[校園][純愛]《身旁的那一個》: 第五十五章

跟住落嚟就發生咗一件好奇怪嘅事

其實唔係好奇怪嘅，

係我懶係野咁講啫

話說距離天才表演前三四日左右，

咁我同嵐嵐如常喺度排緊啦





大家夾緊對白，

之後miss無啦啦衝咗落嚟我哋間房

係呀，

嗰間房呢平時得我同嵐嵐兩個，

大家唔好諗衰嘢喇





冇你哋諗嗰啲嘢發生

我哋真係好認真夾緊，

同埋我同佢有個特點好似

都係唔會喺屋企以外地方瞓

至少我未見過佢瞓啦，





所以唔存在典型青春劇嗰啲情節，

有個學生妹趴咗喺度瞓得好靚

跟住個男仔喺度望住熟睡中嘅女仔

講返正題先，

miss衝落嚟講咩呢

原來就係話有位參賽者比賽項目有啲改動

咁啱嗰個就係籃球佬

Miss:「Oliver要改歌」





嵐嵐:「下佢改咩」

Miss:「永久保存呀

啱啱收到消息咪同你兩個講

執生呀」

話說Oliver原本好似係唱側田嗰首Kong

依家無啦啦變咗陳柏宇永久保存

個時間點咁啱又係嗰日食完飯之後，





畫公仔唔使畫出腸啦

miss走咗之後，

我就同嵐嵐講

我:「人哋收到晒嗰日你講嘅嘢呀」

嵐嵐:「我嗰日唔係咁嘅意思喎」

我:「你唔係咁嘅意思啫

聽嗰個唔係咁解讀呀嘛」

嵐嵐:「好嘢有得聽」





我:「佢好明顯揀過㗎啦

咁多首都唔揀係要呢首，

我的眼中只有你呀」

嵐嵐:「頂你唔好唱到咁姣」

我:「你唔應該同我講

你應該同佢講，

佢擺明就係借比賽訴心聲」





嵐嵐:「你會唔會諗多咗呀」

我:「你會唔會諗少咗丫」

嵐嵐:「我就冇理邊個唱，

有得聽就正」

嗰日我哋繼續喺度排啦

跟住籃球佬無啦啦又過咗嚟

籃球佬:「miss有冇通知你兩個

我改咗歌」

我:「你的眼中只有佢丫嘛

我哋知道呀」

嵐嵐:「又畀你諗到啱音㗎喎」

我:「屌你真係當我流」

嵐嵐:「咁叻你又唔唱」

我:「難聽囉

同埋冇人哋咁有心思」

嵐嵐:「唔係喎我覺得好好聽喎東爺」

我:「怕醜豬呀」

嵐嵐:「收皮啦好核突呀」

籃球佬:「sorry sorry你哋知㗎嘛」

唔好意思我哋冇理到佢

嵐嵐:「知道呀

加油啦Oliver」

我:「加油」

籃球佬:「咁好啦拜拜」

跟住佢就走咗.


卒之去到天才表演嗰日，

我心諗正呀終於唔使再返去排練

不過嗰日我同嵐嵐都要早啲返去準備

咁我哋就早咗出嚟順便食埋早餐

食食下佢同我講，

嵐嵐:「喂

呢次好似係我喺學校做嘅第一個show

估唔到有你拍住」

我:「其實我都好似係」

嵐嵐:「老實講係有啲驚有啲緊張

心理質素冇我哋嘅東哥咁好」

我:「唔係掛

女神都會驚」

嵐嵐:「我不嬲都唔係咩女神」

我:「我係咪真係唔緊張唔驚又唔敢講

不過算啦反正上到去都係鳩噏

冇呀我都係當我自己上到去亂噏廿四

好似平時present咁樣」

嵐嵐:「present少人咁多」

我:「咁都係

屌到時你驚嘅話咪望住我

你望下面咁多對眼呀，

就梗係驚啦」

嵐嵐:「電親我點算呀你咁有魅力」

我:「冇辦法㗎喎咁肯定係㗎喇」

嵐嵐:「你都好嘢咁都夠膽認」

我:「痴線有咩唔夠膽啫

冇自信食得屎啦係咪先」

嵐嵐:「咁好啦我上到去就眼甘甘望住你」

我:「真係㗎

望住下面有時咁多對眼，

你一時唔覺意講錯嘢跟住就會好驚好緊張

望住咁靚仔嘅我算啦」

嵐嵐:「多謝晒你喎」

我:「唔使多謝

走啦返去啦.」

嵐嵐:「好」

有樣嘢我冇同佢講，

其實我都好慶幸有佢喺我隔離

如果我嘅拍檔唔係一個咁friend嘅人，

我都唔敢講我會唔會怯場

始終大家唔熟嘅話，

有啲位唔知佢會點接

講嘢就住就住咁，

排緊嗰陣又驚尷尬

依家好彩有佢，

呢個就係我唔驚唔緊張個原因.