「唔好意思,呢到有冇人坐?」
聽緊歌嘅我聽唔到嗰個人問咩,我只好除低我一邊嘅AirPod並抬起頭望向我嘅右邊。唔抬頭都還好,一抬頭我見到嘅係我曾經愛到忘我嘅佢...
「呃...冇呀冇呀...」我尷尬地講
明明班車根本就冇乜人,但點解佢要坐過嚟嘅?我心諗
「唔該晒...」之後Joseph就坐咗喺我隔離,一開始我哋各有各聽歌。

Joseph,我F.2 嗰陣因為同佢同班所以識咗佢。雖然佢讀書唔算叻,但佢係一個運動健將嚟基本上所有運動都難佢唔到,當然包括體能啦。
我哋識咗幾個月之後就一齊咗,一開始我哋好sweet㗎全級都知我哋拍拖。但後尾佢就因為比Nicole發現咗佢出軌,我同佢分咗手,而佢就同咗個師妹一齊。

當我以為我可以安靜咁邊聽歌邊瞓覺嘅時候,佢突然開口,「係呢,你最近點呀?」


「冇咗你一切好好」我心諗,「呃,冇呀都係咁啦,哈哈...」由於尷尬得滯,我雙手不停咁郁。
「咁就好啦。」
「估唔到會係呢架車到見到你喎。」因為Joseph唔係住我嗰邊,平時冇咩事都唔會搭呢架巴士,所以我出於好奇地問道。
「係呀,今日我有啲嘢做呀。」佢停咗停再講,「好懷念以前同你一齊搭車嘅時候呀。」
我停低咗郁緊嘅手指,面上掛住既尷尬又奇怪嘅表情望住佢
可能佢係我一字一句間聽出我有幾尷尬,所以大家都冇再講嘢

為咗打破呢個奇怪嘅氣氛,我決定瞓到落車!
我帶返好我嘅AirPod合埋雙眼



過咗一陣架車突然之間急停,瞓著咗嘅我冇任何準備,
我以為自己要撞落前面嘅玻璃時,有啲嘢幫我擋住咗。我望一望原來係Joseph用佢隻手幫我擋咗
我出於禮貌同佢講咗句唔該「唔該晒...你隻手冇事呀嘛,成隻手咁樣撞落塊玻璃應該好痛啦?」
「小事啦,過咗咁耐你都係咁唔小心呢」
「哈哈,係呀...」佢講完呢句我心揪一揪,心入面有種講唔出嘅感覺,好似提返我哋當初一齊嘅時候有幾開心。
但我知比起開心,佢為我帶嚟嘅痛遠遠超於心動嘅感覺。
​因為我住嗰到同學校距離都算遠,所以我決定繼續瞓到落車。

唔知點解今日我真係好攰平時我都起到身落車,但我已經瞓到不省人事。
我感覺到有人拍咗我膊頭幾吓,「嘉嘉?起身啦,到咗啦。嘉嘉?」


「嗯?」我揉一揉我隻眼,並說道,「係喎要落車啦喎,唔該晒你提我。」
本身我諗住再見到Joseph嘅時候比佢見到個唔同、好獨立嘅形象佢,比佢覺得冇咗佢都可以過得好好,然後等佢後悔㗎嘛...而家我好似出晒醜啦!唉,我都係唔理啦,佢鍾意點諗就點諗啦,哼!
----------
我返到屋企沖完涼之後就打比Nicole,同佢講返我係巴士上遇到嘅事...
「嘩,咁你都幾黑仔喎,咁到撞到佢!」
「點算呀,我仲要做咗咁多白痴嘢,佢實笑死我啦...救命呀,我冇面再見到佢啦,嗚嗚。」
呢個時候Nicole終於忍唔住笑出聲啦「哈哈哈,唔係呢,哈哈,真係好好笑呀,我唔忍啦,哈唔哈...」
「喂呀,可唔可以認真啲呀,明明就咁sad你仲要係到笑,冇人性!」我帶啲生氣咁講,而我係嗰刻知道原來損友真係好恐怖㗎。
「哎呀,唔好嬲啦,如果佢真係唔留意你嘅話就唔會有位都要坐你隔離啦。同埋佢唔上心嘅話點會用手幫你擋,仲要拍醒你提你落車先,自己諗諗佢啦。」「喂喂,唔講住啦,我要食飯啦,聽日返到學校再講啦。」
Nicole cut咗線之後我開始諗返佢頭先講過嘅嘢。嗯,Nicole又好似有道理喎,但點解佢為乜要咁做呀,啊好煩呀,唔諗啦。
我手機震咗一震,「你有一則訊息。」我見到後就開咗部電話係Daniel搵我,我即刻笑住咁打開WhatsApp.
「我補完習啦,補咗2個幾鐘好肚餓呀。」
「咁你想點呀?食嘢囉。」
「而家去緊啦,但仲未諗到食咩喎。」
「我幫你唔到喎。」


「算啦,我周圍兜吓睇吓有咩食啦QQ」
「嗯,我都就嚟夠鐘食飯啦,一陣再搵你啦~」
「好!」
已有 0 人追稿