男友出軌，我決定送26頂綠帽比佢: H for Holiday (6)

番到屋企五點幾，衫都無換就匿入被竇，蜷縮成一團。

好似嬰兒係媽媽子宮一樣。

聽人講，呢種睡姿既人最無安全感，最需要愛。

慢慢地，我又沉番入果個無底深湖，有好多好多既難過浮上心頭。

起初壓低聲線咁啜泣，後來放聲大喊，喊到成個人都震哂，一抽一抽咁，我都唔知自己有咁多眼淚。





好攰，無論係肉體上，定係精神上。

擘大眼，合埋眼，趴係度，打側身。

點都瞓唔著。

丁家岐係幾時開始唔中意我？

係同佢扑完野之後，我一日send三、四個WhatsApp轟炸佢？





定係佢發現我唔識煮野食，算不上一個稱職既女朋友？

定係情人節果晚，佢一路同我食飯一路同Nicole傳短訊？

或者再早啲，係蘭桂坊偷食果晚？

唉，果時飛佢咪好，唔使搞到而家畀佢飛，好樣衰好無面。

瞓唔著亂諗野，亂諗野就好心煩，越心煩就越瞓唔著。





我好想忘記丁家岐，但係我做唔到。就算佢對我幾衰都好，我都仲係好掛住佢。

聽住秒針格格聲咁響，個天已經黑哂。

有鎖匙轉動既聲音，阿媽把聲響起：「搞乜鬼，婷婷，咁黑你唔開燈既？」

我捽住眼，扮到啱啱醒咁行出黎：「瞓著咗。」

「咁早瞓？你係咪中咗新冠呀？」

「應該無啊。」失戀啫，仲未死得。

「你快啲做下快速。」

「唔使啦。」





「點解唔使呀？做咗穩陣啲。」

「我同丁家岐分咗手。」你可唔可以畀我靜下，唔好再咁嘮叨長氣？

佢終於無再多講：「咁你換套衫先，出面好多病菌。」

「哦。」

「有乜垃圾順便掉咗佢，唔好擺係屋企阻埞。」

「哦。」

佢呢句話，令我諗到三隻字：斷捨離。





斷絕一切來往，捨去多餘既東西，離開唔愛自己既人。

我入廚房，拎咗幾個黑色垃圾袋出黎。

將相薄、有關丁家岐既日記、手寫信、生日卡、情侶T-shirt、手鐲、水晶球、番梘玫瑰花、迪士尼買既Duffy大公仔、日本買既特別版即影即有相機......全部放哂入去。

打好結，足足放滿咗三大袋。

我狠下心，全部揼哂去出面既垃圾桶。

雖然仲未真正放得底，但至少唔會望住呢堆野，睹物思人。

除咗手上既Tiffany & Co戒指。

我真係唔捨得。





......

Holiday：宿醉，個頭好l痛

我：有無事啊？

Holiday ：仲可以教到你數既

Holiday : 你想上我屋企定出去cafe溫？

我：上你屋企啦

我：要唔要我買粥上去？





Holiday：都好

Holiday : XX樓XX室，密碼係3721

執埋文具、課本、Mock卷同計算機，要咗兩碗鮑魚雞粥，去便利店買咗一排必理痛。

「Holiday 哥哥！」佢出黎應門。

「做咩飲到咁醉呀？」一夜之間，佢好似殘咗好多。

似前晚同人扑完野果種殘。

「個客要我陪佢。」

「男人定女人？」

「女人。」

果然。

「阿姨我不想努力了。」我揞住嘴偷偷地笑。

腦裡面不自覺地浮現起一個小劇場。

Holiday同老女人坐係沙發，頭頂上有盞射燈狂轉，射出不同既顏色，唱片機播緊不知名既老歌。

佢好想走，老女人係咁拉住佢，用豐腴既胸部壓住佢：「黎啦，飲多一杯先畀走。」

Holiday正想接過酒杯，老女人突然好唔小心咁將杯酒瀉落佢身上，白色襯衫下，若隱若現透出兩粒lin。

老女人再也把持不住自己，嬌喘一聲，倒在Holiday身上。

Holiday見我一副「果然如此」既樣，用手指彈我額頭：「又諗緊乜衰野？」

「無呀無啦。」我否認。

「著番對鞋先啦。」佢踢咗對粉紅色布拖鞋過黎。

「你屋企又會有粉紅色拖鞋既？」我古靈精怪咁問。

「琴晚特登買畀你。」

「你又肯定我會上黎？」我笑住咁問：「萬一我話去cafe呢？」

「你而家咪上咗黎。」

我行入佢間屋參觀：「你屋企咁少野既？」

「自己一個人住，可以有幾多野？」

「你無同阿爸阿媽住？」

「阿爸搬走咗好耐，阿媽係我十三歲果年過咗身。」

「意外？」

「心臟病。」

櫃上貼住佢媽媽張大頭相。

我本來想講Sorry，但係一來我又無做錯，二來佢既語氣又好似無乜野咁，所以我只係哦咗一聲。

我喃喃自語：「唔怪之得你果時消失咗，知唔知我搵咗你好耐。」

「唔好意思囉，原來你咁關心我。」

「你而家先知。」我個頭擰埋一邊，扮到好嬲。

「唔好嬲我啦。」

「應承我，以後唔可以突然消失。」

「以後都唔會。」佢舉起三隻手指發誓。