【校園】【愛情】A0毒男的愛情史: 【陸運會－前設】

【作者暫時性復活，現時處於極度不穩定狀態，十年都難出一次文，我盡力出文喇。】

「喂，就嚟陸運會喇喎，你諗住報咩項目吖。」啊晴道。

「有咩報吖。」陸運會啊，諗翻起我升到中學呢三年，次次都冇報名，每次匿埋喺觀眾席睇書、打機、瞓教，更嚴重嘅係，我仲帶埋枕頭同被過去，簡直目中無人。

「好多喎，田項就有800米，400米，200米，100米，仲有100米跨欄，擲項有鉛球、鐵餅。」啊晴道。

「咁啊晴你呢，你打算報咩吖。」我將話題移開。



「我吖，應該400米同100米掛。」啊晴道。

「咁你加油。」我拎翻起住本書名叫【人渣】嘅書繼續睇。

「喂，唔好扯開話題住，咁你報咩項目吖，同埋點解我好似冇見過你跑步咁嘅。」啊晴道。

Bingo！汪小姐，你唔係好似冇見過，係根本冇見過，原因好簡單，冇報名邊有得跑，但基於中學生嘅自尊，我係絕對唔會咁答「你記錯咋。」

「我印象中真係冇呢回事。」啊晴又道「咁就一起上去七樓報名先啦，聽日就截止喇。」



「點解個劇情會向呢方面發展。」我歎氣。

「咩劇情，你講咩。」

「冇事，冇事，當我冇講過。」 我放低手上本【人渣】跟隨著啊晴的步伐。

...

過程就係上七樓揾啊Miss報名，求其傾兩句，而兩句傾咗我成個小息，大致就係miss對於我參加倍感驚訝，係咁同我講人生大道理，然後又嚟到咗美妙嘅lunch time。



我依舊揾翻兄弟二人組出發，同埋順便講下我被迫參加陸運會呢件事。

「三人行，必有我師焉，兩位，我又重大事件要宣佈。」我扮到好嚴重咁款。

「講你就講喇，買咩關子。」Force說。

「聽過先。」Andy說。

「我嚟緊要參加陸！運！會！」我將陸運會呢三隻字大聲大聲咁讀出嚟。

「哦，加油。」Andy說。

「諗好食咩未。」Force說。

「喂喂喂，個反應唔應該係咁㗎喎，咁冷淡嘅。」我震驚。



「你想有咩反應。」Force說。

「唔係應該好驚訝㗎咩，話曬我咁多年都冇參加過。」

「妖，睇你個死樣都係為咗汪芷晴參加㗎喇，扮乜鬼啫。」Andy說。

「唉，女嘅威力，你變咗喇jim。」Force說。

「我.....」我無言而對，的確我係為咗啊晴先參加啫，但都唔使被人踩得一文不值吖。

「咁你參加咩項目。」Force問。

終於！終於，呢啲先係我想要嘅問題，終於出現咗「我報咗800米，400米同100米欄。」



「咁你開始練未。」Andy問。

好問題，如果計算翻我每日跑翻學校條600米路程，我應該每日都係度訓練中「我屋企跑返學校條路算唔算訓練。」我說。

「都唔可以話唔得嘅，但係如果你真係想贏冠軍，建議你去運動場跑下。」Andy說。

「同埋100欄真係要練過先得，你自己偷偷地去田徑隊練下啦，又或者你想跌到啊媽都唔認得。」Andy再說。

「係喎，如果要去田徑嘅，你去揾Sherman咪得囉，話曬都係學校風雲人物，田徑之光。」Force說。

「多謝曬兩位嘅建議，期待我拎個冠軍翻嚟啦。」我說。

「冇諗過你會贏。」Andy有話直說。

「同上，你唔拎包尾就當自己贏啦。」Force說。



「哈，食屎啦兩位。」我面帶微笑地說。

竟然睇死我輸？就等你哋睇下咩叫中學生嘅自尊心，同埋毒撚永不言棄嘅精神，我嘅秘密訓練即將開始，我一定會贏個冠軍翻嚟㗎喇，而個冠軍係為咗邊個，就等各位自行腦補喇。

未完待續.............