[校園][純愛]《身旁的那一個》: 第九十章

我好記得考完口試之後

愷晴有日特登打畀我，

佢話想約出嚟見面好唔好

我嗰陣以為正常出街啫

咁咪好囉係咪先





老實講嗰陣我有啲掙扎

因為我驚出到嚟之後，

我同佢都會好似最近咁冇乜嘢講

希望係我心多啦，

話說嗰排我冇同嵐嵐講過呢件事





因為我知佢差唔多會走，

大把嘢要準備

佢都應該周身唔得閒

既然係咁，

我就費事喺呢個時候再煩佢喇





所以我同愷晴最近個關係出現咗變化

佢係完全唔知嘅

咁冇嘢喇之後我就同愷晴出嚟行街，

嗰日個行程基本上同平時冇分別

都係喺商場行下，

佢又冇話想買嘢

淨係想出嚟行，

除非我有嘢做啦，





如果唔係呢方面我就冇意見嘅

畀晒佢話事，

之後佢話不如睇場戲食埋餐飯

夜啲返屋企好唔好，

你知啦，

女朋友嘅問題唔可以答唔好㗎嘛

事實上嗰日我係冇嘢做





咁嘅話梗係畀晒啲時間佢啦，

始終我好多時都有嘢做

唔係每日都咁得閒出嚟，

既然依家搞掂晒啲嘢

我都想陪多啲佢，

於是就同佢講好呀

你想點就點，

睇咩戲就真係唔記得咗喇





食埋餐飯行多陣就返屋企

照舊啦都係我送佢返去，

點知去到佢屋苑樓下，

我哋準備攬嗰陣

佢突然間同我講咗啲嘢.


愷晴:「東仔，

我哋拍咗拖都差唔多半年」





我:「係呀，

我哋一月開始嘅」

愷晴:「你好奇怪

你份人平時咁八卦

不過對住我，

你又好少問我好多嘢」

我:「咁梗係啦你係女朋友丫嘛

唔係出面嗰啲阿豬阿狗，

咁梗係要尊重你啦」

愷晴:「有好多嘢好多男仔都會問，

你又從來都冇喎」

我:「即係咩」

愷晴:「其實你係我初戀

不過我見你好似冇問，

所以我一路都冇講」

我:「我自己不嬲唔介意呢啲嘢啫

係唔係初戀或者之前拍過幾多次拖，

我唔係好介懷

最緊要依家喺你隔離嗰個係我

咁就得啦」

愷晴:「好多男仔都會問㗎

不過識你咁耐你又冇問過呢啲嘢

初頭我以為你對我冇興趣」

我:「其實我一早覺得你幾靚

你唔信問下鍾小姐呀」

愷晴:「其實我哋喺埋一齊，

真係多得嵐嵐」

我:「點解咁講呢」

我嗰陣心諗，

唔通嵐嵐同愷晴講晒，

佢自己係我軍師呢回事

嗰陣我喺心入面鬧緊佢條友冇義氣

明明佢話得我同佢兩個知，

轉個頭就去同愷晴篤灰

好彩，

接住落嚟聽愷晴佢講，

我就知我怪錯咗好人

愷晴:「其實我成日都有問嵐嵐

一啲關於你嘅嘢，

我同你一齊之前我都好坦誠同佢講過

我係鍾意你」

嗰陣我就如夢初醒

原來嵐嵐條友一早知嘅，

唔怪得喺我未拍拖之前

佢成日都有意無意講到愷晴遲早都會同我一齊咁啦」

我:「嘩原來你咁嘅

估你唔到喎」

愷晴:「我嗰陣驚你對我冇意思，

所以一路都唔敢同你講

同時我知道嵐嵐同你好熟，

所以有咩我都會問佢

佢成日都話唔使驚，

佢話你個人唔可以用典型男性嘅行為舉止去推斷

因為你就係一個好奇怪嘅人，

所以佢畀咗好多信心我

甚至乎表白嗰日都係佢畀勇氣我

所以我同你可以一齊，

的確係歸功於佢」

我心諗佢條友咁樣踩我

痴線嘅邊忽得罪佢

你話我樣衰都算啦，

屌話我奇怪啫係咩意思呀

我五官同智力都正常

有邊忽奇怪呢

點知跟住我聽到個更加耐人尋味嘅說話，

我:「原來佢教你路嘅

唔緊要啦最緊要依家一齊」

愷晴:「但係我想講

我同你今日呢個結果，

其實都係因為嵐嵐

佢冇錯你冇錯我冇錯，

全部人都冇問題」

我:「下即係咩」

愷晴:「東仔，

我哋分手做返朋友好唔好呀」