【校園】【愛情】A0毒男的愛情史: 【不歸路】

「阿圓你仲喺學校嘅。」當完值嘅啊晴發現咗我攤喺學校嘅有蓋操場同曉彤姐吹緊水，我就喺度講點解我咁鐘意啊晴，不過好彩佢冇聽到。

阿圓？阿乜嘢圓，聽落奇奇怪怪，不過如果係出自你把口，講句早晨都特別好聽，不過呢個唔係重點，重點係依家需要揾返個具邏輯性、合理性、又可以瞞天過海嘅謊言解釋點解我仲係學校嘅原因。

我即刻彈起身「Er……我……」死，仲未諗到。

「啊晴你又喺度嘅？」曉彤姐跳出嚟救場。

「今日要上圖書館當值啊嘛。」啊晴笑道。



「原來係咁……真係乖㗎啫。」曉彤姐笑道。

「唓……笑人嘅。」女仔們嘅互動真係好睇。

「咁我都唔阻你兩個，我去執埋啲器材佢，小倆口一齊返屋企啦，哈哈。」一個知曉秘密嘅人講出嚟，好似帶刺咁，不過我就聽得幾爽，畢竟係曉彤姐送畀我嘅助攻，我會好好珍惜㗎喇。









「一齊返去囉？我拎埋啲嘢。」我說。

「好啊……」我聽得出啊晴疲勞值偏高。

我：「我頭先去咗試下田徑隊嘅訓練，試完之後都係覺得唔適合我，太攰人。」

晴：「係咩。」



弊傢伙！我係咪講錯啲咩？覆得咁hea嘅。

我：「咁啊晴你呢，你當值又做咗啲咩嚟。」

晴：「睇書，登下記，幫人借書嗰啲囉。」

我：「喔……咁都幾悶下……」死喇！點解個氣氛怪怪地嘅？平時啊晴唔係好多嘢講㗎咩？做乜無端端變到沉默寡言，呢種感覺好唔舒服。

歸家條路行到七、八成個陣，我先夠膽開口問：「啊晴你係咪唔開心？」

啊晴佢停下腳步，充滿疲態的水汪汪眼睛注視著我「其實我有少少嬲緊你。」

Critical！重擊！傷害x^n次方，我個心入面突然被舊大石頭以時速180公里衝擊，嬲……嬲緊我……？

我：「吓……點……點解嘅。」完全唔明。



晴：「我問你，妳書包掛住呢兩支嘢咩嚟。」

我：「拐……拐杖囉。」

晴：「你都識講呢，咁你頭先做咗啲咩嚟。」

我：「…」已經唔好意思講出嚟。

晴：「我知陸運會好重要，但係你傷咗點算，你今朝都要靠拐杖先返到嚟學校，轉個頭放學就練跑，你有冇諗過自己同身邊人嘅感受。」

我：「對唔住……」已經唔知仲可以講咩。

晴：「咁你應承我，呢幾日好好休息，放學唔准再跟田徑隊練跑，好唔好。」



我：「好，冇問題。」咁我陸運會點算好……

我：「但係點解你咁關心我嘅？」年幼無知嘅我問。

晴：「咁我……我之前應承咗你媽咪要好好睇住你㗎嘛。」

我：「你可以無視阿媽佢㗎。」

晴：「你唔好理咁多，總之應承咗就係應承咗，我從來都唔會反口。」









返到屋企。

我即刻WhatsApp曉彤姐，講返我畀人落咗禁制令，問佢點算好。

彤：「挑，唔畀跟田徑練啫，冇話唔畀返學個陣練同埋喺屋企練㗎。」－17:58

我：「喺屋企可以練到乜嘢。」－17:58

彤：「大把嘢可以練，睇你有冇決心。」－17:59

我：「決心呢啲嘢，你知㗎。」－17:59

彤：「咁你繼續拉下筋先，我轉頭send個power point畀你，自己跟住上面嘅嘢練。」－17:59



我：「多謝曉彤姐嘅恩惠。」－17:59

彤：「想多謝我，自己識得做啦。」－18:00

我：「得啦，贏曬所有項目佢啊嘛，仲有趕走啊晴身邊啲狗公，雖然冇咩可能，不過我會盡力而為。」－18:00

晚飯期間，我同阿媽兩個人撐枱腳。

「叮！叮！」手機傳來信息聲。

我打開power point。

「呵呵呵呵呵呵」我發出恐怖陰森嘅苦笑聲，係阿曉彤姐幫我諗嘅訓練計劃，我由頭睇到落尾，不愧為魔鬼教練，計劃都可以恐怖過人。

「喂喂喂，你唔好無端端笑成咁啦，撞鬼咩，係咪想嚇死你阿媽我呀。」阿媽說。

「係啊，轉頭我真係要撞鬼喇阿媽，仲要係鬼中之王，撒旦本人啊。」我看著極為可怕的訓練清單。

「啋過你把口，食完就同我洗埋啲碗佢。」阿媽食完就返咗房。

洗完碗，消化完嘅我，望住手機上面嘅地獄式訓練清單。

心中只剩下一個諗法「今晚，死得！」

未完待續…………