男友出軌，我決定送26頂綠帽比佢: H for Holiday (7)

食完粥，要完成今日既任務：溫習。

「原來咁簡單架咋？」平時老師教到好複雜，Holiday三言兩語就解釋清楚。

「數學最緊要係明個concept啫。」

佢坐係我隔離，望住我做咗幾條題目：「你有野唔識就問我啦！」

佢拎部電腦出黎，我以為佢悶得濟，要打機睇片解悶。





原來佢要整番工既野。搵下法律資料，幫客填claim form，又開咗個Excel出黎，唔知計緊咩數。

我雙手托住個下巴，安安靜靜咁注視佢。

「做乜望住我？」Holiday感應到我既目光。

「你塊面有答案。」我好順口咁話。

「亂嗡。」





「可以見番你，感覺有啲唔真實。」我懶係文藝咁話。

以為係過客既人，突然出現番；以為會陪我到老既人，就突然消失咗。

無野可以一成不變，唯一不變既就係變化。

「專心啲啦你，咪亂諗野。」佢推一推我面前份Mock卷：「計時啦。」

之後我地無再講過野，佢做佢既工作，我溫我既書，坐係隔離，大家一齊奮鬥緊。





做完之後，佢幫我批改答案，錯咗就做一次畀我睇。

「今日就咁啦，抖下先。」

「好彩有你咋。」我趴咗係張枱，用仰望既眼神望住佢：「你以前數學好高分架？」

數學叻既人，係我心目中，簡單係大神般既存在。真係好想剖開佢地個腦，睇下係乜構造。

點解大家都得一個腦（唔計無腦果啲），佢地轉數可以咁快，我就轉極都轉唔到。

「唔溫都有5*。」佢語氣平淡咁話。

我哇咗出黎，「咁溫咗咪有5**？」

「唔中意溫書。」





「其他科呢？」

「英文2咗，其他全部3。」

「好可惜啊。」所謂一試定終身，只要死一科，就滿盤皆輸，無得翻身。無論在校成績幾好、有過乜成就，通通都被否定。

好似成個人生都被否定咁。

「有咩咁可惜？」

「無得入大學囉。」

讀咗十二年書，唯一既目標就係考大學。如果失敗咗，真係唔知自己讀黎為咗乜。





「唔係讀書材料，讀落去都係嘥氣。」

係喎，唔記得佢讀果間係Band 3中學，個個無心向學，扑野打架是日常，之前仲有人係廁所隊草隊到上頭條。

「上唔到大學，我唔知有咩出路。」我拎住枝筆，不自覺轉黎轉去。

寫文又唔掂，計數又唔得，淨係識得背書。

「專心應付咗DSE，唔得先算。」佢企起身，行去雪櫃：「口乾，飲唔飲野？」

「有咩揀呀？」

「檸檬茶、菊花茶同蜜桃茶。」

「蜜桃茶呀。」





Holiday拎出兩隻玻璃杯，加冰，一杯倒酒，一杯倒蜜桃茶：「你既。」

「你飲咩呀？」

「Whisky.」

「做咩又飲酒呀？」我叉住條腰，谷起面珠墩，「琴晚飲咗好多啦。」

「慣咗改唔到。」

「日飲夜飲好傷身架。」

「呢排已經成日胃痛，前幾日先嘔完。」





「咁你仲飲？」我有啲嬲，邊有人咁作賤自己，一啲都唔愛惜身體架。

「我飲既唔係酒 ，係脫離現實既享受。」佢舉起酒杯，一啖飲哂，剩番啲冰。「醉咗就唔使諗咁多。」

細個果陣，我偷偷地飲過Whisky。烈酒下肚，喉嚨好似著咗火咁，一路燒到落胃。

「飲得咁快好易醉架。」佢頭先當水咁飲，喉嚨一定好灼痛。

「我酒量唔錯，想飲醉要好貴。」

見佢又想倒第二杯，我即刻搶走枝威士忌，攬到實一實。

佢吱我條腰，想拎番枝酒，試咗幾次，都係唔成功。唯有好好笑咁指住我：「仲係成個細路女咁。」

「唔準你再飲酒啊。」我好堅持。

佢無我乎，放低酒杯，望住個地板：「我啲客，佢地好中意睇我飲醉，係咁叫酒，不停咁灌我，仲要枝枝都係靚酒黎，至少都一兩千蚊。」

「唔可以話你唔舒服，唔飲架咩？」我有啲天真咁問。

「唔飲咪傾唔成生意。」佢自嘲咁笑一笑：「邊有主人中意唔聽話既狗架？」

將自己比喻成狗，講埋啲奇怪怪怪說話，我覺得佢已經醉咗。

「狗先會對主人言聽計從，唔敢反抗。」佢對住我汪汪咁叫咗幾下，挨落我膊頭。

我好自然咁攬住佢。

「你唔好走啊。」佢捉實我隻手。

佢醉咗都幾得意，成個細路仔咁，同丁家岐一模一樣。

「我唔走。不過你要答我一個問題。」

「哦。」

趁佢酒意正濃，我好想知道一野樣：「其實...你知唔知我中意過你？」

唔係妹妹對大哥哥既仰慕之情，而係男女之情果種中意。