【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 12

「乖乖地瞓喇好唔好?」鍾隨心坐在劉世檜床邊，安撫不肯睡去的他，只見他瑟縮自己在床上，充滿疲態的雙目遙望窗邊， 即使怎樣也不願睡去。


「你頭先聽到曬?」劉世檜嘀咕說著 


鍾隨心有些面紅點點頭


「其實你叔叔講得啱，我本身就係唔應該存在，我都只不過係一個冇咩特別嘅靈體。」




「每一個人都係特別嘅存在，就算相比其他人唔出眾，佢都有特別之處…就算對世界嚟講佢只不過好平凡，但係某啲人心目中，佢都會係最特別嗰個。」


「點解你覺得我重要，我哋只係識咗幾日…而且我連自己係點樣都唔知。」鍾隨心輕輕說著 


劉世檜沒有回應，也許連現在他自己也不知道，這種是什麼感覺，是愛嗎，似乎又不太準確。言語不像情感，並不是與生俱來，也許人類還沒創作出表達這種情感的字句，就這樣兩人沉默片刻，劉世檜才終於開口。




「我只係知從我第一眼望到你開始，我就覺得你好特別。」劉世檜閉起疲倦的雙眼，聽著旁邊鍾隨心哼著的小曲，他不知不覺跟隨著旋律唱著「期望雪國撒滿愛…即使會繼續地遇害…她信任雪地內…岩石化作花海」


鍾隨心睜大了雙眼，零碎的記憶若隱若現，彷彿看到自己在堆著雪人「點解我會哼呢一首歌。」


「對唔住我救唔到你…」沙啞的聲音在她耳邊傳出 




附近的公園，石正山環視四周，彷彿等著什麼獵物，一旁的草叢沙沙作響，兩隻骯髒的流浪貓在附近徘徊。


他從膠袋中拿出數罐貓罐頭，跪在一旁，流浪貓試探性向前，嗅了一下眼前的食物，片刻後更多的流浪貓圍繞著石正山。


 「又係你呀石先生，睇嚟你今日都好好完成本份。」在他身後的是一個穿著西裝的辦公室女職員。


「你唔應該咁近我。」石正山看了一眼周遭東躲西藏的靈體。


 「你又唔會收咗我嘅~」女職員靠近看著覓食的小貓 




「而家唔會，唔代表之後唔會，好多地縛靈都有成為惡靈。」石正山看了她一眼接著說「你好似都留咗喺度好多年…時間越長，一切都好難講。」


「如果附近啲流浪貓都有個好歸宿…我諗到時就會走。」女職員在貓群中撫摸著一隻純白色的貓咪。


說罷漸漸將牠抱起，緊緊抱在懷裏「我唔想呢啲咁得意嘅貓咪，餓死街頭…更加唔想佢哋好似小白同我一樣嘅下場。」 


「話說今日你咁有興致嘅。」女職員看了一眼他膠袋剛買的餸。


「嗯，時間差唔多。」石正山沒有多說什麼，清理完現場的貓罐頭便匆匆離開。




「下次見啦，石先生~」 女職員看著石正山背影輕輕向他揮手

 

石正山從衣衫中拿起著殘破的筆記簿，熟練地翻開其中一頁，每頁也貼滿密密麻麻的剪報與筆記，這一頁的其中一張標題寫著


「女職員下班餵飼流浪貓，遭人姦殺棄屍公園」


石正山在剪報下方備註寫著「流浪貓—尋找領養人。」


過了一會兒，太陽即將下山，石正山抽著剛買的一袋餸到了劉世檜家門口，他先是敲了兩聲，隨後才拿出鎖匙打開大門。




鍾隨心好奇聲響湊了上去，兩人便在走廊處碰了正著，她下意識後退兩步，石正山開口問道「個死仔包瞓緊覺呀?」


 鍾隨心肢體僵硬，站在原地不敢亂動，只能輕輕點一點頭 「嗯嗯」


石正山在門口外跪下來脫著充滿泥濘的鞋子，並把它放在外面，進屋後徐徐說著

「放心，我只係入嚟睇下個佢。」


他沒有了進門前沉穩的腳步聲，輕輕推開房門，劉世檜似乎沒有大礙地睡著，他隨便看了一眼周遭房間便關起房門，走進了廚房。




 「喂。」低沉的男聲從廚房傳出 


 鍾隨心依然站在原地，聽到他的呼喊才倉皇地走到廚房門口前回應了一聲 「係!?」

 

「你哋喺邊度識㗎?」石正山專心弄著砧板上的豬肉


鍾隨心簡約把劉世檜開始碟仙遊戲以及帶回家的過程說出來，石正山過程中保持著沉默 「…過程大約就係咁。」


「真係少有。」石正山轉頭看了一眼鍾隨心


「嗯?」


「之前每次嚟，床邊的垃圾桶同埋書枱都會擺滿垃圾，廚房會有一堆未洗嘅碗，仲有個地下…」 


「佢以前唔會咁…我都係第一次見佢發咁大脾氣。」


「佢嗰陣都係衝口而出啫，雖然我唔知係咩意思，但係我信佢心入面一定唔係咁諗，你唔使擺喺心入面，同埋佢講我重要…可能都只係太激動。」鍾隨心說著 


「我係應該要擺喺心入面，因為佢父母係我害死，因為我，佢父母死於惡靈嘅手上。」鍾隨心聽到後感到一陣驚訝，在準備食材的過程，石正山把劉世檜的往事徐徐道來。


「…所以我都有責任保護佢，特別係喺惡靈身上。」 石正山停止手上的活動，看著鍾隨心一臉認真說道。


 「雖然唔知詳細你哋嘅情況，不過就算你唔係惡靈，我都建議你離開佢身邊。」


 「…就算你有冇意識到都好，你而家害緊佢。」


 鍾隨心不明所以，只能呆呆地看著石正山。


 「你有冇發覺，由你識佢開始，佢就不斷病? 呢種情況只會越嚟越差，時間越長影響越大。」


「…我一直害緊佢?」鍾隨心腦海中回憶起數個晚上，劉世檜因病痛難受的樣子。


「你唔使咁自責，呢啲嘢，嗰個衰仔點會唔知。」


「但係人同鬼，始終唔應該咁接近。」 


鍾隨心一陣愕然，石正山接著說 「你真係可能對佢好重要，咁樣睇落去，如果我唔同你講，佢應該都會一直唔講，自己默默承受。」 


「嗰個傻仔，呢一點似足佢老豆。」 


「所以，如果我唔走你係咪會收咗我?」鍾隨心低頭一問 


「啱啱見到你，我以為你只係吸陽氣嘅惡靈，既然個衰仔覺得你咁重要，要將你留喺身邊，我都會尊重佢嘅決定，但係前提唔會影響到佢條命。」


「但係如果再咁落去，我只有兩個做法，一係收咗你，一係收咗佢嘅陰陽眼。」


「講起上嚟，突然之間開返眼，又玩碟仙…出事都唔同我講，嗰個衰仔真係打得少。」


 石正山不知不覺已經煮好了一碗碎肉粥，一些餸菜以及精美的三文治並用保鮮紙包裹好。


「我要講嘅講完，你呢幾日自己決定。」


 「仲有夜少少叫佢起身，叫佢食完再瞓…仲有同佢講，幫佢再請咗三日病假，叫佢休息多啲，係咁。」


 鍾隨心禮貌地送走了石正山，隨著他駕車逐漸遠去，循著氣息而來的厲鬼就在遠處目送他離開，心懷不軌地抬頭看著這棟大廈。