【校園】【愛情】A0毒男的愛情史: 【體育堂】
「咁多位同學，有個好消息，今日要考體能。」嗯，依家上緊體育堂。
「吓，唔係掛！」「Miss，呢個邊到係好消息吖！」
「死得啦！我實唔合格啦！」「唉！又要考試！」
各式各樣嘅埋怨聲出現。
「兩個人一組，1分鐘後排好隊，冇隊嘅準備罰啦。」
聽到之後我心急如焚，馬上衝去尋找我的友人們(咩友人們啫，咪得嗰兩個，扮咩嘢。)
Andy同Force仔已經直接組成一對了「死開啲啦，有隊喇。」他們說道。
「你老...」我四處張望，同班嘅同學都陸陸續續揾到考試夥伴，差不多只剩下我一人。
由於呢班男仔數量係單數，姐係點都會剩啲一個出嚟，我見到個平時聲都唔出嘅同學，唉，唔理咁多喇，考個試啫，冇所謂啦。
「Hello，同學，不如我哋一組吖。」我向他問道。
「Er...我有組啦，唔好意思。」他說道。
「哦，唔緊要啦....」尷尬到呢。
話咁快一分鐘即將來臨，我眼角目光瞄到女生們那邊都有一個人還缺乏組員，但礙於人頭的阻礙，我看不清楚她是誰。
「唔理啦，能避則避啦，我都唔想被人罰吖。」我暗道，順便走過去。
「誒？哈，啊晴你都冇組，咁搞笑。」我說。
「冇計，人緣差。」啊晴說。
「你都人緣差，咁我咪仲慘。」我自嘲。
「咁不如...」乜原來邀請呢回事難開口嘅。
「不如我哋一組吖。」啊晴提出。
「你唔介意？」
「有咩問題，考個試啫。」
「好啊，多謝你，辛苦曬你啦。」
集合時間。
「誒！你兩個冇問題...？」Miss看到了竟然有一男一女嘅組合倍感驚訝。
「唉，Miss唔好阻人放閃啦。」有條木咀大吵大鬧喺度搞氣氛。
「Woo~~」咦哇鬼叫聲。
「準備開始，仰臥起坐先，男仔嘅48下滿分，42合格，女仔嘅42下滿分，38合格下」Miss說。
「邊個做先吖。」我問啊晴。
「我嚟先啦。」啊晴說。
啊晴躺在藍色嘅軟墊上面，等待哨子聲鳴起，而我看著面前的美人，不禁嚥了一口口水。
「你望住我做咩呢，就嚟開始啦。」啊晴說。
「哦，sorry，發緊吽哣。」我連忙跪下幫忙壓著雙腳，但我驚太過用力，整痛啊晴。
「喂，你用力少少。」啊晴說。
「哦，好吖。」嗯！竟然仲唔夠力？咁我加大少少力喇。
「喂喂喂，又唔洗咁用力。」啊晴說。
唉，女人真係善變，太多唔得，太少都唔得，咁取中位數算啦，打和！
「依家差唔多喇。」啊晴說。
「準備好啦，3....2....1，嗶嗶嗶嗶嗶。」哨子聲響起。
眼前嘅美人雙手交叉放在肩膀上，每次做仰臥起坐，胸部有些少晃動，我非常之唔好意思咁(目及)到，因為根據唔記得咩定律，移動中嘅物體會比起靜止中嘅物體更加吸引眼球，咁我就因為唔想畀人當成變態，所以盡量將目光別開。
「12......13......14......15..」我匯報數目中。
「仲有30秒。」Miss說。
時間一分一秒流逝，我見到啊晴越做越慢，根據時間推測演算，我有啲擔心佢唔合格「喂，汪芷晴，你只要考到滿分我就請你食XXX果間鋪頭嘅聖代。」我正在鼓勵她。
咁點解我會清楚啊晴鐘意食聖代呢，事源每次同佢返屋企個陣，次次都會特登經過附近嘅甜品店，佢眼中對玻璃窗裡面啲聖代模型嘅渴望，好似有團火一樣，不過因為太貴，次次都係睇下就算。
「真係㗎，咁我要朱古力聖代。」啊晴說。
「你考滿分先講喇。」我說。
原本每做一下都差唔多要兩秒嘅啊晴，一聽到有聖代食，對眼發曬光咁，身體機能突然上升幾倍，講就咁講，都只不過係快咗少少。
「32......33......34......35......」報數中。
「仲有十秒。」Miss說。
「噢噢噢~」啊晴一邊發出痛苦聲，一邊繼續做落去，為咗杯朱古力聖代啫，使唔使去到咁盡，果然女仔呢種生物，唔可以用常理去衡量，同埋我銀包即將要大出血喇，冷靜少少啊你汪芷晴。
「夠鐘，報數先。」Miss說。
「點吖，點吖，有冇滿分啊，有嘅話我要朱古力聖代。」啊晴大字型躺在軟氈上問道。
「我去報數先。」我交代。
...
「點吖，點吖，幾多下吖。」啊晴走過來望住記錄用嘅分紙，好可惜嘅係學號12嗰位女性－汪芷晴，又真係畀佢啱啱好滿分㗎喎，啊啊啊我銀包啊，奴才我對唔住你吖，要你大出血，我以後一定會好好管住我把死人口，唔會亂落啲咩承諾，辛苦你喇今日。
「喂，就今日放學去食，費時你走數，你都知你㗎喇。」現在立場互換，我係要考體能嗰個，啊晴幫緊我撳住隻腳。
「傻嘅，我似係啲咁嘅人咩。」冇錯，我的確係啲咁嘅人，喺走數呢方面，我咁認第二，冇人夠膽認第一，林梓圓呢條友臉皮已經冇單位可以形容，仲厚過塊鐵板。
不過話時話，有得同靚女一齊去食聖代，未嘗唔係一件好事呀，仲要著住校服，諗起都.....嘿嘿....咳咳咳，好似有啲過火，應該都幾開心嘅，除咗係我畀錢之外呢件事。
「唔係咩。」啊晴帶著疑惑問我。
「唔係，唔係，點會呢。」嗯，對你的確係特別啲嘅，鬼叫我鐘意你咩。
「唔好傾計喇，準備，3....2....1，嗶嗶嗶嗶嗶。」又嚟多次。
男方嘅體能考試相信冇人想睇，幾個字搞掂佢，正常分數，合格多啲。
未完待續..........................