［愛情純愛］我地之間嘅友誼純度絕對等於零！！！: 04. 冷

「你個好兄弟都話你啦！檢討下啦～」李逸彤轉身將WS放到櫃桶中

「彤彤～夠鐘啦就嚟，要落去啦～」沈心怡邊對李逸彤講道邊著上校褸

「Okay嚟啦嚟啦～」李逸彤拎起搭喺櫈背上嘅校褸，然後就同沈心怡一齊出咗課室落去操場

邱旻顥望住李逸彤出課室嘅身影，潘景諭眼尾瞄到邱旻顥發呆，心裏不禁一笑

「想同人地一齊行嘅，啱啱起身行咪得囉～」潘景諭拍一拍邱旻顥嘅膊頭





「痴線啦⋯我先冇咁諗⋯」邱旻顥起身時順手拎埋校褸

邱旻顥同潘景諭一齊行出課室，順手地將課室嘅門閂上

「你係中意人咪追人囉，陣間比人追走咗，你話點算？」潘景諭笑一笑問道，邱旻顥瞄咗潘景諭一眼

「我邊似你咁有經驗呀⋯」邱旻顥無奈地講道，「邊似你係比女溝，唔係去溝女呀⋯」

「唔好講到咁唔該⋯」潘景諭連忙講道，「講緊你，做咩講番我⋯」





「唔似你咁多經驗嘛～」邱旻顥用手肘撞一撞潘景諭

「係咁有經驗嘅話，我就唔會仲係單身狗啦係唔係呀⋯」潘景諭反一下白眼講道，「你係追人就快啦⋯」

「做咩咁急？你中意佢咩？」邱旻顥一臉懷疑地望住潘景諭

「我中意佢？唔係囉，亦唔會囉⋯」潘景諭講道，「我唔會同你爭，李逸彤唔係我中意嘅類型。」

「咦～睇嚟我地嘅潘景諭有中意嘅人啦～」邱旻顥笑道，伸手搭住潘景諭嘅膊頭，「中意邊個呀？講嚟聽下～」





「煩呀你⋯再唔番到班隊就遲到啦⋯」潘景諭無奈地將邱旻顥嘅手推開，然後加快咗腳步朝班隊行去

⋯

「李逸彤，呢個係咩呀？」邱旻顥輕輕地拉咗李逸彤嘅馬尾一下

「你唔好再拉我頭髮啦⋯！」李逸彤頓時回頭望向邱旻顥，壓低聲線講道，「我把頭髮唔係比你咁用㗎⋯！」

李逸彤一臉不滿地望住邱旻顥，邱旻顥吐吐舌頭

「借你本書嚟睇下⋯」邱旻顥指一指李逸彤枱上嘅書，「呢個係咩？兩個「暴」意思一樣係唔係？」

邱旻顥望一望黑板，Miss Chong已經講緊《六國論》嘅下一段

「你點解仲喺呢段⋯」李逸彤無奈地講道，「「暴霜露，斬荊棘」個「暴」係曝露；「暴秦之欲無厭」個「暴」係殘暴⋯你有冇聽㗎⋯」





「聽唔切。」邱旻顥耷低頭，將詞譯抄低

邱旻顥托住腮，將Miss Chong寫喺黑板上嘅關於下一段嘅重點內容都抄低

邱旻顥瞄咗坐喺佢前面嘅李逸彤一眼，李逸彤唔知道嘅，係邱旻顥其實一早就知道「暴」嘅兩個唔同譯法，而且根本就冇聽唔切呢一回事

李逸彤用螢光筆將重點間低，再用紅筆喺隔離寫番詳細嘅解釋，寫好之後抬起頭望黑板，拎住原子筆嘅右手自然地轉起筆嚟

邱旻顯耷低頭，嘴角悄悄地上揚，坐喺李逸彤後面就可以咁樣光明正大地望佢

梳起乾淨利落嘅馬尾，馬尾嘅長度遮過咗後頸，令後頸多咗一份若穩若現嘅吸引；馬尾遮住嘅髮尾，髮碎都用髮夾夾住；耳珠嘅位置帶着黑色嘅耳針；即使從後面望向李逸彤都可以知道，佢係一個有條理又整齊嘅人，因為佢嘅校裙一睇就知係每次洗乾淨之後都會燙直

「坐呢個位真係好⋯」邱旻顥喺心中悄悄地講道





⋯

小息嘅時候，大家都離開課室去小食部買嘢食，就算唔去食嘢都要離開課室喺走廊行下，畢竟喺冬天唔郁動一下，真係會喺位凍僵咗

「你去唔去買嘢食呀？」潘景諭行到邱旻顥嘅座位旁邊問道

「唔啦⋯唔想郁，好凍⋯」邱旻顥將手插喺校褸嘅衫袋中，校褸嘅拉鏈都拉到最頂最盡，「你去啦⋯」

「咁我去買嘢食啦⋯」潘景諭轉身就走

「逸彤呀，你嘅memo借我一下呀～」沈心怡行過嚟，直接伸手將李逸彤放喺櫃桶嘅memo拎走

李逸彤抬頭望咗一眼之後，又默默地耷低頭，喺本來貼咗喺書上嘅memo上寫咗啲嘢，然後再合上書

「你隻手唔凍咩？仲寫到嘢嘅？」邱旻顥望住李逸彤仲拎住筆活動自如嘅手





「嗯？你話我呀？」李逸彤放低筆，雙手插喺校褸嘅衫袋中，轉身望向邱旻顥，「因為我隻手唔凍呀～」

李逸彤將手從衫袋中抽出嚟，然後手心向上遞到邱旻顥嘅面前

邱旻顥望住李逸彤嘅手猶疑咗一秒，然後⋯伸手握住李逸彤懸喺半空嘅手；李逸彤不禁吞咗一啖口水，但佢冇縮手嘅想法

時間喺呢一刻好似定格咗一樣，邱旻顥聽到自己嘅心跳喺佢伸手握住李逸彤隻手嘅一刻⋯先變得沉甸甸的往下壓，心臟用力地收縮，感覺就好似用粗鼓棍用力打喺鼓面上一樣重，心臟跳動嘅聲音喺整個身體裏迴盪着

李逸彤緩緩地將視線移開，佢提醒自己唔可以一直望住咁樣定睛邱旻顥




IG Link: https://www.instagram.com/nd_cotttoncandy/?hl=zh-tw