跟住到講下而家嘅擦排名現況,我可以同各位講,無論任何人擦人氣,擦點擊,點樣擦,幾時擦,我都係一清二楚,我甚至乎可以寫programme去監察你哋點擦,只不過呢啲咁簡單嘅嘢唔輪到我嘥心機去做咁多嘢,有時間不如寫好自己篇文先好過,或者擦自己篇文。

呢度只關住頭十五名啦,以下嗰啲其實無關痛癢,叫班朋友㩒下都已經上榜;以而家嚟講,總共係有六篇擦緊(之前有七篇,其中一篇係所謂全職作家彈出又彈入賣廣告再撤文,幼稚之至,有時間做無謂嘢希望佢關注咗自己精神健康先);六篇文屬於五位作者,三個係職業作家,兩個係唔知喺度做乜嘅無謂人,fine,你都可以咁做,因為擦機係合法嘅。點知道係擦?好簡單,半夜三四點一直有幾十人去睇文(同我一樣),睇嚟佢有好多歐美fans;又或者N耐唔更新自己篇文,但就又日日頭十,重要位置差唔多,或者兩篇自己嘅文可以攞到連續排名(係就買多幾篇啦,差幾遠啫?),都可以肯定係擦。

對於職業作家,擦排名賣廣告係可以理解嘅,反正佢哋唔係氹啲老讀者,而係謴啲新人水魚買佢哋啲實體書,一句紙言長期榜三內已經好值錢,會畀錢買書嘅讀者多數唔會做功課,見到排名就會覺得佢哋掂,所以佢哋唔會理面子問題,反正人人都咁做,我唔賣廣告我就笨柒,寫文事小,搵食事大,學黃子華話齋,搵食係大晒㗎,我呢啲PK擺明就係阻人搵食,不過我都有道義懶得開名,會睇我篇文睇到呢度嘅人都心知肚明係邊個啦。至於唔係搵食嗰兩個,我真係唔知佢哋搞乜,太多錢想促進經濟買排名等自己high下?

紙言打甜已經趕走咗一堆人,甜文又上唔到榜,乜要上榜真係好難嘅咩?所謂十年以上大作家,日日寫幾千字嗰啲,竟然比唔上我一個亂噏無謂嘅吹水佬?唔係呀化…你哋作品閒閒地有幾百萬字,喺呢個咁細競爭嘅環境都要用錢嚟幫自己上榜?寫故引人睇好難?每日keep住upload少少好難?有正職寫到爛尾完唔到故咁滯放棄自己名份好難?定係你哋已經知道自己時不與我,與其貼文不如畀錢買人氣算啦…同你哋講,寫作靠嘅係靈魂,而唔係為錢出賣自己靈魂,寫作搵到錢係因為有人欣賞你嘅靈魂,呢樣嘢係講機緣㗎咋,你要當作家好似生意咁做,不如出教科書算啦。(如果你出到嘅話)

唔好話我批鬥你哋,我根本唔需要。第一,我唔要做作家,亦唔要出名,更唔會出賣自己文字。第二,我唔需要理你哋,我自知寫乜有人睇,有幾多人睇,觀眾群係邊個,我唔收一分錢幫到一個讀者醫失眠,又或者令到一個學生哥對愛情產生合理正向嘅想像,意義大過你哋所謂乜乜小說網長期上榜作家多多聲。第三,我自己識擦,擦點擊又得,擦人氣又得,我錢都唔使畀,自己有晒軟硬體器材嚟做啲污糟嘢,問題係想睇我擦成點而已;當如果有一日擦到連篇文有幾多係bot,幾多係支持自己嘅讀者都唔知嘅話,我會連鏡都唔敢照。





不過好難,我打從一開始就唔係文人,數字先係我原本嘅世界,寫字只係我嘅side dish。我要講個現實出嚟,係因為你哋嘅存在打爛咗努力嘅人嘅盼望,摧毀咗一大堆學生嘅夢想,亦令到廣大讀者對知名網絡作(擦)家呢個銜頭產生疑惑。作為一個重視文字文化嘅人,我必需要出聲。

待續。