[校園][純愛]《身旁的那一個》: 第四十六章

我哋去到五六點就走咗

總結下我哋今日做咗咩啦，

基本上睇劇場同埋喺禮品店時間最長

而且喺禮品店嗰度我有買咗樣嘢，

係咩呢就唔講住





賣下關子先

過山車(我唔記得咗咩名呀)都玩咗兩次

環境好黑嗰個

咖啡杯都有玩，

終於可以近距離欣賞下愷晴個靚樣





同埋今日嘅佢其實都幾活潑

同喺學校個形象有啲唔同，

咁我都明嘅

出嚟玩同埋喺學校讀書，

根本係兩個環境





心情都唔同啦，

起碼今日會見到佢講嘢大聲咗

笑得燦爛咗

其實仲去咗唔少地方嘅，

不過真係數唔晒呀

見諒我唔可以一一盡錄

當然唔少得影相啦，

同卡通人物影比較多





我呢啲毒撚始終都唔係好鍾意影相，

所以我經常都係負責揸機

影佢同埋卡通人物，

我同佢嘅合照可能十零張左右啩

入去嗰陣走嗰陣各自一張，

卡通人物嗰度一兩張

見到個景靚又影咗啲





大致上係咁啦，

原本話想睇埋煙花先走

後尾話等唔到咁耐，

我同佢又唔係好緊張煙花呢個環節

所以五六點就走咗，

一上車佢就同我講咗一樣好驚嚇嘅嘢

愷晴:「你部相機係咪嵐嵐㗎」

講真我都唔係特登隱瞞





佢冇問嘅話梗係唔講，

又唔係啲咩特別嘢

依家既然佢發現咗，

咁就梗係和盤托出

我:「咁你都知嘅」

愷晴:「我同佢平時有出街嘅，

學校嗰啲活動嚟講





上次旅行佢都有帶相機

所以我都見過佢部相機甚至影過相」

我:「其實件事係咁嘅，

我用開嗰部爛咗

咁啱我尋日先醒起

去迪士尼梗係要部相機，

所以咪問佢借囉

咁啱你夜晚就問我有冇」

至於我點解唔講同佢去海洋公園，

唔係因為嗰次冇預佢

而係同去海洋公園嘅起因有關

係嵐嵐專登同我講愷晴遲啲會約我去迪士尼

冇咁鍾意去海洋公園，

又叫咗我自己知就算唔好周圍講

既然係咁嘅話，

如果我同愷晴講我同嵐嵐去海洋公園，

問多兩問就穿煲啦

揚開咗以後我就冇呢啲秘密嘢聽

所以就冇講到囉.


愷晴:「其實嵐嵐真係好好人㗎

有啲嘢唔知點同你講，

佢平時講你話你呢都係講笑㗎咋」

我:「咁我都知

我feel到佢真心鬧我嘅話，

咁我就唔會同佢keep contact啦」

愷晴:「講樣嘢畀你聽丫.

我:「請分享」

愷晴:「其實我今日約你之前呢我問過佢㗎」

我:「問啲咩」

我呢個人冇嘢叻，

詐傻扮懵就有返咁上下

愷晴:「我驚你唔鍾意

所以咪問佢囉」

我:「咁點解唔問我呢」

愷晴:「怕醜呀嘛

所以咪問佢囉」

我:「唔緊要喎下次你問我咪得

對住我有咩好怕醜」

愷晴:「嵐嵐真係講得冇錯

東仔你真係咁.」

我:「做咩呀」

愷晴:「有機會同你講」

我:「又吊癮」

呢件事原本我係唔記得，

係後來佢同我講返，

佢呢句說話係咩意思嗰陣

我先至醒返起佢嗰日

原來有咁樣講過

不過對比返故事個時間都好耐嚕

現階段唔講住先，

到我吊你哋癮

之後我哋沿著東涌綫

喺奧運站落車，

再去奧海城食嘢

玩咗成日大家都攰喇，

冇乜點特別行街，

食完就返屋企啦

咁當然啦今次我都會送佢返屋企，

呢啲時候梗係要表現一下gentleman

愷晴:「多謝你呀東仔玩得好開心

下次再去第二度玩啦」

我:「好

拜拜」

送完佢返屋企呢，

呢個時候我就梗係有下場

唔好亂諗，

我所謂嘅下場喺故事入面有提及嘅，

都係還返啲嘢畀人啫.