[校園][純愛]《身旁的那一個》: 第九十三章
我記得嵐嵐嗰年係拎完會考成績表之後個禮拜六走嘅
咁喺派成績表之前個禮拜，
我同佢就出嚟食咗餐餞行飯
得我同佢兩個嘅啫
之前都講咗單獨食嘅原因
喺度就唔再重複喇
最後佢揀咗間日本嘢，
我話我請啦
食埋呢次都唔知幾時再有機會
可能你哋會問，
去外國讀書啫
都會放假㗎嘛
放大假咪返嚟囉
但係以我所知，
嵐嵐放假都係傾向留返喺嗰邊
我:「唔好爭呀呢餐我嘅
」嵐嵐:「我知你請呀專登揀日本嘢
」我:「你個仆街唔貴唔揀
」嵐嵐:「梗係啦難得你請
係咁㗎啦
」我:「算啦請埋呢次
都唔知幾時有下次
」嵐嵐:「唔知呀，
不過至少都幾年掛
」我:「係喎你好似話放假都唔返嚟
」嵐嵐:「除非屋企出事囉
如果唔係我應該留返喺嗰邊，
讀完先返嚟
」我:「好呀
臨走啦唔好講衰嘢，
祝你一路順風
」嗰陣我都有啲計劃嘅
不過就冇同嵐嵐講，
其實自從分手之後，
再加埋嵐嵐下季都唔喺度
其實我有諗過轉去第二間學校讀中六
你知啦大家讀埋同一間學校真係有啲尷尬，
你見我係咁講呢樣嘢
就知我嗰陣幾擔心啦，
不過未落實嘅
循例都要等埋個分出嚟
當然啦我傾向都係唔轉
最後餐飯真係我埋，
佢原本想畀錢嘅
我見到佢打開個銀包諗住畀錢嗰陣就制止咗佢，
邊有餞行飯係由走嗰個負責埋單㗎
不過喺佢打開銀包嗰刻，
我見到佢銀包擺咗張相
就係我同佢last day喺禮堂門口影嗰張
埋完單等找錢嗰陣我就問佢，
我:「做乜咁鬼鼠擺咗我張相落去銀包度
」嵐嵐:「我驚我唔記得你個死人樣呀嘛
有問題咩
」我:「最好係咁啦
我驚你唔知做咩啫
」嵐嵐:「你真係小人之心
冇話錯你㗎，
成日諗埋啲唔知咩
」我:「不過估唔到你會擺落去
」嵐嵐:「無論如何，
我喺中學day1開始就已經識你
雖然呢五年混混噩噩好似唔知做過啲咩咁
咁但係都好開心識到你呢條友嘅
同埋你第日可能會變到好樣衰，
趁依家個死人樣都見得下人
我咪擺落去提下自己
原來我讀中學嘅時候，
身邊係有個咁奇怪嘅人
呢五年我過得好開心
」我:「我都係
」好耐好耐之後，
我先知道原來擺張相落去銀包嗰度，
已經係一個好明顯嘅提示
因為你每日都會見到呢張相，
而最重要嘅，
唔係好多個人會令你每日都想見到佢
係我嗰陣真係太愚笨同埋遲鈍，
每次諗返起，
都淨係識向自己抱怨.
之後就送佢返屋企，
大抵上我送埋呢次之後
都應該有段時間唔會再有機會做同樣嘅事情
所以我記得嗰次行得特別慢
我:「下個禮拜我嚟送你機
」嵐嵐:「唔好啦，
你唔係驚見到愷晴尷尬咩
」我:「最後一次冇所謂啦
」嵐嵐:「我嗰日晏晝機喎
你係咪要做嘢
」我:「呀係喎
請假都得嘅
再唔係我咪同我做嘢嗰邊啲人講
要遲啲交囉
」嵐嵐:「唔使咁麻煩喇
你放心喎我又唔係成世唔返
總有機會嘅
」我:「咁睇下點啦
唔應承你住，
總之有機會我會過嚟
」嵐嵐:「咁好啦
不過真係唔好勉強
你條友又唔係靚仔
我唔會特別想見到你㗎喎
」我:「咁你當我想見到你囉
靚女
」之後我哋一路行一路講返咁多年讀書嘅嘢，
由中一講到中五，
原來佢條友記性真係好好
有啲嘢連我本人都唔記得，
佢反而仲清楚
我:「咁多年都多得你幫忙
抄功課啦，
上台做show啦，
家政堂啲嘢食啦
總之每一次我遇到困難，
你都會好神奇
即刻就幫我拆掂
」嵐嵐:「你呢啲人咪衰囉
有事鍾無艷，
無事夏迎春.」
我:「咁唔怪得你嗰日揀咗呢首歌上台唱
原來想畀說話我聽
真係小器
同埋我唔係淨係有時先搵你囉
」嵐嵐:「我係想畀說話你聽
不過你個人低低能能，
應該都唔明㗎喇.」
我:「算啦反正你都就走
任講唔嬲
」嵐嵐:「你幾時會嬲呀
扮嘢，
口講就話點點點
次次咪冇事
」就算行得再慢，
不過始終都會到終點
嵐嵐:「我走喇，
多謝你餐飯
」我:「當係生日禮物
補返今年
」嵐嵐:「原來你記得
」我:「話咗你幾小器
你咁講即係你都記得我冇送囉
」嵐嵐:「咁嗰陣你仲拍緊拖丫嘛
我都叫咗你唔好送，
費事畀愷晴誤會
」我:「係囉你講㗎咋
不過依家都散咗可以送啦
」嵐嵐:「多謝
」我:「好啦你返嚟啦我都走啦
拜拜啦
」嵐嵐:「喂，
巫澤軒.」
我:「做咩呀
鍾曉嵐.」
嵐嵐:「可唔可以畀我攬你一次
」大家都知啦，
女仔問可唔可以，
其實都係講下
因為問唔問係冇分別
事關佢已經攬咗過嚟，
嵐嵐:「一次得喇，
好多謝你
巫澤軒.」
我:「嘩做乜咁興奮呀
」嵐嵐:「好快我就會鬆手㗎喇
我唔會攬好耐.」
跟住我就戇鳩鳩企喺度等佢攬
佢嗰下係好肉緊，
識佢咁耐好少見佢會咁
嵐嵐:「我走咗之後，
你要幫我同你四個仔講，
靚姐姐唔喺度喇
」我:「得啦我返到去同佢哋講
靚姐姐要去海外修煉
依家唔喺度，
佢修煉完成就會返嚟㗎喇
」嵐嵐:「你都要呀
唔長氣喇.」
跟住佢就鬆咗手，
嵐嵐:「好啦拜拜啦
」我:「拜拜
」以前細個就係咁㗎啦，
最鍾意就扮瀟灑，
依家諗返起都唔知有咩好扮，
喺我望住佢行返屋苑個背影嘅時候
我都對住空氣講一句，
「好多謝你，
鍾曉嵐.」