發展到呢到,就要講返轉頭少少啦,因為之前果個湖南妹,我開左個QQ,其實周不時打開都會有啲陌生人既friend request,當中係不乏騙子,但亦都有好多大陸妹瞄準香港人,希望搵到張長期飯票,其中有一個女仔,高高瘦瘦幾靚女,做牙科護士,icon都係粉色護士裝黎既,係果個年代,個樣真係可以比肩當時大陸啲明星仔。
 
Accept左之後可能大陸真係冇乜人睇牙,佢都幾得閒成日都我傾計,佢係邊度人我就唔記得啦,但廣東話只係識少少,我地就普通話溝通為主,咁講開佢知道我都會去深圳玩,佢就約我去唱K。咁健康既活動我又冇所謂呀,佢帶左我去Baby K,座落於著名既春風路,附近有著名港燦酒吧—Richy同香港開到過去既K房—Neway。
 
一見面其實都有啲尷尬,始終我第一次係大陸見呢啲網友,好在當年啲濾鏡呀,PS裝甲唔算太勁,佢真人同張相基本上一樣,95%啦,你知當年啲相像數有限架啦,同埋就望落比相成熟少少。我記得佢話佢細我一年,望落都差不多,但佢真係好瘦,瘦到好似手腳一啪就斷果隻。相頭就真係吸引既,唔係明星都model級。
 
。咁佢見面之後就帶左我去K房,有去大陸唱正K既巴絲就知佢地啲環境係大同豪華既,BabyK係當時亦都係一個比較知名既K場,正當我想去前台問佢點樣收錢之際,護士妹妹就問我
「哎,你沒有團購嗎?」
 
當年香港都有啲垃圾yahoo團購之類既野,但實用性不大,普及性不高,所以我地港燦對團購基本上冇乜概念。係深圳就相反,佢地好似乜都有得團購,食飯買衫唱K睇戲,好似唔會有人正價去消費咁,某程度其實佢本身係咁平,mark高左個價再俾你團購姐。佢見我冇團購呢啲野佢就話等佢買啦咁,好似廿幾蚊唱4-5個鐘仲有兩罐野飲,去開Neway既我真係唔信平到咁,搞手點樣打個和呀咁?但事實就真係咁平,當我想俾返現金佢既時候,佢話唔使啦又唔係貴佢請我啦。




 
咁點好意思呀,唯有請你食個晚飯多謝你啦,咁全日就真係規規矩矩咁唱K食飯,一啲不安份都冇,我同佢去左和民食飯,我原本仲諗住問佢不如食完飯再繼續去飲杯野,點知佢話佢好少飲酒。唉,咁應該冇著落啦好似。佢見狀就話如果想飲既話都可以陪我飲一杯既,佢有朋友係做酒吧既,可以問下佢,咁我地食完飯就去左搵佢朋友啦,佢朋友係果間酒吧都係係金光華廣場附近,之前有冇經過過我都冇印象了。
 
一見面,唉屌,molamola,佢個朋友係男仔黎既喂,我本先以為係bartender果啲啦,原來係clubbing果啲搞手,我心諗,即係酒吧請去做媒果啲啦?但搵個男既去又係咩玩法呢?果個男仔望落都後生,二十出頭啦,五觀望落都OK既,係大陸黎計個樣都算幾好架啦,佢係果間酒吧開左幾張台,咁有男有女一齊黎玩,老老竇竇,都唔少女,而且啲女都係後生妹多,反而男既就有啲阿叔樣啦,又有啲生得幾抽象,亦有啲好典型工廠仔咁。
 
個搞手拉左我同護士妹去其中一張台一齊玩,咁都係玩下大話骰呀包剪揼咁,飲既係一jar一jar既威士忌綠茶。雖然小弟唔係靚仔,但拍埋果堆抽象派度點都輸唔到既,啲女都會想過黎同我地玩,我屌,原來大陸酒吧個玩法係唔撚使去yo啲女架?識人一齊玩就自自然然有人黎搵你,少年人我真係太年輕了。玩左一個鐘左右,護士妹妹飲左少少就話要走了,聽日仲要返工。咁我梗係送佢返去先啦,截左的士,上車既時候佢話我都應該未玩夠,佢自己的士返去OK啦,都好近,叫我入去玩多陣,返到去QQ我。我內心掙扎左兩秒,送佢返去就真係做下紳士既姐,但返落去玩,又隨時有女埋身喎,咁我就叫護士妹妹返到屋企記得text我。
 
佢對我黎講係帶領我入左大陸clubbing呢個領域,同佢傾計幾舒服,樣又靚,係冇波姐,之但係我自己香港又唔係冇女朋友,我係咪要溝佢呢,定係食完就算呢應該?可能就係因為冇想溝佢,之後都冇好主動咁去搵佢,但都有保持傾下計咁,直到之後有件事我地先斷左聯絡……
 
返返黎先,咁我入返酒吧搵個搞手,佢見我返黎都幾高興,後尾我同佢熟左先知,因為佢貪我係香港人,有號召力俾佢叫啲女出黎玩。咁玩到兩點幾三點先走,收費就係男性一人夾兩百蚊,女仔唔使錢。兩舊水其實都抵玩,啲女都玩得幾開放,對我黎講啦,攬攬錫錫其實都係正常事咁,佢地都唔抗拒。之後就話轉場去唱K,收費就一樣既,我有啲攰話返去抖啦,拎左個搞手contact就閃左去按摩等開關了。
已有 0 人追稿