男友出軌，我決定送26頂綠帽比佢: B : 007 ！機關槍 ! (1)
「我送你翻屋企。」
丁家岐有好多「男友準則」，例如：每星期要寫一封信俾我、每一日都要同我WhatsApp至少半個鐘、星期五要留番俾我，陪我行街食飯睇戲。
當然，仲包括要送我翻屋企樓下。
「平時都係你陪我去搭車，今次輪到我送你翻屋企。」我拎住手袋企起身，無俾佢拒絕既機會。
「好呀。」丁家岐單手插住褲袋，欣然接受。
可能折騰咗一晚，佢都攰啦謝哂無力氣，所以破天荒無遵守「男友準則」。
其實佢屋企就係商場後面，唔知佢係咪有意放慢腳步，原本三分鐘既路程，居然行咗成十幾分鐘。
「你等等。」
丁家岐兩三步行出路邊，揚起手，應該係想截的士。附近有幾個人都等緊，次次都俾人搶先一步。
我企埋一邊，望住佢手忙腳亂個樣。有啲野，係你既就係你既，唔駛爭亦都唔駛搶。
第一架。第二架。第三架。
第四架的士，終於被佢截到。
「凱婷。」丁家岐叫我過去。
佢同司機報咗我個地址，又塞咗兩張一百蚊紙俾我。
隔住層玻璃，我同佢相顧無言。
「司機，可以開車啦！」我收回目光，望翻前面。
窗外既景物向後掠過，好快就將丁家岐既身影拋離開去。
「阿妹，唔好怪我多嘴。見你對條仔好似唔係太上心，可能你係矜持啦我唔知，不過太矜持唔好架，好容易錯失一段感情。」
我好無奈咁話：「有啲野發生咗，我唔知點面對佢。」明明犯錯既係丁家岐，點解苦惱既係我。
「有咩問題，咪三口六面講清楚咯。一晚傾唔掂數，咪兩晚咯，一世人流流長呀，比夠三晚佢又點話？總之最緊要溝通啦。」
佢既電話突然驚天動地響起黎。
「點呀？婆娘？」
「想食燒鵝？得啦我等陣買翻黎。」
「咩話？要食深井？係元朗好遠架喎。」
「喂呀，大佬呀，我揸的士架，我唔係Food Panda呀。有得食你咪食住先，下次順路再買俾你啦。」
「我幾時有唔愛你呀？喂？喂？」
「嗱，阿妹，呢啲就叫溝通啦。 」
呃...呢啲唔係叫雞同鴨講咩？雞同鴨講，我要食鵝。哈哈哈哈哈。
我成功逗笑咗自己。
司機又語重心長咁叮囑我：「我呢個的士佬，睇人無十年都有八載，信我啦，你呢個男朋友對你唔錯，要好好珍惜呀。
俾錢我用，就係對我好架啦？
落車時，我揸住兩張一百蚊紙，望住個獅子頭，諗住一陣，遞俾司機：「唔駛找啦。」
「哇！阿妹你出手咁寬綽！」係呀，反正都唔係我既錢。
......
WhatsApp有兩條未讀信息。
陳子俊：婷婷 好耐冇見啦
陳子俊：今日執野 搵到呢個 諗起你xd
係一架模型跑車，仲要係豪華版果隻。
「James Bond ！！！」我好激動咁敲出佢既花名。
陳子俊：You know my name : )
我同陳子俊住同一條村，可以話係一齊大。
細個果陣，每一日最大既期待，就係可以落街同佢見面。
我著住睡裙，佢著住孖煙通，兩個人買杯思樂冰一齊飲，由晏晝玩到夜晚，天黑都唔捨得翻屋企。
「七點，要翻去食飯啦。」
「點解夜晚既時間過得特別快？」
「不如玩多十分鐘？」
然後十分鐘就會變咗二十分鐘。二十分鐘就會變咗半個鐘。
「死啦，實比阿媽鬧死。」
「不如我話你整親，所以要照顧你？」
「但係我上個星期先『整親』完，好假喎。」
「咁點算呀？」
「有啦，一係話隻錶停咗，睇錯時間。」
我地最中意去文具鋪玩彈彈波，玩得多，練就咗百發百中既神功，不過次次都係得九獎，有一粒糖食。都唔知係我地蝕啲，定係文具鋪蝕啲。
有一次，本來諗住彈翻粒糖黎食，結果中咗大獎，就係呢架豪華版模型跑車啦！
換獎品既時候，老闆好明顯黑咗一下面，然後又笑哂口咁話：「得你有份，你個小女朋友無份喎！」
陳子俊二話不說，將所有一蚊銀拎哂出黎，指住一個好可愛、毛茸茸既狗仔筆袋：「我想要呢個！」
咦？我係佢小女朋友？佢無否認到喎。
「送俾你啦。我唔係度既時候，有佢陪住你！」陳子俊如是說。
我心裡甜絲絲，笑得如浴糖漿。唔知佢係唔係對我有意思呢？
為咗破解呢個千古難題，我即刻向偉大既Google大神求助。
100個佢嗒你糖既表現。男仔想溝你既暗示。有咩行為代表佢中意你。(下刪一千字)
節錄如下：
1.人地問你地係唔係有野，你地會異口同聲話：痴線，但係心裡暗爽
2.佢成日偷望你
3.佢會搵藉口送野俾你
4.佢會單獨約你出街
5.你同其他男仔傾計，佢會突然對你冷漠
6.當你睇完呢篇文，腦海浮現一個名字，證明你都中意佢
叮一聲，佢既訊息將我既思緒拉翻現實。
陳子俊：係喎 我同Secret個admin有交情 已經叫人del哂d post
陳子俊：你有咩唔開心 可以隨時搵我傾
同樣既說話，如果係第二個講，我會覺得佢地多管閒事。但係佢講既話，我會覺得特別溫暖。過咗咁耐，佢都冇忘記我，仲係咁關心我，話唔感動都係假。
我：其實我真係好唔開心：（
陳子俊：想去玩嗎? xd
我：想
陳子俊：咁明天放咗學等？
我：你過黎班房搵我。
陳子俊：不見不散 :p
呢一晚，有個的士佬同我上咗一課人生哲理，仲有個久未來往既舊朋友搵番我，世界真係......
好奇妙。