[校園][純愛]《身旁的那一個》: 第九十二章

分手翌日，

我嘅生活都係咁

其實我覺得放鬆咗

唔使再好似以前咁，

係咁留意住個電話





同時我都知道

喺可見嘅將來之下，

我都唔會再同愷晴喺度煲電話粥

我同佢嘅片段只係得返歷史

有時有啲嘢真係好奇怪





只係相隔24小時，

不過有好多嘢已經變咗質

以後都做唔返

對比起傷心，

其實我更加多嘅反應係慨嘆





不過算啦日子總係要過，

分手真係唔係大晒

我都會繼續做我嘅嘢，

維持返自己嘅生活，

可能我咁樣好自私

只不過我好細細個就覺得，

自己係要對自己好啲

與其喺度沉淪，





不斷回顧昨日嘅美好回憶，

然之後因為今日個身分唔同咗而沮喪

倒不如將佢好好保存

等幾年之後拎返出嚟回味，

提醒下自己原來初戀係咁嘅

始終大家都知，

人真係會變，





唔止係你外形上嘅改變

有時更加多嘅係內在嘅變化

你對件事嘅態度啦，

又或者係你個人價值觀，

唯獨冇變嘅，

就真係發生咗嘅故事

反正繼續沉淪過往嘅回憶都改變唔到現狀，

倒不如暫時放低咗佢





等到有一日夠勇氣嘅時候，

再拎返出嚟去面對佢，

所以我分手之後嘅生活真係冇大變化

亦都唔似一部分人咁，

因為一次分手就令到個人改變

對我嚟講，

我嘅生活模式只係回復返拍拖之前咁樣，





唔會有咩改動.



跟住係喎，

我先醒起我係咪要通知嵐嵐

其實我估愷晴會同佢講㗎喇

不過始終我同佢識咗咁耐，

呢啲嘢循例上都係要通知返佢

雖然我知佢唔會嬲埋呢啲嘢，

咁但係算啦咁熟，

update下近況都係理所當然嘅事

我:「同你講啲嘢

我同愷晴分咗手」

佢個人真係成日都秒覆

嵐嵐:「我知道呀

愷晴講咗，

我唔知你點呀所以我冇煩你囉

等你自己講」

我唔知嵐嵐佢知唔知分手個原因啦

自己就冇特登去提，

佢問到先算啦

我:「冇嘢喎其實

可能係愷晴傷心啲嘅

我唔敢搵佢呀」

嵐嵐:「佢ok呀放心冇事呀

聽佢講你兩個都算和平分手

唔使咁驚啦

佢冇事呀」

我:「我幾驚你因為我同你好姊妹分手

跟住連我都block鳩埋」

嵐嵐:「痴線

你兩個和平分手

我又係局外人有咩好鬧

呢啲嘢邊有啱同錯呢，

就算真係有錯，

都唔止你又或者佢啦」

我嗰陣聽到佢咁講，

總係覺得愷晴有同佢講更加多嘅細節

不過算啦我詐唔知算

我:「你點呀都就嚟走

依家同佢分咗手，

睇嚟要麻煩你單獨同我出嚟食一次飯喇」

嵐嵐:「其實我都諗住咁，

驚你哋尷尬

我覺得佢都大方嘅

應該唔會介意一齊出嚟，

不過費事啦除非真係冇時間」

我:「你就咗佢哋先啦

暑假我得閒啲我應該隨時都ok」

嵐嵐:「好呀遲啲再約」

不經不覺，

嵐嵐喺香港嘅日子得返唔夠一個月

老實講我係有啲唔慣，

一個喺我隔離陪咗我五年嘅人，

好快就遠赴海外繼續學業

其實係好事嚟嘅

作為佢嘅朋友應該係鼓勵同埋支持

同埋都係嗰句啦，

講出嚟都件事都冇幫助，

又唔會有咩進展，

倒不如收返埋.