一個普通的愛情故事: 1.旺角街頭的重逢

「喂，好耐冇見，最近點？」

呢一句噓寒問暖成為咗我同兩年冇見嘅前任阿欣重逢後嘅第一句話

我叫阿賢，00後，今年year 2，性格內向，普通毒撚一個，日常興趣係上連登開膠Po，扮下假膠
眼前呢位五官端正嘅女仔係我前任阿欣，佢年齡同我一樣，但係我地嘅性格真係天淵之別，阿欣係一個外向嘅人，基本上所有人佢都可以傾得埋

「幾好啊，你呢？有新女朋友未？」

OMG!!!阿欣竟然問咗我最驚嘅問題，如果我答冇阿欣會覺得我仲係咁毒，但係如果我答有阿欣又可能覺得我move on得太快，呢一刻我小毒毒嘅內心非常掙扎，唉算啦，做人都係誠實啲好


「冇啊，仲係單身，你而家有冇拖拍？」

阿欣個樣呆一呆之後答「有啊，我今日出旺角就係陪我男朋友睇戲，佢去咗廁所，好快就返嚟」

仆街，聽到之後我個心沉咗一下，欲哭無淚，雖然已經分咗手兩年，但我對阿欣唔多唔少仲有啲留戀，我仲未嚟得切回過神突然聽到把男人聲講「bb我去完啦，呢位係？」

阿欣尷尷尬尬咁答係一個好耐冇見嘅朋友，之後我地寒暄咗幾句，佢哋就拖住手走咗

望住佢地離去嘅背影，我內心百感交集，有開心嘅，因為見到阿欣好似過得幾好，但都有少少唔開心



佢地走咗之後我都繼續我嘅行程，就係同我好朋友阿康去信和買玩具

阿康係我中一第一日已經識嘅好朋友，佢全名係楊康，冇錯係同金庸小說裡面嘅楊康一樣名，但係阿康唔係奸嘅，我地嘅共同興趣係都鍾意睇金庸小說

「到邊？人呢？ching你遲咗一個鐘喎」

「對唔住有急事嚟唔到！」

就係咁我俾阿康放咗飛機，呢一刻嘅我已經喺旺角站E出口等咗阿康一個鐘，最後失落嘅我決定返屋企算