「搞掂~」潘景諭一臉輕鬆地講道,然後將WS對摺好放入書包

潘景諭朝書櫃伸手,從櫃上拎咗聽日嘅堂嘅書落嚟,喺將Chem書拎落嚟嘅同時,喺Chem書旁邊嘅中文書跌咗落嚟,「啪噠!」一聲跌喺書枱上

喺中文書入面有好多貼咗memo紙嘅地方,喺印有兔仔圖案嘅memo紙上都係沈心怡整潔工整嘅中文字,潘景諭拎起中文書,定睛地望住貼喺書上嘅memo紙發呆,然後將書合上,連同Chem書一齊放入書包

潘景諭拎起放喺枱上嘅手機望咗一眼,沈心怡冇send啲咩去回覆佢,佢又將手機放番喺枱上

佢一個轉身又坐番喺書枱前,佢拎起手機望咗一眼,然後默默地企起身行到床邊坐低,一下子向後灘低喺床上,側着身睇手機



「你幾時用番兔仔memo?」潘景諭send咗個message比沈心怡

沈心怡見到潘景諭嘅message,便㩒咗暫停,打算先去睇一睇潘景諭嘅message再番嚟睇綜藝

「我之前買咗,拎咗啦~」沈心怡回覆道,「上次先同咗你講」

潘景諭:好啦,都係睇慣兔仔memo

「都一樣咋嘛~你睇字咋嘛,memo嘅圖案都唔係重點」沈心怡笑咗一笑後講道



潘景諭:唔一樣,睇慣咗兔仔memo,突然間轉咗做熊仔,唔慣,會分心

「你睇字就睇字啦~」沈心怡笑了笑回覆道

潘景諭:睇慣你用開嘅memo嘛,都係你啲字好睇

沈心怡望住手機螢幕笑咗一笑,潘景諭成日都講好聽嘅說話氹佢一樣,沈心怡都習慣潘景諭嘅好話了

「為咗要我幫你抄筆記可以去到幾盡?」沈心怡無奈地笑着回覆道



潘景諭:我講事實囉只係,你啲字真係好睇

潘景諭:我又唔係第一日同你講⋯

「我會幫你抄筆記嘅~大家識咗咁耐」沈心怡回覆道

潘景諭:我就知你最好啦,我嘅筆記靠你啦!

「你唔洗講到咁,你用嚟溝女嘅招數對付唔到我」沈心怡笑了笑回覆道

潘景諭:冇溝女囉,諗太多

沈心怡見到潘景諭嘅回覆後不禁反一下白眼,然後回覆:「都係嘅,唔洗你溝,係啲女溝你」

潘景諭:我A0,講清楚先



潘景諭喺班上的確算係頗受歡迎,但潘景諭話自己A0亦的確係一個事實,雖然受歡迎,但佢唔會輕易同一個人一齊,除非真係對嗰個人嘅中意好強烈

潘景諭:就一個單身狗,唔好誤會太多

「咁多女仔中意你,唔怕單身」沈心怡回覆道

沈心怡回覆完呢句後便落咗線,番去睇綜藝節目;潘景諭望住沈心怡send過嚟嘅最後一個message,無奈地笑咗一笑後將手機放低喺一旁

「我都想拍拖呀⋯」潘景諭笑一笑,托住腮自言自語地講道



李逸彤同邱旻顥喺番學嘅路上又撞到,兩人喺番學校之前先喺一早小店買咗早餐



「你唔洗食早餐呀?」邱旻顥望向只拎咗一盒牛奶嘅李逸彤

「唔洗啦~飲盒奶就算啦⋯」李逸彤微微搖頭,直接將錢遞比小店嘅老闆

「唔怕胃痛?」邱旻顥接過三文治,另一隻手拎住一支水

李逸彤聽到邱旻顥嘅提問時,嘴角微微上揚,聽到來自邱旻顥嘅關心,總覺得今日會係一個好日子,係晴天之餘仲特別溫暖

「唔會嘅~好快都到晏就。」李逸彤微笑道

邱旻顥行喺李逸彤嘅旁邊,垂眼望咗李逸彤一眼,心裏不禁諗起喺睇戲時借比李逸彤披住嘅外套上嘅香味

喺嗰一晚番到屋企,邱旻顥將外套從背包中拎番出嚟,當佢拎起件外套起身行到去衣櫃前,捉住外套揚了揚時,忽然間聞到淡淡嘅香味

邱旻顥拎起外套放到鼻前,香味隨即變得更加濃烈



「噴咗香水⋯」邱旻顥喺心裏道,「同佢平時陣味太唔一樣⋯」

黏喺外套上嘅小蒼蘭嘅清新香味撲鼻而嚟,甘甜嘅味道,甜而不膩嘅感覺,就好似李逸彤帶比邱旻顥嘅感覺一樣:開朗、偶爾甜美、可愛中帶點活潑⋯

「不過唔知今日晏就食咩好呢~」李逸彤抬頭望向邱旻顥,「出街食飯就有呢個煩惱嘛~」

邱旻顥冇出聲,默默地望住李逸彤,腦海中全都係小蒼蘭嘅香味




IG Link: https://www.instagram.com/nd_cotttoncandy/?hl=zh-tw