一個關於我嘅故事: 01. 相遇為了離開

2021年，夏
「喂，唔好再飲啦，你已經飲咗好多啦...」Nicole講道。
「你唔好理我啦...」呢個醉到就嚟瞓低嘅就係我。

我叫Jacqueline今年19歲，今年讀Year 2，成績一般DSE都係夠分入Asso。
而我男朋友，唔係，係Ex先啱，佢叫Daniel同我同年，佢而家喺Kong U讀緊醫，可見佢係個所有老師都鍾意嘅讀書人而且佢嘅樣都唔差，我同佢一齊咗2年幾啦。

我同Daniel係喺IG識嘅，雖然識咗冇耐但係我同佢好啱傾不突止，仲要大家都好有默契，一個emoji或者，一個嘆氣已經大概知對方諗緊乜，但係我哋最後都係逃唔過要分手嘅命運。
----------
2018年，春 


「唉，幾時落得堂呀我好攰啦，再咁落去我真係捱唔到啦...」坐係我隔離嘅Nicole講。我就直接無視咗佢，因為我好「認真」咁上緊堂。

突然我電話震咗一震，原來係Daniel搵我，「喂，你做緊咩呀？」
「無呀上緊中文堂但真係好悶呀，如果你再遲一秒搵我應該真係瞓着咗㗎啦，你冇返學？」見到佢搵我就以9秒9嘅速度覆佢。
「我都好悶呀冇嘢做...」「有咩唔識嘅話咪問吓我囉，我一定會答你嘅～」
佢話好悶我以好奇嘅語氣問「乜你學校今日放假咩，你冇同我講嘅？」
「唔係呀，今朝起身嗰陣有啲唔舒服咪唔返囉。仲有，你做乜偷用電話，因住比老師見到收機呀。」
原來佢病咗...「吓，咁你而家仲有冇事呀？叫咗你尋晚早啲瞓㗎啦，take care！」「我咁聰明，唔會比老師發現啦～～」

Nicole用佢八卦嘅口吻問我「係咪喺IG上面識嗰個Daniel呀？」


「係呀，佢病咗無嘢做咪搵我囉，嘻嘻。」我好開心咁答佢
「咪話我唔提你呀，小心唔好咁快沉人船呀，一陣你又喊晒口咁搵我都唔知點幫你呀。」因為我經歷咗一段好失敗嘅感情，而佢亦都知我好容易比人呃，所以不停提住我唔好咁易信人。
「得啦得啦放心啦，唔會嘅～」點知Nicole用一個半信半疑嘅樣望住我，跟住佢就繼續趴係張枱上埋淨低嘅堂。
----------
4點啦終於放學啦，「Nicole拜拜啦，聽日見啦～」「嗯，聽日見啦拜拜～」

離開咗學校之後我打比Daniel「喂喂，你做緊咩呢～」
「冇呀，掛住緊你囉」
「嘩嘩嘩，好老土呀，同埋唔好恃住自己靚仔少少就flirt女好喎...」
「首先，我靚仔呢個係事實。第二，包大人冤枉呀，我冇周圍flirt女呀T.T」


「咦...你真係好嘔心呀，我好想嘔。」「係喎，咁你而家好返啲未呀？」
「好返啦，瞓咗成朝，咩病都好啦哈哈！」
「車，好叻咩...」
「係呢，你而家返緊屋企？」
「嗯嗯，我等緊架巴士嚟呀，已經等咗5分鐘啦但仲未有車呢。」
「咁我陪多你一陣啦，我晏啲要去補習啦。」
「哦，咁好啦。」
----------
過咗一段時間，我架車到咗，而Daniel都要出門口去補習。
「Daniel，我有車啦。」
「好呀，我都要走啦，你自己一個小心啲啦。」
「知道，我返到再搵你啦～」我同Daniel講完再見之後就cut咗線了。

上到車，我習慣地坐喺車左邊嘅第一排。一嚟熙來攘往街道，我覺得好靚好熱鬧，二嚟我會留意住身邊唔同嘅事物，例如行人道上嘅人、對面街嘅建築等等。
當我坐好放好曬自己嘅銀包電話嘅時候，隨之，在我餘光中出現一個人。


「唔好意思，呢到有冇人坐？」