《我和她的故事》: 第三章：我和她第一次見面

第三章：我和她第一次見面 


 
  嗰日我起身嘅時候，我望出窗，睛空萬里，今日就好似連個天都幫我。幫我制造一個完美嘅氣氛。 
 我喺衣櫃攞咗一套GU，再對住塊鏡喺度襯，嗯嗯，幾好。再去廁所梳靚個頭，緊住就去煮咗個早餐。坐係度食完嘢之後，就換埋套衫出門口。

「咁早去邊呀？」我細佬行出嚟問。
「無，約咗個friend姐。」我好心虛咁講。
「神神祕祕咁，女仔嚟架？」佢追問。


「你理得我姐。」我一路著鞋一路答佢。

  之後就衝咗出門口。 我去到將軍澳站,企埋咗一邊開咗IG。

「我到咗啦你係邊呀？」
「差唔多到啦。」佢覆我。 
  
 隔咗一陣，我係遠處見到個女仔周圍望。  
 個女仔着住一件白Tee，黑色緊身褲，孭住個細細地嘅斜孭袋。係佢啦！
 我行埋去，咦？原来佢矮過我一個頭，不過佢細細粒仲得意。  


「Hello。」我講。  
「欸...Hello。」  係老尷呀呀呀...   第一次見到女神，過然冇照騙，女神果然係女神。完全俾佢迷住咗。
  望住佢白淨嘅面龐，上面有水靈靈嘅眼珠，高挺嘅鼻，同埋櫻桃小嘴。
 
  「喂！叫咗你好多聲啦！」佢抱怨。  
  「Sor...Sorry…」我比佢從沉醉中拉返嚟現實。 
  「係呢，你比係你IG D 相仲靚仔喎。」  
  「...係咩？...」生平第一次比呀媽或者親戚以外嘅女人讚。  我塊面變到紅晒。 
  「今日嘅行程我已經plan 好晒啦。」我有少少得戚咁講。
  「搞到我好奇待添，我哋第一站去邊？」佢隻眼好似識發光咁問。 


  「你食咗嘢未？」我體貼咁問。 
 「食咗少少啦。」 
 「咁使唔使再食？」 
 「都可以嘅。」 
 「好啦，咁我哋第一站就去Cafe食嘢先啦！。」   佢猛咁say yes ，睇嚟唔係都可以嘅，直頭喺好肚餓呀！
 
  我哋行去Cafe 嘅時候，佢隻手有意冇意咁點到我隻手，我嚇一嚇，我擰一擰個頭，望住佢。佢就好似唔知有依樣嘢發生緊咁，好開心咁向前行，對於佢嚟講好似無乜嘢咁，不過我好緊張，我每次同佢嘅接觸，就好似將我同佢嘅距離拉近咗。 
  行咗一陣，終於到咗間Cafe，我哋叫咗一份窩夫早餐，我望住佢食甜嘢個樣，我笑得甜過佢。  

「你唔食呀？」 
「望住你食唔食都無所謂啦...」我講。 
「咩話？」 
「無嘢，唔駛呀，你食啦，我食咗嘢喇。」好彩佢冇聽到我講啲咩。
「你陣間有冇話想去邊呀？」我嘗試轉移話題。
「你唔係有晒計劃㗎喇咩？」佢問。


「有就有，不過睇下你有冇特別想去嘅地方啫。」
「冇所謂呀，周圍行下囉。」
「好呀。」 
「去唔去海傍行下？」  佢食完嘢之後，我問佢。
「都好呀。」
「去中環附近？坐幾個站就到架啦，好快，好快。」我問。
「好！」佢對我眨眼，依一下好似一箭穿過我個心，又好似有一股電流電擊我全身。我全身都比佢麻痺咗。
  我哋上咗地鐵，我捱咗車廂側邊，佢企咗喺我對面。  喺車程都唔知要做啲咩好，唯有拎部電話出嚟睇。過咗一陣我望上去，見到佢都係喺度碌電話，哇，我女神認真個樣好Cute。當我望得着迷嘅時候，佢突然望返住我，嗰一秒我哋眼神接觸咗。 
  OH…我即刻望返部電話，扮係到睇緊電話...唔知佢會唔會覺得我係個痴漢...  

「下一站，上環...」  頂，過晒站，掛住諗其他嘢，搞到過晒站。 

 「過晒站添...不如橫掂都係，不如我哋行下?」我拍一拍佢膊頭同佢講。  
 「好呀，啱啱食完嘢，行下消化下囉。」佢望一望周圍講。 



 道門突然閂埋，我一個箭步跨出去，我順手拉咗佢出車。  

「道門又會突然之間閂嘅...」我望住佢講。

  佢望住我一言不發，我望落去，我見到我喺度拖住女神隻手，我嚇咗一嚇，估唔到我居然拖住女神隻手...我即刻鬆手,  

「唔好意思，頭先道門突然之間閂，所以先...」我摸一摸自己個頭講。
「唔緊要...」佢塊面紅晒，白裡透紅中睇得出佢其實真係幾尷尬。 

   我地行出地鐵嘅出口，佢輕快嘅腳步顯得佢有啲緊張。我加快腳步，追上佢嘅步速，慢慢喺後面跟住佢。
   行咗十幾分鐘，我見佢漫無目的咁行所以問佢。  

「你行緊去邊架？」佢冇應到我...  我拍一拍佢膊頭  。
「啊，咩事呀？」佢嚇一嚇。
「吓，無呀，我問您行緊去邊，你無應我所以拍你膊頭囉。無乜嘢啊嘛？」


「ERRRR…我唔知喎。」佢對住我苦笑。
「吓，咁你又行？」我笑住回應佢。
「我哋前面好似有電車站，我哋唯有坐電車返去啦。」我聳一聳膊頭。
「好！」佢回應。

  我哋行前咗少少，上咗咁啱到站，坐返去中環。
   上咗電車之後，我哋上咗一層。我哋坐咗係對方嘅隔離,我好如常咁戴起咗一邊嘅耳機，耳邊嘅音樂輕輕響起。我望向佢，喺太陽光底下嘅佢好似更加靚女，更加令我著迷。
  正當我陶醉嘅時候，佢突然望向我，我依然靦腆咁低下頭。  我恨自己唔夠努力，眼前有一個咁完美嘅女神，竟然沒辦法好好把握。佢突然間搶過我一邊嘅耳機，  
「你聽緊咩啊，我哋一齊聽啊。」
「願我可花足一生和你甜蜜，再走到一百歲那誌慶場合...」依嗰時候響起咗我最鍾意Dear Jane 嘅 2084。 
 
  我哋就係咁，靜靜咁聽住歌，慢慢咁坐去目的地。

  佢突然捱咗個頭係我膊頭到。  嚟唔切反應嘅我，好幸運咁，上演咗無數人都希望會發生喺自己身上嘅事，當時嘅一切就好似韓劇般浪漫。就算而家每一次回想起都會令我由心底裏笑出嚟。
  去到中環，我哋落咗車，嗰日已經係四點幾，我哋喺海傍慢慢，慢慢咁行。我主動幫佢打卡同影相，影咗半個鐘。 


  突然佢拎起部電話， 

「唔好意思，我要走先啦。」
「走先喇，係咁先啦，下次再玩喇。」依嗰歌詞突然之間響起。
「點...點解嘅?」未講完依句嘢佢已經走咗。

  我望住佢，突然之間有個男仔行埋去講咗幾句嘢之後，佢就跟住嗰男孩走咗。
  我諗住行前啲望真啲睇下個男仔係邊個，但係...

  嗰個喺...喺...喺呀杰？！