［愛情純愛］我地之間嘅友誼純度絕對等於零！！！: 05. 暖包

「你隻手咁暖嘅⋯」邱旻顥先回神，然後縮了手，將手又收番入衫袋中

「想知點解呢～」李逸彤笑一笑令自己睇起嚟自然啲，雙手都放喺衫袋中，「登登～」

李逸彤嘅雙手同時從衫袋中抽出嚟，手上握住兩個白色嘅長方形小包

「因為我有兩個暖包～」李逸彤一臉自豪地講道，雙手緊緊地握住暖包放喺邱旻顥嘅枱上，「暖笠笠～」

邱旻顥無奈地望住李逸彤嘅雙手，難怪佢嘅手會咁暖⋯





「嗱，比一個你啦，見你咁凍⋯」李逸彤將一個暖包放喺邱旻顥嘅枱上，剩下嘅一個放番入去自己嘅衫袋中

「咁⋯你咪會凍⋯」邱旻顥不自覺地講道

李逸彤愣了一下，邱旻顥自己都呆咗一呆

邱旻顥不自覺地就將自己嘅關心表達咗出嚟，佢自己都有啲意外，自己竟然咁順口就講咗出嚟

「都唔凍啦⋯」李逸彤細細聲地講道，臉頰上有一抹紅霞帶過





「我怕你凍親，番唔到學咋！你知啦，我地一甩咗一堂嘅嘢，就追得好辛苦㗎嘛⋯！」邱旻顥隨口就講出一個借口，打算化解一下尷尬，「我費事你要我教番你。」

「我先唔會，我都唔凍⋯！」李逸彤講完後便企起身，雙手插住衫袋離開座位

邱旻顥望住李逸彤行到沈心怡嘅座位，然後又默默地望住放喺枱上嘅暖包一眼，邱旻顥伸手將放喺枱上嘅暖包拎起握喺手中，將手插到衫袋中

「好似，有佢嘅餘溫⋯」邱旻顥喺心中講道

李逸彤行到沈心怡前面嘅座位坐低，背對住自己嘅座位坐，李逸彤將佢嘅注意力都落喺沈心怡寫緊嘅嘢上





「你啱啱冇抄咩？」李逸彤望住貼喺沈心怡書上嘅memo紙

「唔係呀⋯」沈心怡專心地寫着重點，望住貼喺左邊嘅memo，再寫一張一模一樣，「我寫咗啦啱啱⋯」

「咁你做咩又寫多張嘅？」李逸彤不解地問道

李逸彤望一望同好喺沈心怡書上嘅memo，再望一望沈心怡宜家寫緊嘅memo，兩張紙嘅內容，一模一樣呀的確

「你要貼一張喺筆記咩？」李逸彤拎起沈心怡嘅筆袋，無聊地將逐枝筆拎出嚟睇兩眼

「唔係呀⋯你做咩拎晒我啲筆出嚟呀？冇見過咩？」沈心怡抄完後抬頭，就見到李逸彤將自己筆袋中嘅筆都拎出嚟

「咁你抄兩張做咩？」李逸彤將筆都放番入去筆袋中，放番喺沈心怡嘅枱上

「幫阿諭抄㗎⋯」沈心怡拎起啱啱一直放喺自己大腿上嘅另一本書，將本書放到枱上，「佢叫我幫佢抄一張memo貼喺佢本書度嘛⋯」





沈心怡將潘景諭嘅書打開到《六國論》課文所在嘅頁數，然後將memo貼喺書頁中，然後將書再次合上，放番去旁邊嘅座位

「佢又叫你幫佢抄重點呀？」李逸彤輕皺起眉頭講道，「咁多女中意佢，叫其他人幫佢抄咪得⋯」

「冇所謂啦～我同佢熟嘛～」沈心怡行番埋位坐低，「都係幫佢抄一抄啫～」

「你就唔好咁好人，下下都幫佢啦⋯」李逸彤替沈心怡不值，「仲要用我嘅memo幫佢抄筆記⋯」

「咁我嗰疊memo咁啱用晒呀嘛～」沈心怡講道，「我用開嗰隻memo呢～我訂咗㗎啦，今日去拎。」

「你話有兔仔圖案嗰隻memo紙？」李逸彤拎起沈心怡放喺枱上嘅螢光筆

「係呀～之前見就嚟用晒咪訂定先囉～今日到咗啦，我放學就去拎。」沈心怡將李逸彤手中嘅螢光筆拎走放番入筆袋中





「哦⋯」李逸彤點點頭

「好凍呀⋯隻手一唔郁就好凍⋯」沈心怡嘅雙手合十搓着，「你係唔係又好似之前咁有兩個暖包呀？借一個比我呀～」

「呃⋯」李逸彤面有難色，「我得一個⋯」

「你平時都有兩個㗎，今日得15度咋喎！」沈心怡有啲愕然地講道

以佢對李逸彤嘅了解，李逸彤喺大冬天一定定帶兩個暖包，左邊衫袋一個，右邊衫袋一個，今日得15度，仲要大風，李逸彤手上竟然只有一個暖包！？

「啱啱⋯比咗一個邱旻顥⋯」李逸彤細細聲地對沈心怡講道

沈心怡頓時明白係咩一回事，抿着唇忍着笑緩緩地點頭，比咗一個Okay手勢

「但我都好凍⋯」沈心怡細細聲地講道





「借住比你先啦⋯」李逸彤將放喺衫袋中嘅暖包拎出嚟遞比沈心怡，「陣間上堂還番比我⋯」

潘景諭買完嘢食番嚟，一手拎住麵包，一手拎住手機咁番嚟，喺行緊番去座位嘅路上比李逸彤發現咗，李逸彤壞心眼地將隻腳伸出去，潘景諭頓時絆咗一下




IG Link: https://www.instagram.com/nd_cotttoncandy/?hl=zh-tw