己睇下我同雪盈，為咗滿足你搞到我地幾辛苦！」

俊軒跟住就即刻反駁話「車！如果你覺得複雜覺得煩嘅話，你當初可以反對咖！係你自己都認同要做呢個嘅！萬惡之后！」

「林俊軒你！！…激死我啦！你下次嚟探我病嘅時候你就知死！哼！」韻喬聽到之後就更加激動。

而因為天殷開住speaker嘅關係，所以大家都聽到呢段韻喬大戰俊軒嘅對話，自然大家都忍笑忍得好辛苦。最後都要天殷打圓場話「唉呀！你兩個唔好再喺度耍花槍啦！而且一早都決定要做，都冇得怨啦！」

雪盈聽到之後都話「我又唔係覺得辛苦啊，俊軒、韻喬！我反而覺得韻喬佢真係好有心機去幫我地搵服同道具就真！我地幾個應該多謝韻喬嘅付出就真啦！係咪呀大家？」「係！」

韻喬聽到雪盈咁樣吹捧自己就話「喂啊雪盈啊！你咪玩啦！」

「小喬，我都係講事實啫！」雪盈又繼續講落去「而且你同俊軒都有幫手搵題目，都難到唔少挑戰者咖哈哈！你估我地5A啲禮物咁容易拎啊！」

韻喬聽完之後就哈哈大笑話「哈！呢個梗係要啦！鬼叫我地5A含金量咁重啊？」「得啦！巴閉啦張韻喬！」俊軒又忍唔住笑韻喬，搞到韻喬下一句即刻話...

「林俊軒你係咪真係唔知個死字點寫啊？！係嘅話不如小妹再教你一次吖，好冇啊？」

俊軒聽到韻喬咁大殺氣之後，都唔夠膽再反駁韻喬，搞到天殷再一次用眼神恥笑身邊呢個世交，居然變到一個老婆奴咁。

之後佢地就繼續食飯，然後再準備繼續學園祭嘅活動，而韻喬就唯有繼續喺醫院休息。

學園祭除咗係向外展示創意與能力之外，同時都係喺校内得到獎勵嘅地方，因為喺學園祭舉行期間，學校會有評審不停巡視各個攤位同課室，就喺趣味、創意、管理能力等各方面進行評分，獲獎嘅班別同埋學會都會有豐厚嘅獎勵，甚至會喺畢業嘅學歷證明信裏面注明。

下午部分開始之後，5A班房外面一直有人排隊挑戰鬼屋，甚至連唔係做評審嘅老師，都願意為獎品排埋一份，甚至有任教5A嘅老師排隊嘅時候，5A嘅同學都即刻笑佢地。

轉眼就已經到差唔多結束嘅時候，5A都提早宣佈截龍，免得過鐘都仲有人喺外面排隊。

而喺最後一名參加者挑戰完鬼屋之後，大家都終於可以除下裝扮休息，而同一時間，大會嘅評審就開始計算分數。

終於都過咗大約一個鐘，大會就宣佈好快就有結果，所以大部分同學都即刻走到禮堂，因為大家都希望自己班或者學會可以贏到大獎。

至於喺落去之前，班主任Ms張都專程返去班房度，同自己嘅學生講……
 
「好啦各位同學，呢段時間為咗參加學園祭，都真係辛苦大家日日留喺學校幫手整嘢，又或者要去買材料之類，希望大家都畀個掌聲大家先！」班房裏面嘅同學隨即拍掌歡呼。

Ms張之後又話「今次大家嘅投入同埋認真，都係超乎我預期嘅，我可以睇得出，大家都真係想贏到今次嘅比賽……」
 
「所以為咗獎勵大家，無論我地班最後有冇獎都好啦，Ms張都決定請大家飲嘢。」此話一出，5A一眾同學就發出更加大嘅歡呼聲「多謝Ms張！」但Ms張見到之後就喺度笑「你地吖，使唔使咁快啊，我都未講完！」
 
大家聽到Ms張未講完之後，就即刻鴉雀無聲，靜待Ms張到底仲有咩想講...

「如果今次5A有獎的話，我就之後請大家食飯啦！」5A聽到之後，歡呼聲自然比頭先更加大。
 
Ms張之後又繼續話「但今次我都要多謝我地班會主席趙建龍同學，因為如果唔係當初佢堅持話要大搞學園祭嘅話，今日我地呢個班房都唔會咁有feel，相信今年嘅學園祭，都會係大家永生難忘嘅回憶，可能過多十年、二十年，你地出去食飯聚會嘅話，都會有機會拎返出嚟講…建龍要唔要同大家講兩句？」
 
建龍聽到Ms張多謝自己之後，都即刻起身同5A全班同學鞠躬表達謝意...

「多謝Ms張，其實太多嘅說話都未必需要講，因為我正如Ms張都講過，大家都係想做好今次學園祭，而且都係我地踏入DSE最忙、最大壓力之前，最後一個學園祭，大家都見到Form 6有啲班，做學園祭真係好hea，甚至有兩班直頭唔見人。」
 
「所以我自己都好多謝5A全班，今次為咗我自己呢個小小嘅願望而同我癲。但正如Ms張頭先所講，雖然呢個願望係好渺小，但今次呢個打造成萬聖節鬼屋嘅學園祭，都會係我地以後一個重要嘅共同回憶，希望我地都可以有獎啦！多謝大家！」
 
5A一眾同學同Ms張，喺聽完建龍嘅說話之後，就再次拍手。Ms張然後就望一望自己手錶，見時間都差唔多就話「好啦5A，我諗班評審都應該準備公佈結果，我地都係落去禮堂度等啦！」
 
大家就準備向禮堂方向前進，喺路上其他班見到5A，都即刻讚佢哋嘅創意同埋角色嘅還原度。而入到禮堂之後，大家都不停議論紛紛，甚至有學生互相影相。之後都到大會公佈結果嘅時間…
 
首先由陳校長發言，校長所講嘅都係讚賞大家嘅貢獻同埋創意，等學校都都可以向外，表現出學校嘅創作自由，以及學生喺創意方面嘅表達；同時間通過學園祭，等學生都嘗試感受一下創業同理財嘅經驗，呢啲都係書本上唔一定會學到嘅知識。
 
同時陳校長都提到，通過同不同來賓互動，可以加強返同學同其他人，特別係同陌生人嘅溝通同表達技巧，對將來嘅說話考試同埋演講，都會有些少嘅幫助，而且都可以等學生更加了解自己嘅學校。
 
跟住就到大家期待已久嘅頒獎環節，大家都聚精會神咁留意大會嘅宣佈。

最後5A如願得到高中組最具創意大獎，作為評審嘅Ms蕭就話5A雖然整體上未必有其他班咁好，但因為大膽嘅嘗試，以及同學落力嘅表現，都令呢間鬼屋得到唔少嘅分數。
 
喺返到課室之後，天殷都即刻打電話畀韻喬通報消息，韻喬聽到之後都好開心，話呢個都係大家努力同願意付出所得到嘅回報「所以大家做任何嘢嘅時候，都真係唔可以咁容易就話放棄，可能之後會有大大嘅回報呢！」
 
「我都同意啊喬喬！」天殷同係電話入面嘅韻喬講「依家我地都可以準備食Ms張餐飯啦哈哈！」

不過韻喬聽到之後就唔係咁高興「喂李天殷，好心你就唔好掛住食啦！而且你做好個學園祭，唔應該都只係為人地請你食飯囉！」
 
「我都係講下笑啫喬喬，你就唔好咁認真鬧我啦！」天殷同韻喬嘗試求饒，而韻喬都轉話題化解「係啦，你地一陣都會過嚟探病？」

「會啊小喬……」今次到俊軒回答「一陣我地再執好啲嘢之後，就會準備去醫院探你啦。」
 
「喔咁好啦！你地一陣搞掂就通知我啦！一陣見！」韻喬講完呢句之後就收線，而其他人就陸續收拾，終於為今次學園祭劃上休止符。

（特別篇 5  萬聖學園祭  ~ 完）

IG link https://instagram.com/bear_big_big_writer 
Threads https://www.threads.net/@bear_big_big_writer