【校園】【愛情】A0毒男的愛情史: 【魔鬼教練－陳曉彤】
手機鬧鐘顯示著07：30。
晨光又從窗縫中偷偷進來映照在我臉上。
我剛睡醒，像躺在棺材一樣，雙手合十放在肚子上，面朝天花板，雙腿感覺不是自己的。
我……我……動彈不得…………
腹部和腿部的肌肉痛得要死。
我無奈苦笑，今日還要上學，我到底在幹嘛。
「仲唔起身？」阿媽說。
「我全身都肌肉酸痛……」我說。
「咪叫咗你做多啲運動，平時淨係識得喺屋企打機，無端端做咁激烈嘅運動，梗係會咁啦。」阿媽接著又說：「咁你返唔返學，唔返我要打電話去校務處請假。」
「我都唔知自己返唔返到。」我說。
「你自己判斷啦，早餐喺廳到，我返工喇。」阿媽說罷便轉身離開了。
…………
學校。
「同學，你搞咩嚟。」校務處職員問我。
我拿著醫療康復用的腋下拐杖，一步一步艱辛走回來校園。
「跑步整親。」我苦笑。
「咁你去搭(車立)記得唔好行樓梯啦。」
我填寫好遲到記錄紙，乘搭電梯回到班房，路中還受到老師們愕然的目光，令我感到非常羞恥。
「咯咯咯。」敲門聲。
我打開班房門口，全班的目光落在我身上。
「早晨啊各位，未見過傷殘人士咩？」我說。
「~~~」一片寂靜。
「返埋位坐低上堂。」先生說。
「放咗一日假，做咩無端端多咗兩支拐杖。」啊晴指著我手上的拐杖問。
「琴日去咗地府見閻羅王。」我說。
「閻羅王？」
「比喻嚟啫，琴日做運動整親。」
「小心啲喇，就快陸運會喇，整親跑唔到㗎喇，你仲參加咗咁多項目。」
轉堂。
曉彤姐走近我身旁。
先以不屑的眼神看了我一眼，
那眼神仿佛就是在說：「就這點垃圾練習量，還需要用到醫療拐杖？」
「喂，廢人你唔好再浮誇啲。」曉彤說。
「阿曉彤姐，我今朝真係痛到床都落唔到，冇佢我連學都返唔到。」我說。
「咁係咪諗住放棄。」曉彤說。
「唔會，今日放學繼續。」我說。
「咁先似樣，記住你琴日講過嘅嘢。」
啊晴上完廁所回來，見到我同曉彤姐交談完。
「你哋傾緊咩啊頭先？」啊晴問。
「佢追我功課啫。」抱歉了，我真的不能說實話，畢竟你一定會阻止我。
之後就是極度無聊的上學生活，玩咗七個鐘上學遊戲，終於輪到放學的時候。
晴：「我今日都要上圖書館當值，你自己返去先啦。」
我：「咁你唔好再漏鎖匙喺個locker度，轉頭又多咗個無家可歸嘅14歲少女喺街邊流連， 遲啲畀人影相報上新聞就唔好啦。」
晴：「唔好笑我啦，上次屋企冇人啫。」
我：「好，唔講笑，我做埋幾呢條數就走，你當值加油啦。」
晴：「嗯，加油啦，記住今日我教你嗰啲一元二次方程，統測一定會出㗎。」
我：「知喇，汪Miss，一定銘記於心。」
啊晴走後，我拿拿林搞掂埋嗰幾條垃圾數，偷偷去咗田徑隊揾曉彤姐。
彤：「終於嚟喇咩，仲諗住你個廢人嫌辛苦， 晨早返咗屋企添。」
我：「唔好笑我啦曉彤姐，我係廢人啫，但對某啲事都好放上心㗎。」
彤：「得喇，知你專一喇，你個沉迷喺啊晴船嘅死傻仔，都唔知應該話你聰明定蠢好。」
我：「唔緊要啦，追女神啫，我有咁好嘅先天環境優勢(假拍拖)，話唔定成功機會會大大上升咗呢。」
彤：「你鐘意啦，總之你咁膽死傷啊晴心，我會令你體驗下比落地獄更痛苦嘅痛楚。」
我：「咁恐怖，睇嚟前路難關非常多啊。」
彤：「你估追女神好簡單啊，跑圈熱身啦，咁多廢話。」
我：「係嘅係嘅，知道陳教練。」
喺課室坐咗成六、七個幾鐘，對腳都冇咁痛，簡單跑下跳下都仲得。
但……但係……曉彤姐你係同我有血海大仇？啲人哋唔知情仲以為我殺咗你老豆。
呢個惡魔教練要我講咗堆我完全聽唔明嘅嘢……咩法特雷克跑……間歇訓練。前者好似係為咗提高有氧能力同體能，後者就係增加肌肉耐力，之後又講咗堆咩跑步嘅姿勢，呼吸方法(嗰陣仲以為係jojo嘅波紋疾走)，總之聽到我一頭霧水。
「唔得喇……真係要死喇教練……我對腳……琴日嘅疲勞我仲未恢復番好曬……」我雙手撳住膝頭，隻腳不斷發抖，呼吸開始有啲困難。
彤：「仲爭最後一組咋喎，做完先休息啦。」
我：「唔係我唔想做，係我對腳唔畀我做。」
彤：「咁睇嚟係我高估咗你追女神嘅決心，你鍾意唔練就唔練喇，嘥我時間。」
我深吸一口氣，再全數呼出，再深吸一口。
我：「練，最後一組啫，驚你有牙啊。」
唔知發生咩事，身體好似輕鬆咗少少， 頂硬上做埋最後一round，之後坐喺長凳隔離休息。
彤：「知唔知點解我見你攰到阿媽都唔認得，都要叫你繼續。」
我：「唔知，我淨係知你係個魔鬼教練。」
彤：「哈哈，我幾鍾意呢個稱呼，講返正題，我係要你體驗【極點】，你呢啲訓練不足體能又差嘅人， 通常練一陣就會雙腳發軟、全身冇力同埋呼吸困難。」
我：「咁你仲要我練，一陣死咗點算。」
彤：「放心，極點唔會死人，你頭先練最後一組嗰陣有冇覺得輕鬆咗。」
我：「有少少， 跑嗰陣好似冇咁攰。」
彤：「呢啲叫第二次呼吸，你跑800米嗰陣一定會遇到極點，不過呢啲好講運氣同意識，唔係每個人遇到極點之後，都可以即刻進行第二次呼吸。」
我：「咁有冇方法可以即刻試到你講嘅第二次呼吸。」
彤：「每個人堅持嘅嘢都唔同，就好似頭先咁，你係為咗咩先會有第二次呼吸呀？」
我：「啊…晴…」
彤：「呢個就係你嘅堅持，好好記住頭先嗰種感覺。」她一拳打在我心口上。
我：「多謝教練。」
彤：「拉筋啦，賣口乖都冇用呀，地獄訓練仲會繼續。」
我：「收到收到。」會心一笑，其實陳曉彤這人都不是太差吧。
未完待續…………