［愛情純愛］我地之間嘅友誼純度絕對等於零！！！: 15. 間接的吻

「你話今日晏就食咩好？」李逸彤繼續講道，「食KFC好唔好？定食其他呢？唔知心怡同潘景諭會想食啲咩呢？」

邱旻顥依舊冇回答，目光鎖死喺李逸彤嘅身上

「邱旻顥！ 」李逸彤見邱旻顥冇答佢，輕皺着眉頭一下子抬頭望向邱旻顥，「同你講嘢啦！」

邱旻顥見李逸彤氣沖沖嘅模樣不禁一笑

「都未到晏就，早餐都未食就諗陣間lunch食咩啦？」邱旻顥伸手喺李逸彤嘅頭頂輕拍一下





「哎⋯！」李逸彤伸手摸摸自己嘅頭頂，「咁反正都要諗㗎啦～諗定先唔得嘅～」

「你想食咩咪食咩，反正最後決定嘅，基本上唔係你就係沈心怡㗎啦～」邱旻顥無奈地道，「我同潘景諭有幾可會反對？」

「都係喎～」李逸彤嘻嘻笑，「陣間番到去問下心怡食咩先～」

番到學校，邱旻顥坐喺自己位打開裝住三文治嘅三角形膠盒，將三文治拎起垂直放番入盒，然後就咁咬嚟食

李逸彤拎住屋仔形嘅牛奶盒，捉住兩邊掀開咗嘅翼，卻挺唔出壺嘴一樣嘅開口；坐喺李逸彤正後方嘅邱旻顥默默地望住李逸彤想飲但飲唔到嘅痛苦





「幫我開⋯」李逸彤擰轉身，一臉委屈地將牛奶盒放到邱旻顥嘅枱上，「開唔到⋯」

邱旻顥放低手上嘅三文治，先幫李逸彤開咗盒牛奶先

「嗱。」邱旻顥開完盒牛奶，將牛奶放番低喺枱上

「唔該～」李逸彤高興地接過牛奶，即刻飲咗兩啖

李逸彤側着身坐，目光自然地落喺食緊三文治嘅邱旻顥身上





「呀⋯？」邱旻顥剛好張開口準備咬三文治，但卻見到李逸彤望住佢，佢下意識緩緩合埋口，「做咩⋯」

「肚餓⋯」李逸彤淡然地道，其實佢冇特別肚餓，只係隨口一講

「嗯？」邱旻顥將三文治遞到李逸彤嘅面前，試探般問道，「食唔食？」

李逸彤默默地吞口水，望一望三文治又望一望邱旻顥，心跳又不禁加速

本來定睛望住對方嘅邱旻顥見李逸彤好似猶疑緊一樣冇反應，有啲尷尬地移開視線

正當邱旻顥提手將遞出嘅三文治收回嘅時候，李逸彤捉住邱旻顥嘅手，耷低頭喺邱旻顥咬過嘅地方上咬咗一啖，然後先將邱旻顥嘅手鬆開

邱旻顥嘅耳根泛紅，收回手若無其事地繼續食三文治

「感覺好似⋯間接⋯kiss咗咁⋯」李逸彤一諗到呢度，臉頰頓時染上淡淡嘅紅霞





李逸彤伏低喺枱上，臉埋喺交搭着嘅雙臂間；邱旻顥托住腮，安靜地耷低頭食嘢

「咔—」

沈心怡行到課室門口，扭動門鎖推開課室嘅門行入課室，李逸彤抬起頭坐好起嚟望向門口，見到沈心怡同潘景諭一齊行入課室

兩人行到自己嘅座位放低嘢，沈心怡喺放低書包後便行去開locker，李逸彤起身行到去沈心怡嘅身旁

「沈心怡，你係唔係有tissue？」潘景諭行到去沈心怡嘅身旁

「嗯，喺我書包暖前嗰個細隔。」沈心怡望咗潘景諭一眼就蹲低開locker拎嘢

潘景諭行到沈心怡嘅座位蹲低喺佢嘅書包前，喺書包嘅前隔拎咗包紙巾就行咗出去





「心怡你又唔約我番學～」李逸彤企喺沈心怡身旁講道

「我費是做電燈膽啦～」沈心怡細細聲地講道

「咩呀！」李逸彤頓時紅着臉頰輕打沈心怡嘅手一下

⋯

小息前一堂係LS堂，大家都啱啱先落堂，仲坐喺位執緊嘢

「去唔去買嘢食呀？」李逸彤先一步執好嘢，企喺座位旁問道

「好⋯」邱旻顥一臉疲倦地企起身，「拎個銀包先⋯」

邱旻顥伸手入書包，摸咗兩摸但完全摸唔到銀包，邱旻顥直接將書包拎上枱打開搵





「我冇帶銀包問號？」邱旻顥輕皺起眉頭

「冇帶銀包？咁重要嘅嘢都唔帶呀？」李逸彤感到訝異又無言，「你今朝買早餐唔係都有錢比咩？」

「我今朝用八達通比⋯」邱旻顥更無奈

此時，邱茗然上到嚟中五嘅樓層，行到5A嘅課室門口，朝課室裏面探頭望咗兩眼，朝入面望咗兩秒，見到佢嘅哥哥企咗喺位

邱茗然鼓起勇氣行入去中五嘅課室，直接急步行到去邱旻顥嘅座位

「你個銀包。」邱茗然將邱旻顥嘅銀包從裙袋拎出嚟

「喺你度嘅？」邱旻顥見到邱茗然完全冇咩特別嘅反應





「你冇拎，媽咪叫我拎番比你。」邱茗然講道




IG Link: https://www.instagram.com/nd_cotttoncandy/?hl=zh-tw