地下階層 (前名: 核。港): 1. 戰火不息

《每場戰爭的結束，只是，下場戰爭的倒數》

-------------------------------------------------------------------

大家好，我叫做梁智恆，不過喺黃大仙站，大家一般都叫我恆仔。
轉眼間我已經十八歲，現在於黃大仙與達叔一起居住。

上一次「異物」來襲已經是13年前的事，現在人類在地底生活已有約120多年。
短短的13年，我哋吸取左以往嘅教訓，對於每個地鐵站之間嘅聯繫已經加強。而每一個地鐵站嘅防禦工事都已經得到保障，並且各自發展科技。
回顧番當初，鑽石山站之所以會被攻陷，除咗係同前線軍隊嘅聯絡薄弱，亦都沒有緊急通報嘅後備方案，再加上大家安於現在，最後先會得到如此慘劇。





其實都已經咁多年，我唔知道我嘅祖先當初由地面搬到地底，佢哋嘅生活有幾難捱。
但係我只知道我哋人類已經習慣咗地下嘅生活，即使我哋嘅生活充滿危險，總有一班人自我沉淪，霉爛咁生活⋯

如果你問我點解仲要積極生存，我都諗唔到有咩答案…
不過唯一嘅答案可能係…

地表。

相信呢一個亦都係大家嘅原因，人們努力生存，每日都要跟死亡擦身而過，都只係想回到地表生活，而且希望可以遠離戰火，安心生活。




但當他們以為和平將來臨，卻估不到接踵而來的竟是……

-------------------------------------------------------------------

2173年5月28日 黃大仙站

「喂，恆仔！今日到你站崗呀？辛苦哂。」輝哥拍一拍我膊頭。

「邊夠你辛苦呀！一年三百六十五日，日日都站崗！」我向他敬了個禮。





輝哥係黃大仙站自衛隊指揮官，每天都會在黃大仙站的路軌閘口站崗。他嘅槍法及眼界甚妙，平時有一兩隻「地鼠」型異物出現，就算燈光暗淡，佢都一定可以射得中目標。

「希望今日都係平安嘅一日，不如聽下收音機，聽《中環時報》」輝哥一邊為步槍的槍管上油，一邊同我傾偈。我去打開收音機，嘗試調整頻道。

「喂！你有冇定時為自己把槍上油呀？雖然我哋用嘅只係土炮，不及中心區嘅軍備好，但都要好好保養呀！」

輝哥攞起我把槍，並且慢慢檢查，每個位置都觀察得好仔細。當佢檢查完之後，先將把槍還俾我。

「算你啦，你把槍都保養得唔錯。」輝哥點一點頭表示滿意。

其實我都好好奇，點解我哋會有槍用？我聽講以前香港明明冇得賣槍，又何來會有槍留低給我們用？有人話在核戰前，一個叫做中國嘅地方有輸送一啲物資俾香港，當中包括槍械……又有人話其實以前香港政府早有安排，暗地裏喺地底建立軍器廠。

你問真相係咩？冇所謂啦，總之宜家有槍補命就得啦！

「沙……沙…中環時報，每天把情報，為你送到…」說時遲，那時快，我已經調好收音機頻道。





「首先喺地下情報， 荃灣線自從第二次「異物大戰」後，戰線後退至美孚站後就維持不變，根據回報記錄，今日有一兩隻「地鼠」出現…… 觀塘線的戰線後退至黃大仙站就維持不變…… 東涌線、 將軍澳線仍然失去聯絡」收音機傳來廣播員嘅聲音。

「以下係油尖旺區「快鼠」地面部隊嘅報告: 近日地面部隊觀察到異物群有異常行動，某些地區「異物數」有下降的趨勢，而異物出現兩族聚集行動嘅現象……」

「咁奇怪？佢哋好少會兩族一齊行動，睇嚟有大事要發生喇……但願唔好好似13年前咁…」 輝哥低下頭在思索。

「恆仔，今日邊個巡邏？」
我查看當值表，再睇吓巡邏時間，應該差唔多返到嚟。

「睇吓先…應該係MK仔同佢细佬」MK仔全命叫陳日行，由於佢同佢細佬都係來自旺角站，所以我們都叫他做MK仔。
咁點解唔叫佢細佬做MK仔？有有第二個花名。
細佬叫陳日成，係黃大仙站數一數二良好嘅醫療兵，站内有很多人都叫他做「陳姑娘」（因為我哋覺得佢乸乸地），雖然他不喜歡……

「用對講機通知佢哋，叫佢哋不要衝動行事，一見到「異物」就走，千奇唔好戀戰。」輝哥認真對我講。





「唔使啦，佢哋到了。」我指住從隧道來返嚟嘅人力車。

我和輝哥望向那人力車，都比眼前景象嚇親……
車上嘅人的確係MK仔同陳姑娘，但他倆身上卻充滿傷痕……

「開警報，快！」輝哥立即走去接陳氏兩兄弟，期間佢都冇鬆懈，舉着槍指向漆黑嘅隧道。我就撳警報器上嘅紅色按鈕，警報燈再次亮起。
對上一次見到已是13年前嘅事……

我看着亮紅嘅光線，有一種不祥預感打從我心底裏浮現…