我嘅初戀: 約不約？

又過左唔知幾耐（好似個幾禮拜），我地都好似平時咁傾計，其實都幾悶，但我又唔想唔同佢傾，因為對佢都開始有好奇心，想更加了解呢個人。

呢一晚我同佢分享自己做過嘅義工經驗：我曾經去過大陸做義教、又好鍾意小動物，所以都會去做狗狗義工，我同佢講，呢啲活動雖然冇錢，但我好鍾意見到小動物 / 小朋友好開心嘅笑容，自己好大滿足感。

聽到呢度，Gorden覆左我一句：「Michelle你真係好善良，好有愛心，好少人會好似你咁鍾意小動物/小朋友，就算用左你私人時間，你都會照顧佢哋。你咁識照顧人，邊個做你男朋友就幸福啦。」

哇！？佢咁拋直線球，好難接喔。不過我都認自己好有愛心，但聽到其他人咁講我，我都會有少少唔知點算嘅，不過我都搵個機會讚下佢先：「唔係啊， Gorden你都好有愛心㗎，你會成日去捐血，每捐一次血，就救到一個人嘅生命啊嘛，你仲有愛心過我啦！我真係唔夠膽捐血。」

可能見到唔知可以點覆，佢直接開第二個話題：「Michelle，你嘅理想型係點㗎？」



今次係佢第二次問我呢個問題啦，我唔可以再唔覆，如果唔覆嘅話，可能佢會覺得我曬緊佢時間，或者對佢冇興趣，咁大家傾左咁耐計就浪費曬啲時間。於是我就答佢：「其實我嘅理想型成日變㗎，最緊要最緊要唔好悶！對住女仔唔可以怕羞！男仔點都要主動少少架嘛。最好就同我一樣，咁鍾意小動物同小朋友。不過我唔識煮嘢食，最多都係煮個麵食架咋，如果男朋友識煮嘢食嘅話就好，因為我好鍾意食嘢。」利申自己唔係港女（應該），我咩都食，平時真係鍾意食屋企人煮嘅飯，同朋友去街，食三哥我已經覺得好足夠了，自己又唔大食，三哥小米我都食唔曬，所以餵飽我其實好容易。

講左比Gorden知我嘅理想型之後，佢即刻覆：「我識煮嘢食啊，平時會係屋企煎下羊架，屋企人都話好好味。」煎羊架咁勁！？我平時食開番茄炒蛋咋喔，咁高級嘅嘢唔太啱我食，不過點都要覆一句：「唔知我有冇機會食到你煎嘅羊架呢？」喂Michelle你搞咩？？做咩突然咁直接咁講呢句說話？自己打完之後都覺得怕羞，想del左個msg佢。

不過佢見到個msg，我del唔切了。

佢即刻問左句：「好啊， 下個禮拜一得唔得閒？我地可以約一次出黎先啊。」