［愛情純愛］我地之間嘅友誼純度絕對等於零！！！: 23. 要抱嗎⋯？

「一定唔會係咁囉～」沈心怡瞬間回答道

潘景諭望一望沈心怡，咩都冇講，只係默默地望住沈心怡

「同我一齊唔好咩？」潘景諭望住沈心怡緩緩開口問道

「先唔好！」沈心怡望向潘景諭，直接講道，「你太多人追，會好大壓力。」

「咁可能拍咗拖又唔一樣呢～」李逸彤笑笑口講道，「可能佢好專一呢～」





「做咩忽然講到好似我同阿諭拍緊拖咁？」沈心怡無奈地笑道，「係唔係諗得太多？」

本來灘喺梳化上小睡片刻嘅白襪醒過嚟，跳到地上伸咗個大懶腰之後，默默地行到沈心怡嘅腳邊蹭咗兩下，然後又行到潘景諭嘅腳邊蹭

「點呀你？」潘景諭抱起白襪，白襪望住潘景諭，細細聲咁喵咗一聲

「我要抱～」沈心怡朝潘景諭伸手道

潘景諭聽到沈心怡嘅說話時呆咗一呆，定睛地望住沈心怡





「我嘅意思係⋯我要抱襪子⋯！」沈心怡諗咗一諗，發現自己啱啱講嘅嘢有啲奇怪，頓時紅着臉頰解釋道

「好。」潘景諭輕輕一笑，然後小心翼翼地將白襪放到沈心怡嘅手中

「襪子～」沈心怡將白襪穩穩地抱喺懷中，白襪亦冇反抗，「襪子好乖呀～」

潘景諭伸手摸摸被沈心怡抱喺懷中嘅白襪嘅頭

「仲以為，你對住潘景諭講⋯！」李逸彤呆咗一呆後笑起嚟





「點可能⋯！」沈心怡攬住白襪害羞地講道

「我應該都抱得起嘅～」潘景諭笑一笑後，假裝認真地講道

「邊個要你抱啦！？」沈心怡嘅臉頰因為害羞而更紅，「阿諭你用嚟溝女嘅招數唔好用喺我度⋯！」

大家喺潘景諭嘅屋企留多咗一陣，陪白襪玩咗陣之後就走

「我送你地去地鐵站啦。」潘景諭講道，然後同佢地一齊出門口離開屋企

佢地去到地鐵站，邱旻顥三人因為要搭車番屋企所以拍卡入閘

「你做咩跟我地入閘？」邱旻顥喺拍卡入閘之後回頭望，見到潘景諭拍卡入咗閘

「下意識就拍咗卡⋯」潘景諭無奈地講道，「是旦啦，送埋你地番去。」





潘景諭同佢地一齊番到去，邱旻顥同李逸彤行另一邊

「你陪心怡番去？」李逸彤問道

「嗯，我同佢番去啦。」潘景諭望咗沈心怡一眼，沈心怡同潘景諭對上視線

「哦，好啦，咁聽日見啦！」李逸彤微微點頭

「聽日見～」沈心怡微笑一笑講道

邱旻顥同李逸彤一齊行，行咗兩步之後回頭望向沈心怡嘅方向，沈心怡同潘景諭一齊行

李逸彤收回視線，同邱旻顥一齊行番屋企





「其實你唔洗特登陪我行番去⋯」沈心怡先打開話題

佢抬頭望向潘景諭，潘景諭對佢微微一笑

「冇所謂，都過咗嚟，陪埋你番去啦～」潘景諭講道，「邱旻顥同李逸彤行同一邊，怕你一個人悶嘛～」

「我每日放學都係咁番屋企㗎啦！點會悶？」沈心怡不禁笑起嚟，「不過你都應該好耐冇嚟呢邊。」

「嗯，升中學之後都冇過嚟呢邊啦⋯」潘景諭講道

佢地所讀嘅小學，就喺呢度附近，正確嚟講，係喺沈心怡屋企附近

太陽落山了，但橙黃色嘅餘光尚未完全被夜幕吞噬，喺紫藍色嘅天空中，仍然留有一片橙黃

沈心怡拎出手機，將呢片天空影低





喺經過小學嘅時候，沈心怡同潘景諭朝學校內望去，沈心怡影着小學嘅門口，然後鏡頭影向潘景諭，喺短片打上caption：「重遊舊地了」然後再順手@潘景諭

「估唔到會一直同你同班。」沈心怡收起手機後朝潘景諭一笑

「都幾好呀，唔係咩？」潘景諭定睛望住沈心怡，臉上掛着淡淡嘅笑容

「嗯，好呀～」沈心怡笑道，然後望向小學兩秒後，又望向潘景諭，「不過好多嘢都唔一樣啦⋯」

「咁冇嘢係會一成不變嘅⋯」潘景諭望住沈心怡，喺講呢句說話時卻默默地將視線移開，抬頭望向紫藍色嘅天空

沈心怡安靜地望住潘景諭，視線定喺佢嘅身上，彷彿除咗潘景諭之外，就冇其他嘢吸引佢嘅目光一樣

潘景諭感覺到沈心怡正定睛地望住自己，視線又一次落到沈心怡嘅身上，兩人對上視線，兩人安靜地對望着





正當潘景諭開口打算講啲咩嘅時候，沈心怡先一步將視線移開，微微耷低頭；沈心怡嘅舉動，潘景諭睇喺眼中，潘景諭冇講啲咩沉默起嚟

「今日嘅天空好靚⋯」沈心怡抬頭望向天空，然後微笑着對潘景諭講道

「嗯⋯」潘景諭望一眼天空後，視線又落喺沈心怡嘅身上，「的確⋯」

邱旻顥同李逸彤行到番去屋苑附近，李逸彤望到喺前面嘅一間奶茶店，心裏忽然冒出想飲奶茶嘅想法

「我想買嘢飲⋯」李逸彤拉一拉邱旻顥嘅手肘講道




IG Link: https://www.instagram.com/nd_cotttoncandy/?hl=zh-tw