男友出軌，我決定送26頂綠帽比佢: J for 無腳既雀仔（5）

「玩圍枚啦！」

「最低分既人要罰飲shot ！」

其實我唔係好識玩。

一係反應唔切，一係叫到錯哂，唔知自己做緊乜，輸撚到懷疑人生。

「飲！」「你又輸啦！」「要飲哂成杯！」





我拎起啤酒杯，硬住頭皮灌落去，個心跳到卜卜聲，成塊臉都好熱好紅。

輪到Josh同我猜，我已經企都企唔穩，可憐巴巴咁望住佢。

好似隻誤入狼群既小羊。

「放心，我會讓你！」Josh對我眨眨眼。

我信佢架，我真係信佢。





結果佢連續追殺咗我四次。

果一刻我真係好委屈，又話會讓我既？

詩韻拎咗杯Shot俾我，藍色既酒，上面有一小塊檸檬。

「飲！飲！飲！」佢地對住我大叫。

都要頂硬上。





願賭服輸吖嘛，小朋友先會唔認輸，我又唔係細路仔。

酒入喉嚨，好似飲緊火酒咁，辣到不得了。

邊個發明烈酒架？好想打佢一鑊甘。

個人飄下飄下，係沙發上躺平，皮已收。

「渣架。」佢地繼續玩。

唔知過咗幾耐，詩韻扶起我：「起身啦妹豬，太陽就黎落山啦！」

落山？夜晚瞓覺，有咩問題？

吖係喎，唔記得咗，佢地係夜行動物，精彩生活盡在午夜。





「佢真瞓定假瞓架？」

「真架。」我擘大眼，好順口咁答。

「邊個架？」有人冚咗件外套係我身上...

「我架，驚你凍親。」Josh走過黎，我狠狠咁睥咗佢一眼。

死衰人。

「時間唔早啦，我地係時候走？」Josh問大家。

酒意散咗一半，我坐起身，望一望架鐘，仆街原來就快十二點。





「未玩夠喎。」詩韻第一個反對。

「咁不如下半場落club?」

「我去！」「加埋我！」

「胡凱婷你黎唔黎？」詩韻用手指幫我梳番好個頭。

「我...有啲攰，下次再玩啦！」

「咁Josh你幫我照顧佢，送佢番屋企啦。」詩韻同我地say goodbye。

「啱啱call咗的士，八分鐘後到。」

「你頭先明明話過會讓我！」我望都唔望佢一眼。





「仲嬲緊呀？」Josh掂一掂我手臂。

「唔想同你講野。」

佢捉住我隻手：「過來錫番先。」

「你試下？」

「係咪可以先？」

「哦。」點解唔可以？

佢拉低我既口罩。





我以為佢既「錫」，係言語上氹番既意思。

Anyways, 兩片嘴唇交纏在一起。

佢kiss既技術都幾好，好似食緊軟雪糕咁，動作溫柔得黎又帶點挑逗。

同埋佢嘴唇好薄。

媽媽話過，薄唇既人多數薄情。

因為上唇代表情義，下唇代表慾念，薄唇就是薄情寡義。

自從分手之後，好似一夜長大，老咗幾十歲，白頭髮多幾條，性慾都無埋。

所謂酒後亂性，個身㷫烚烚，好想扑野好想俾人摸。

已經好耐冇呢種感覺。

Josh突然停咗落黎：「的士就到。」

好似睇睇下AV，突然冇電畫面熄咗。

令我更加想要。

「今晚開唔開心呀？」Josh問我。

「開心。」我個腦仲wing緊，所以佢問乜，我都好誠實咁回答，唔記得要隱藏真正想法，保留神秘感，只說三分話。

「下次仲同唔同我出街？」

「同呀同呀。」我嘻嘻傻笑，好似食咗聽話藥：「下次啫係幾時呀？」

「聽晚，後日，幾時都得。」佢伸出手，攬住我條腰，細細聲係我耳邊講：「其實今晚都得。」

「我要番屋企啦！」

「最多我送埋你番去。」

「唔得呀。」

「好啦，下次再出黎。」

我地十指緊扣，條街四下無人。昏黃既燈，照得彼此一臉黃。

「而家抽下水得唔得？」

「抽啦。」咁講有啲奇怪，好似我係個隨便既女仔。但我唔係。

對住有好感既人，先會投懷送抱。

「咁好？」Josh抱住我條腰，隻手係我身上游移，摸摸下就開始揸我個胸。

「因為你靚仔咯。」我cool實佢條頸。

「係咪個個靚仔都可以？」

「唔係，你先可以。」

一架的士停咗係我地面前。

「要走啦。」Josh拍一拍我個頭： 「番到去同我講聲。」

我同自己講，唔可以擰轉頭望佢。望咗，就代表我真係動咗情。

佢係個不折不扣既Player，貪既只係我既身體。

一切都係逢場作戲，佢對個個女仔都係咁。

我地唔會有結果。

道理我明白。

但到最後，我都係忍不住回頭。點解要抗拒自己既慾望呢？

佢都眼定定咁望緊我。

「如果玩夜啲，你會帶我去邊呀？」

認真就輸，我又一次輸咗。

我做唔到斷七情絕六慾。

唔係因為我相信佢，而係因為我仲相信愛情呢回事。