［愛情純愛］我地之間嘅友誼純度絕對等於零！！！: 08. 情人節與巧克力

最終，李逸彤都係敗喺對邱旻顥嘅好感上，揀咗犧牲準時放學番屋企Hea嘅機會

另一邊廂，收到李逸彤回覆嘅邱旻顥望住手機裏嘅message，嘴角都頓時上揚起嚟

「Yes！」邱旻顥興奮地握拳，對於下星期五嘅到來好期待

「發咩神經⋯」邱旻顥嘅妹妹從睡房行出嚟，一行出嚟就見到邱旻顥一臉興奮嘅模樣

「做功課啦你⋯」邱旻顥反一下白眼，坐喺梳化上睇手機，「邱茗然你好得閒呀？」





「做晒啦～」邱茗然手拎住校服行去廚房，將校服掉入洗衣機，「今日聽日同後日都可以Hea～」

「唔洗溫書咩？仲想Hea⋯揀科啦小姐！」邱旻顥講嘅同時，邱茗然行到梳化前坐低，拎起電視遙控

「得啦～唔洗你擔心啦～」邱茗然一臉輕鬆地講道，「我嘅成績會keep到㗎啦～」

邱旻顥起身就行番入房，爬上上格床，兄妹兩人用同一間房，邱旻顥瞓上格，邱茗然瞓下格

邱旻顥灘喺床上睇手機，同李逸彤傾計，放學之後雖然見唔到面，但好彩私下會傾計





⋯

沈心怡手上捧住一個膠袋，啱啱去完取件站拎嘢正喺番屋企嘅路上

潘景諭：你買咗memo未？

本來睇緊手機嘅沈心怡見到有message彈出嚟，原本仲以為係李逸彤問佢，但睇真啲先發現係潘景諭

「買咗啦，喺手上」沈心怡回覆道，然後對手上拎住嘅貨件影咗張相send比潘景諭，「我今次都係買咗有兔仔圖案嗰隻memo」





潘景諭：正想叫你快啲買memo紙，睇慣你用嗰隻

沈心怡無奈地笑咗一笑，諗起李逸彤用緊嘅memo紙係有熊仔圖案嘅memo，其實個樣差唔多

「啱啱我見到以前小學嗰個李sir，佢仲認得我」

潘景諭：教常識嗰個？

「係呀！估唔到佢仲記得我」

潘景諭：你成績好佢梗係記得你㗎，個個老師都記得你添

沈心怡同潘景諭以前係讀同一間小學，後來上到中學，因為同一間小學升上嚟，而且唔知點解一直同班，所以兩人都算熟絡

潘景諭都有講過，喺學校同班入面都好，最熟嘅女仔係沈心怡；潘景諭屬於受女仔歡迎嘅一種，所以中意佢嘅女仔，自然地對沈心怡都有一定程度嘅羨慕





沈心怡番到屋企，第一時間就係將新買嘅memo放入書包，另外買咗嘅嘢都放番喺房收好

「Okay～星期一就有新memo用啦～」沈心怡拉上前隔嘅拉鍊

今次沈心怡直接買咗兩包有兔仔圖案嗰隻memo紙，一包放書包，另一包當後備放喺屋企，咁下次就唔洗急住買

佢嘅memo用得比一般人快，因為佢用memo mark重點嘅習慣，再加上要幫佢嘅鄰座同學潘景諭抄筆記

李逸彤成日都話佢太好人，下下都幫潘景諭抄筆記，沈心怡又覺得冇咩所謂，都係順手抄多張，仲可以一邊抄一邊背低內容，提升溫習效率，事半功倍

沈心怡坐喺書枱前拎出書本同功課，為咗可以喺星期六日好好咁休息，今日就要用嚟做功課

⋯





星期一

「早晨～」沈心怡一番到學校，見到李逸彤佢地都已經喺度

沈心怡放低書包，喺書包拎咗一個細袋出嚟後就朝李逸彤嘅座位行去

「咦～」李逸彤望到沈心怡手上拎住嘅小布袋，頓時就估到布袋入面裝住啲咩，「多謝心怡～」

沈心怡都未將個布袋打開，李逸彤就先將手伸出嚟

「多謝。」潘景諭伸手出嚟準備接朱古力

「情人節快樂～請你地食義理巧克力～」沈心怡將布袋打開，拎出放喺入面嘅朱古力

朱古力係沈心怡琴日整嘅，特地用細袋仔入住，獨立包裝，唔怕整污糟





沈心怡上上年開始有整情人節朱古力，不過係比女仔嘅義理巧克力，潘景諭都有，後來同邱旻顥熟咗，四個人成日一齊後，就比埋邱旻顥

「你地嘅多啲～其他都係兩粒一包。」沈心怡拎出一包先放到李逸彤嘅手上

放喺透明細袋入面有四粒方型嘅朱古力，正好一口一粒，朱古力面上仲有用白朱古力嘅「Z」型裝飾

「嗱～」沈心怡再拎出剩低兩包四粒裝嘅朱古力遞比邱旻顥同潘景諭

「多謝。」邱旻顥同潘景諭都接過朱古力

「我地做單身狗都有朱古力食真好～」邱旻顥食咗一粒朱古力

「Friend嘛我地～」沈心怡笑一笑講道








IG Link: https://www.instagram.com/nd_cotttoncandy/?hl=zh-tw