[校園][純愛]《身旁的那一個》: 第八十九章

考完oral之後

離開咗學校搭巴士返屋企嗰陣，

我就同返愷晴講咩事

因為頭先嘅情況實在太緊急，

所以就等到依家先講





跟住佢知我喺街，

就問可唔可以傾陣電話

我:「嘩頭先嘅情況真係好危險」

愷晴:「做咩事呀」

於是我就照直講啦





今時今日嘅我，

如果發生同樣事件，

我就肯定唔會交代得咁詳細

不過嗰陣真係唔係唔識

我唔知禍從口出原來係可以覆蓋咁多樣嘢





當我講晒成件事之後，

愷晴第一個反應就係

愷晴:「做乜頭先你唔搵我幫你」

我:「唔想你咁辛苦咁操勞呀嘛

唔想打擾到你個鳳體」

愷晴:「我認真呀東仔

點解呀」

我:「我都係認真呀」





愷晴:「我係你女朋友呀

有咩事我幫你都好正常

我:「唔係呀頭先個情況咁緊急

我又唔肯定你識唔識嗰邊啲路，

咁我咪冇搵你囉

就係咁咋嘛」

愷晴:「咁你又知嵐嵐識嘅」





我:「咁我不嬲都知佢識路ok呀嘛」

愷晴:「咁好啦」

跟住我哋就繼續講電話，

我feel到佢又唔係嬲得好緊要

不過反應就冇頭先咁好，

你啲女仔㗎啦好鍾意咁㗎嘛

唔高興嗰陣就嬲爆爆㗎啦

問佢咩就話冇呀





係咪嬲佢就會話冇嬲喎，

唉咁我費事當面話佢乜乜喇

我呢啲人就真係好懦夫

對住伴侶又或者係啲重要嘅朋友，

不嬲都唔會發脾氣

只係我嗰陣心諗，

點解佢個重點擺咗喺呢個位





我問心，

搵嵐嵐嘅原因，

頭先我所講嘅說話已經解釋晒

嗰陣嘅我真係入世未深，

完全唔明點解愷晴會有呢個反應

真係唔認為自己喺呢件事上面，

有做錯啲乜，

佢要嬲都有佢喇

最多下次唔講嘅啫.

我成日都講，

其實好多人對於關係嘅變化

真係好敏感，

特別嗰個人如果同自己相處得耐嘅話，

就更加容易察覺到

自從我同愷晴發生咗呢單嘢之後，

我feel到我同佢冇之前咁close

你哋知啦，

我同佢會keep住係咁WhatsApp㗎嘛

就連我呢個咁鍾意鳩噏嘅人，

有時都諗到冇嘢好講

講真嗰句，

我都有啲辛苦

唔覆佢就問你點解唔覆，

覆又好似冇乜嘢講

可能你哋會話，

咁辛苦咪唔好講囉

連登仔成日都講，

感情問題一律建議分手

咁咪得囉，

我嗰陣的確係拖泥帶水

因為我同佢仲有排見，

假設大家會考個成績正常

朋友圈子又差唔多，

因為呢啲原因

所以我盡量唔想同佢搞到咁薑

佢嬲咗我就氹佢，

邊個啱邊個唔啱都好啦

我拍拖就好少理呢樣嘢

事實上佢唔係成日嬲嘅

我講出嚟都係一兩次啫，

唔係特登講咁少，

而係呢個次數係千真萬確

佢好多時都好包容嘅

之但係分手好難唔薑㗎嘛

搞到大家面阻阻又尷尬我就最唔想，

所以嗰排我都諗緊方法修補我哋嘅關係

我唔好講人前喇，

淨係講大家相處嗰陣

咁每個人都想大家相處得開開心心

舒舒服服㗎嘛

不過有時係我諗得太理想，

點解咁講

因為我哋考埋英文口試之後，

你當係六月尾七月頭到啦，

繼年頭嘗試過第一次拍拖，

我再經歷多一個人生課程

我依家諗返起，

拍拖真係好多嘢要學

第一次好多嘢都唔識處理.