【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 31.[告白!]
繽紛的霓虹燈廣告板在他們頭上繚繞，劉世檜帶著附在李彤身的鍾隨心在附近街道上閒逛，穿過熙熙攘攘的人潮，轉入一條內街，從熱鬧到寂靜，只剩下街邊攤販正在整理攤位。
「係呢，你呢排住喺邊?」劉世檜問道
「有陣時會喺你叔叔嗰度，有陣時會喺電影院入面，有陣時會去網吧。」
「網吧…?你上到網咩。」劉世檜總是會盯著她的眼睛說話，儘管有了肉體，他亦下意識覺得眼前在觸碰的不是她，除了那個注目著自己的溫柔眼神…
「跟你阿叔食過下夜粥吖嘛，你睇。」 鍾隨心凝聚意念，一張街招瞬間飛到劉世檜的臉上。
他嘗試撥走，街招亦會詭異的隨風黏在他臉龐上，見他怎樣也撥不走， 鍾隨心繼續調皮，玩到她笑到不能自理才停手。
鍾隨心抹走眼邊的淚水笑著回應「好啦唔玩喇…我就係咁用鍵盤打字，睇下邊啲仲有時間嘅電腦就睇下youtube咁。」
「不過唔知嗰度係咪太多電器定點，留喺嗰度太耐會頭痛，所以我都好少去。」
「聽落去都唔錯…」
「係呀，不過我都係覺得之前住嗰度…開心啲。」有了肉體的她，現在的臉微微泛紅，掩蓋不了害羞的情緒，意識到自己好像說錯話，她嘗試裝作若無其事微笑，可惜但臉上的紅暈已經出賣了自己。
一旁簡陋的攤檔，收音機正在播著六合彩攪珠結果「破天荒結果，2，08，18，28，38，48。」
一張紅膠櫈被撞跌，攤檔裏頭的阿姨雙手合十，站起來感謝著上天，直覺告訴他這是一個怪人，劉世檜正想拉著鍾隨心離開時，阿姨睜開雙眼專注的看著他們。
「且慢 !!」聲音之大讓一旁的人亦看著他們。
阿姨披著紫色披風，材質劣質像件淘寶貨，踏著拖鞋便動身攔著兩人，劉世檜與鍾隨心無奈互相對視一下。
「兩位有冇興趣過嚟占一個卜?」說罷便伸手向那個簡陋攤檔
「唔好意思冇錢 …」劉世檜想走卻被再次攔在前方 。
「放心! 命運已經幫你哋畀咗錢，難道你哋唔想知道你哋兩個嘅未來係點?」
聽到未來兩字，劉世檜停下了腳步，猶疑了一刻，他自己也想知道與她的未來會是怎樣，可想到了萬一倘若不盡人意…
他再次動身，鍾隨心卻留在了原地輕輕一問「真係唔使錢?」
「真係。」
「咪試下囉，好似好得意。」 鍾隨心悄悄聲說著
「但係，佢奇奇怪怪咁，個攤殘殘舊舊…神棍咁嘅樣。」劉世檜在他耳邊一邊說一邊用著懷疑的眼光打量眼前的占卜師，那簡陋的攤檔還有一碗吃到一半的河粉，一絲專業和神秘的感覺也感受不到。
「唔緊要啦都唔使錢，當睇表演咁咋嘛。」 鍾隨心笑著說
劉世檜有些不情願的坐下，占卜阿姨拍一拍走紅枱布上的塵土，拿出水晶球放在桌上。
「你哋想知啲乜嘢呀?」阿姨聲音似乎刻意壓低了少許
鍾隨心低下頭沉思「我想你幫我占卜下，我哋兩個嘅未來?」
「…」見劉世檜沒有回應，鍾隨心轉頭問著他「畀啲精神喇，你唔想知咩?」
「知唔知都一樣啫…」
占卜阿姨開始低聲喃嘸，劉世檜就這樣看著她略顯浮誇的表情動作，手舞足蹈大約半分鐘後，開始定睛看著水晶球。
「睇到啲乜嘢呀?」鍾隨心不自覺捉緊雙手有些緊張地說
占卜阿姨清一清嗓子，抬頭以嚴肅的表情看著兩人「好混亂，我睇唔到你哋兩個嘅未來。」
靜過數秒後，劉世檜有些不爽地說「就係咁多咋?」
「即係你哋將要面臨好多嘅挑戰。」
「咁有冇方法可以化解?」鍾隨心緊張的追問
「當然有，如果追問嘅話就要加錢。」占卜阿姨從抽屜中拿出了一張價錢牌，劉世檜已經站起身來不想聽他廢話，拉起鍾隨心便打算走。
「唔好走住先啦，唔想聽未來，不如聽下前世呀? 有冇興趣? 先生!先生!」
「前世你哋都係差唔多歲數，一個叫婉恩…先生!真係唔繼續聽呀?」占卜阿姨看著他們離開的背影，嘆了一聲沒有挽留便坐下。
隨後從抽屜中拿出中了頭獎的六合彩，緊張的四處張望，臉上忍不住笑容，謹慎的放在自己錢包內，並且繼續吃著那玩到一半的河粉。
「我咁樣都算完成任務掛?算啦，由得佢啦…嘻嘻，估唔到係真嘅。」占卜阿姨心裏不斷浮生著各種幻想，豪宅跑車到處旅行。「…唔知嗰個人而家喺邊呢? 」
隨著深夜來臨，街上的店舖逐漸拉下鐵閘，鍾隨心抱著幾乎與李彤肉體同樣大小的玩偶熊與劉世檜靜候著紅綠燈。
「估唔到可以中到頭獎。」鍾隨心嘴巴被玩偶熊遮住聲音不太明顯。
見她吃力地不斷調整位置抱著玩偶熊，劉世檜便一手奪過扛在肩上「都話我拎㗎喇…」
「自己抱住有滿足感呀嘛…好耐啊紅綠燈。」鍾隨心看著零散的車輛，紅綠燈的聲響…忽然天空又落下雨點來。
鍾隨心伸出雙手「開始落雨啦…係喎，你仲記唔記得你第一次見到我嗰陣。」
「點會唔記得，嗰陣你都係喺李彤身，企喺馬路對面…」 綠燈亮起，劉世檜主動拖起了他她手。「我仲拖住你過馬路添。」
鍾隨心沒有縮手，兩人經過斑馬線，她紅起雙臉轉過頭去
「唔使怕醜喎。」劉世檜輕輕說著
「我冇，我要睇清楚啲，唔知仲會唔會有車攻擊我哋…」 她鼓起臉低聲嘀咕
「攻擊…你覺得會有大黃蜂定係麥加登，哈哈…話說李彤呢?」劉世檜忽然醒起了。
「佢一直係後面跟住我哋呀…而家仲未過馬路。」鍾隨心回頭指著
「做鬼都咁遵守交通規則嘅?」
「可能佢想畀啲空間我哋，專登行慢啲呢，你搵佢做咩?」
劉世檜沒有回答只是輕輕一笑。