［愛情純愛］我地之間嘅友誼純度絕對等於零！！！: 22. 小學班相

「係唔係你冇比零食佢，又或者你冇陪佢玩呀～」沈心怡笑得高興，一直睇着白襪嘅相，「襪子真係好可愛～」

「心怡～」李逸彤去完廁所番嚟，直接就行到沈心怡嘅身旁，一下子就攬住心怡，「睇緊咩呀？」

「阿諭隻貓囉～」沈心怡指一指潘景諭嘅手機螢幕，「好可愛！」

「呢個急不及待食零食嘅樣好搞笑！」李逸彤望一望潘景諭嘅手機螢幕

「睇緊咩？」邱旻顥見李逸彤番嚟，同沈心怡一齊企喺潘景諭嘅身旁，便起身行過去潘景諭嘅身旁，「白襪？幾時先比我地見白襪？」





「你地好想見佢咩⋯」潘景諭無奈地講道，「今日囉⋯」

放學之後，沈心怡、李逸彤，再加上邱旻顥，三個人跟住潘景諭番屋企，為嘅唔係去做功課，而係去搵潘景諭嘅貓

「你地可以入嚟，唔洗企喺門口。」潘景諭先行入屋，然後回頭望向佢地

佢地三人跟喺潘景諭嘅身後入屋，將鞋除落嚟放喺門邊

白襪本來聽到潘景諭把聲，即刻從潘景諭間房衝出嚟，但一跑到出嚟見到仲有三個人，白襪即刻企喺原地郁都唔郁





潘景諭走向白襪，彎腰將白襪抱起行到沈心怡嘅面前，沈心怡頓時將手先放到白襪嘅鼻前，比白襪聞一下自己嘅味道，對白襪表示一下禮貌

白襪嘅鼻子郁兩郁，然後用頭蹭兩蹭沈心怡嘅手，沈心怡頓時露出甜美嘅笑容，然後伸手溫柔地摸着白襪嘅頭

李逸彤行過去沈心怡嘅身旁，然後伸手摸一摸白襪

「點解佢唔蹭我嘅？」李逸彤笑了笑問道，「揀人蹭？男仔嚟？」

「女仔啦！」「喵嗚～」





潘景諭回答嘅同時，白襪好似都聽到李逸彤話佢係男仔，即刻就細聲地喵一聲反駁

「你話佢係男仔佢唔高興啦～」沈心怡用指背輕掃着白襪嘅下巴，白襪一臉享受地抬起頭

「你地同佢玩啦，逗貓棒喺嗰度。」潘景諭望住電視櫃最底嘅一格，「邱旻顥你去邊呀？」

「你張小學班相呢？冇貼出嚟嘅？」邱旻顥企喺潘景諭嘅睡房門口

「貼咗喺門口個玻璃櫃嗰度，你咁大隻眼都睇唔到？」潘景諭回頭望向邱旻顥

李逸彤即刻行咗去邱旻顥嘅身旁，同佢一齊企喺玻璃櫃前，望住貼喺玻璃櫃門上嘅小學班相上

「次次睇都覺得你細個真係好cool！」邱旻顥望向潘景諭，朝潘景諭笑道

邱旻顥已經上過嚟潘景諭屋企幾次，兩人不嬲都friend開，所以都唔出奇；沈心怡都只係喺初中做分組project嘅時候上過嚟一次





「心怡你好cute！」李逸彤指住相中企喺第二排嘅女仔，「潘景諭冇咩變化，但心怡你冇咗包包面～」

潘景諭同沈心怡對望咗一眼，潘景諭將白襪放到地上，然後同沈心怡一齊行過去企喺邱旻顥同李逸彤嘅身後

沈心怡抬頭望一望貼喺最高嘅小學班相，然後又望一望潘景諭

「你高咗好多⋯」沈心怡抬起頭望住潘景諭講道，邱旻顥同李逸彤望向佢地，「阿諭以前冇咁高。」

「咁我會生高㗎嘛⋯」潘景諭微微耷低頭望住沈心怡

「潘景諭高啲定邱旻顥你高啲？」李逸彤望一望潘景諭，然後望向邱旻顥，比較着兩人嘅身高

兩個男仔聽到後，下意識企直個人，然後對望咗一眼





「阿諭高啲⋯」沈心怡隨即講道

「潘景諭高啲。」邱旻顥都承認，但其實兩人嘅身高只係差少少，「佢高少少。」

「邱旻顥你好矮⋯」李逸彤望住邱旻顥，偷笑一下後搖搖頭講道

「你確定你有資格話我矮⋯？」邱旻顥輕挑着眉望住李逸彤，「我矮但都高你半個頭。」

「阿諭應該有180係唔係？」沈心怡問道

「上次PE堂度高嘅時候好似有。」潘景諭邊講，邊將手搭到沈心怡嘅膊頭上

沈心怡望一望潘景諭嘅手，又抬頭望向潘景諭，沈心怡比李逸彤矮少少，但喺女仔嚟講都算高，算係啱啱好嘅高度

「咁邱旻顥你咪得17幾？」李逸彤笑道





「我17幾都高過你！」邱旻顥伸手放到李逸彤嘅頭頂，「我都有178， 你都冇170。」

「我係女仔呀！生到呢個身高仲唔夠呀？」李逸彤推開邱旻顥嘅手，「我先唔想高到170⋯」

沈心怡將貼喺玻璃櫃門上嘅班相由上而下咁望，由小學五年級到宜家中五嘅班相，由小五開始，佢同潘景諭就一直同班，一張又一張嘅班相就好似佢地嘅成長史一樣

「如果你地拍拖，感覺會好似一直睇住對方成長咁，每一年嘅班相你地都喺一班入面。」李逸彤隨口開玩笑講道




IG Link: https://www.instagram.com/nd_cotttoncandy/?hl=zh-tw