［愛情純愛］我地之間嘅友誼純度絕對等於零！！！: 09. 四人組

「心怡將來識咗男朋友，朱古力就冇我地份啦⋯」李逸彤伸手攬住沈心怡，女仔之間攬嚟攬去都好正常

「你嘅話我都會整嘅～」沈心怡笑咗一笑講道，「不過佢兩個就應該冇份啦～」

「都差唔多要落去上早會，行啦要。」邱旻顥望一望時間後企起身

沈心怡放番布袋喺書包，然後大家一齊落去上早會

「今日晏就不如食喺商場嗰間越南河粉。」行緊落操場嘅時候，李逸彤忽然間提議道





「都好喎～」沈心怡頓時和議，然後回頭望向行喺佢地身後嘅邱旻顥同潘景諭，「你地話？」

「哦，食囉。」邱旻顥先點頭，「反正都係睇你地食咩㗎啦。」

「咁gentleman呀～」李逸彤回頭望向邱旻顥笑道

「不嬲都咁gentleman啦～」邱旻顥聳肩

⋯





「叮噹叮噹，叮噹叮噹～」Lunchtime來臨嘅鐘聲響起

李逸彤感覺到佢嘅肚子都叫咗兩下，佢肚餓啦⋯

喺老師話落堂然後起身執好教材離開課室後，李逸彤將所有嘢都塞晒入櫃桶，起身拎埋銀包手機

「你得未呀？」李逸彤企喺邱旻顥嘅位置旁邊，「我好肚餓。」

「咁我都要執好嘢先得㗎⋯」邱旻顥無奈地邊執嘢邊講道，然後往後靠避開李逸彤望向潘景諭嗰邊，「佢兩個都未執好嘢，你催我做咩啫？」





「你快手啲啦⋯！」李逸彤好似冇聽到邱旻顥講嘅嘢一樣，伸手拍兩下佢嘅膊頭，「我肚餓⋯」

「得啦得啦⋯」望住李逸彤一臉要肚死嘅模樣，邱旻顥將枱上嘅嘢收入櫃桶，然後將手機從櫃桶拎出嚟放到褲袋入面，拎埋銀包企起身

兩人行到去沈心怡同潘景諭嘅座位中間，佢地兩個啱啱好執完嘢

「行啦，有人要餓死啦～」邱旻顥講道，瞄咗李逸彤一眼

四人離開學校行去附近商場食飯，四人行入餐廳，餐廳剛好有一張卡位，沈心怡坐入面，李逸彤坐外面，李逸彤嘅對面坐着邱旻顥

潘景諭伸手拎餐牌，先遞咗一份比對面兩個女仔

「唔⋯我想食呢個，豬扒撈檬粉。」沈心怡好快就揀好嘢食，「你食咩？」

「我食⋯食呢個熟牛肉河粉啦～」李逸彤講道，「你兩個睇完未？」





「睇完睇完，叫嘢食啦。」邱旻顥直接拎手機scan枱上面貼住嘅QRcode落單

喺嘢食陸續嚟到之後，沈心怡望到喺自己碗中嘅豬扒面上有一大堆蔥粒，沈心怡拎起匙羹裝起所有蔥，然後毫不猶疑地將嗰一羹蔥都倒晒落潘景諭嘅河粉入面

「李逸彤都唔食蔥。」沈心怡抬眼見到潘景諭一臉無奈便講道

潘景諭望向李逸彤，見到李逸彤嘅舉動同沈心怡一樣，只不過蔥花嘅新主人係邱旻顥唔係自己

「我成碗都係蔥⋯」邱旻顥望住自己碗中突然加倍嘅蔥花，一臉無奈地講道

「唔好望我，我都唔好得去邊。」潘景諭都唔望邱旻顥一眼，直接耷低頭食嘢

「李逸彤，唔該你下次叫走蔥⋯」邱旻顥食咗一啖河粉後講道，感覺嘴裏都食唔到河粉嘅味道，食嚟食去都係蔥花嘅味道





「咁啱唔記得咗嘛～」李逸彤笑一笑講道，「下次，下次一定記得！」

潘景諭同沈心怡對望咗一眼，潘景諭嘅眼中只有滿滿嘅無奈，沈心怡唔好意思咁笑咗一笑

「下次我都會記得走蔥⋯」沈心怡心虛地笑道

沈心怡食咗兩啖又拎起手機睇，邊睇手機邊食飯，睇睇下Facebook，突然見到李逸彤之前話想睇嘅電影上映

「李逸彤，呢套係唔係你想睇嗰套電影？」沈心怡用手肘輕撞咗李逸彤兩下

「嗯，係呀～」李逸彤瞄咗一眼沈心怡嘅手機螢幕，然後耷低頭食咗一啖河粉

「星期四上啦喎～你係唔係想睇？」沈心怡問道，「我可以同你一齊睇～」

邱旻顥同李逸彤不約而同地抬頭望向沈心怡





「呀⋯？」李逸彤不禁有少許慌張，「都唔急住睇嘅～」

「你唔好話比沈心怡知你約咗我睇呀⋯！」邱旻顥喺心裏緊張地講道，「更加唔好話同佢睇唔同我睇⋯！」

「我冇理由喺呢度同心怡講我已經約咗邱旻顥一齊睇㗎⋯」李逸彤嘅內心無奈又慌張

「要唔要今個星期同你睇？」沈心怡問道

邱旻顥望一望李逸彤，然後耷低頭食嘢

「呃⋯我之後再答你呀～都未知今個星期六日有冇嘢做～」李逸彤隨口講咗個借口

耷低頭食嘢嘅邱旻顥聽到李逸彤嘅回答，心裏都鬆一口氣





「好呀～」沈心怡一臉天真地一口答應李逸彤

邱旻顥抬眼同李逸彤對上視線，李逸彤輕輕抿唇，食一啖河粉後又不禁望一眼邱旻顥




IG Link: https://www.instagram.com/nd_cotttoncandy/?hl=zh-tw