【校園】【愛情】A0毒男的愛情史: 【司儀篇-下】

【做完檢查，有機會星期三出到院，出文先。】

首先係學生會會長上台演講，不過跟係會長後面個位其實我到依家都唔係幾相信自己對眼，force仔佢中三就做咗副會長職位，都唔正常㗎，明明就中五先可以當選，佢就直接跳級，會唔會裡面其實有啲咩不可告人嘅秘密呢。

「...」學生會會長嘅廢話連篇。

「各位英俊瀟灑貌美如花嘅同學們，我係你哋嘅學生會副會長G-force，有人問我身為一個中三仔到底有冇能力擔任呢個職位，我就唔想口頭解釋，我會直接實力說服妳哋㗎喇，不過期間我都會盡我所能服務大家。」

「啪啪啪啪啪。」呢條友仔為咗令學校以為學生會好多人支持，安插唔同年級嘅同學去做臥底，只要一講完台詞就會猛咁拍曬手扮支持。



「啪啪啪啪啪啪啪啪啪。」鼓掌聲好似細胞分裂過程咁，由一變二，二變四，四變八，八又變十六，最後成村人都係度跟風拍手鼓掌，場面有啲唔受控制，咁由於我哋副會長大人提前同我講過有臥底呢件事，我都仲識得反應嘅。

我:「哇，睇嚟大家都幾支持我哋嘅學生會，有請學生會落台就坐先。」

我:「係喎，唔知各位新生知唔知到，我哋學校其實有好多嘅學會㗎。」

晴:「係囉，不如請佢哋上台演講下。」

XXX學會......太多學會我就唔呃字數，亂咁嚟嘅演講，讚到自己部室有幾好幾好，需要新生嘅支持，咪姐係推人落火坑，真係激氣。



想當年我就係畀啊羅會長水咗入棋藝學會，話咩輕鬆簡單，參加嚟減輕學業上嘅壓力，仲有好多唔同嘅福利添，結果...乜都冇，日日逼你過嚟玩到五點走人，裡面班人嗰個都唔多正常，中二病啊...重度FF患者...咩類型都有一餐，搞到我連去部室嘅慾望都冇。

「...」又係簡單嘅學會招募新生，唔落太多字。

我:「各位中一嘅同學仔記得踴躍參加吖。」我唔情願講出呢句話。

晴:「見到咁多同學為學校出力，真係感動。」

我:「冇錯！我相信大家以感恩之心同心協力，今年一定過得順利同開心。」



晴:「我在此宣佈，就職禮及頒獎禮成，多謝曬各位嘅配合。」

我同啊晴向台下鞠躬之後就翻咗後台。

「哇，估唔到咁順利，真係緊張死我。」我將手掌放喺心口呼吸。

「我都係，頭先仲要唔記得台詞，好彩你頭先喺隔離提一提我。」啊晴說道。

「辛苦曬妳哋兩個，請妳哋食啦。」癡線婆從衫袋拎出嚟嘅kinder繽紛樂說道。

「多謝Miss。」我哋異口同聲說出。

「喺呢度食埋先翻班房喇。」癡線婆說罷便離開後台了。

啊晴迅速打開包裝，食得津津有味，牛奶加朱古力嘅味道，三兩下就完食了，啊晴佢望住我手上個條繽紛樂嘟起嘴巴，好似意猶未盡咁。



「你仲想食吖。」我說道。

「嗯。」啊晴微微點頭。

「嗱，畀你喇。」

「你唔鐘意食咩。」

「都算鐘意嘅。」

「咁你又畀我。」

「見你嘴饞吖嘛，好似十年冇食過嘢咁。」



「喂呀。」

「你食唔食㗎。」

「我哋一人一半喇。」啊晴掰斷一半繽紛樂給我。

好滿足，無論係從生理層面，還是從心理層面，呢個平凡無奇嘅舉動都可以令到呢位毒男開心成日。

「嗯，好食吖。」啊晴滿臉幸福說道。

「食咁多朱古力睇住肥吖。」

「人要活在當下㗎嘛，肥呢啲減咪得囉，就嚟上堂喇。」

「行啦，返課室啦。」



「嗯。」

未完待續........................