我嘅初戀: 我同佢之間嘅距離

我同佢不知不覺間傾左3日了，佢都覆得我好快，大家都會傾下學業、屋企等等。當大家都講緊依家上zoom好方便，唔洗特登翻campus上堂，佢於是就問起：「係呢Michelle，你住邊㗎？」我就答佢我住藍田，而佢就答自己住屯門。

當我聽到屯門嘅時候，我就即刻覆：「屯門好遠啊，我咁大個女都未入過天水圍同屯門，因為交通超級唔方便，都唔知有咩車可以入去。」
「最近咪開通左屯馬線咯！你冇聽果首歌咩？屯馬～開通～真的很～興奮～」佢無啦啦打左句歌詞出黎，搞到我成個腦都係果首歌😂😂😂 我之後覆佢：「屯門入面有咩玩㗎？我真係好少搭到去大西北，以前聽人話天水圍係悲情城市，成日有空中飛人事件，同埋覺得果邊都好似上水咁，成日有好多水貨客黎香港（雖然依家疫情佢哋落唔到黎）所以一次都冇去過。」於是佢就介紹左好多屯門好有特色嘅地方比我，例如有農場可以親親大自然，不過我最唔鍾意行山，佢同我講呢啲 我一啲興趣都冇😂 不過都多謝佢令我認識左屯門嘅。我都有同佢介紹藍田有咩好玩（=冇嘢好玩），所以通常去街都係去旺角/尖沙嘴多。

當我奇怪，乜藍田同屯門兩個地方感遠都可以match到嘅時候，我去翻佢嘅介面，睇到嘅距離都真係好遠（好似23km？唔記得了），然後再睇嘅歲數... 18???
乜佢得18歲咋咩？我點解會swipe到個細過自己年齡嘅男仔？我明明第一時間就係睇歲數先㗎喔（我唔鍾意弟弟/26以上嘅男仔😂覺得弟弟好難傾到計，佢哋思想好唔同 / 26歲嘅人因為都已經翻工了，思想又係好唔同，最好就搵翻同自己差唔多年紀嘅人傾計，會舒服啲）。

當睇到個年紀之後，我即刻問佢：「等陣先？？？你今年得18歲？」佢冇即刻覆我。



過左陣，佢覆我：「唔係啊，我今年20㗎啦，過埋生日就21歲，我啱啱用呢個app，年齡果度我打錯左咋，點知冇得改，因為我想年年18歲啊嘛 哈哈。」我即刻問一句：「乜年齡都會打錯㗎咩？你真係得18？」佢都係答翻同一個答案。不過算啦，我地暫是都係網友，又未係好熟，就信住佢講先，不過亦都令我開始對佢有疑心。