［愛情純愛］我地之間嘅友誼純度絕對等於零！！！: 25. 你好暖⋯

「阿諭你隻手有冇事？」沈心怡回神後嘅第一個反應，係潘景諭隻手有冇事，「痛唔痛呀？」

「冇事⋯」潘景諭垂低右手，望住自己左手手心，手心傳嚟一陣火辣辣嘅感覺

沈心怡抬頭，一臉擔心地望住潘景諭，潘景諭見到沈心怡擔心自己嘅表情，心裏不禁一笑

「真係冇事，只係有少少痛⋯」潘景諭輕輕抿唇後講道，「少少。」

「你推開我嘛，做咩用手拍⋯」沈心怡輕皺起眉頭，語氣聽起嚟，就好似責怪潘景諭一樣，伸手捉起潘景諭嘅手，「手心都紅晒啦⋯」





「啱啱冇諗咁多⋯」潘景諭嘅臉上掛上淡淡嘅笑容，「冇打到你就得。」

沈心怡抬頭望潘景諭，眼神裏夾雜着半分愕然，但過咗一秒後，沈心怡微微耷低頭，鬆開咗潘景諭嘅手

「下次推開我就係啦⋯你擋唔切嘅話點算⋯」沈心怡嘅雙手放喺身前輕輕扣着

「唔會，我反應快。」潘景諭瞄咗沈心怡嘅手一眼，眉頭輕輕一皺，「我真係冇事。」

「咁⋯我地聽日見啦～」沈心怡對潘景諭微微一笑





沈心怡轉身，正當佢打算邁步時，潘景諭一下子將佢叫住

「沈心怡！」潘景諭開口將沈心怡叫住

「嗯⋯？」沈心怡步伐一頓，然後轉身望向潘景諭，「做咩呀？」

「我真係冇事，你唔洗自責定點⋯」潘景諭講道

潘景諭都識咗沈心怡一段日子，對沈心怡嘅性格，佢都係有一定程度嘅了解，佢都知道沈心怡一定會覺得係自己冇避開之類嘅問題而抱怨自己，所以喺沈心怡自責前，潘景諭先開口話比佢知唔緊要





「哦⋯嗯！我知道啦！」沈心怡對潘景諭微微一笑

「嗯，拜拜。」潘景諭講道，沈心怡點一點頭，然後頭也不回地朝住大堂嘅門口行去

喺沈心怡行入去大堂後，潘景諭再轉身離開

潘景諭耷低頭，望一望自己嘅左手，沈心怡喺啱啱耷低頭時嘅表情喺潘景諭嘅腦海中浮現

「係唔係我嘅錯覺⋯」潘景諭喺心裏問道

潘景諭留意到，沈心怡抬頭望佢嘅時候，眼中有一絲愕然、一絲亮光，但喺一秒過後，眼中嘅亮光消失了⋯

喺行到入大堂後，沈心怡朝大堂門口回頭一望，手輕輕地握咗拳一下

⋯





夜晚6點35分

李逸彤一早就喺樓下等緊邱旻顥，李逸彤望一望手機顯示着嘅時間

「邱旻顥人呢？」李逸彤輕皺着眉頭望住手機螢幕

邱旻顥一個message都冇send比李逸彤，李逸彤就係咁企喺樓下食風食咗5分鐘

「嘶⋯」寒風一直吹，李逸彤喺原地踏兩下步再跳兩下，然後又望向大堂門口，「人呢？」

「你人呢邱旻顥！！！！！！」李逸彤send咗個message比邱旻顥，用大堆感嘆號嚟表達佢嘅氣憤

再過咗5分鐘後，邱旻顥匆忙地小跑出電梯，一下子跑到大堂跑大門前將門推開，一行到出去就見到李逸彤不滿地盯着佢





「Sorry呀！我唔小心瞓著咗⋯！」邱旻顥連忙跑到李逸彤嘅面前，一副準備負荊請罪嘅模樣

「哼⋯」李逸彤一下子撇開臉，鼻尖都因為凍風而吹紅了，「我都要凍死啦！喺度吹咗10分鐘風啦！」

「對唔住，我已經盡快飛奔落嚟！」邱旻顥雙手合十懇求李逸彤嘅原諒

「我對手都凍到結冰啦！」李逸彤將雙手從外套嘅口袋中抽出嚟，因為只係出去食個飯，所以佢都冇帶住暖包喺身

李逸彤微微鼓起兩泡腮，手伸到邱旻顥嘅後頸，冰凍嘅手心貼喺邱旻顥嘅後頸上

「嘶！」邱旻顥一下子將膊頭縮起，冰涼嘅感覺由後頸沿住脊椎滲落去，「凍、凍、凍⋯！」

邱旻顥嘅手放到後頸，搭喺李逸彤嘅手上；邱旻顥嘅手好溫暖，呢種溫暖嘅感覺傳到李逸彤嘅手中

「我錯啦！」邱旻顥捉起李逸彤嘅手，將李逸彤嘅手拎離自己嘅後頸，「你隻手真係好凍⋯！」





「都唔知拜邊個所賜囉～」李逸彤斜眼望眼望住邱旻顥

「對唔住嘛，我地去食飯啦！」邱旻顥講道，佢自己都冇留意到，自己仍然捉住李逸彤隻手，「行啦行啦！你想食咩？」

「冇咩特別要求⋯」李逸彤講道，佢垂眼望住自己嘅手，見到邱旻顥仲捉住自己，但係佢冇出聲

冷風一直迎面吹嚟，凍得李逸彤瑟瑟發抖，行起路時都格外僵硬

「你真係好凍⋯」邱旻顥呢一刻先發現自己仲捉住李逸彤嘅手，李逸彤嘅手冰都好似喺雪櫃拎出嚟一樣

邱旻顥一鬆開手，李逸彤感覺到啱啱比邱旻顥捉住嘅手腕頓時傳嚟一陣陣涼意，暖意一下子就被寒風吹散

「係呀！好凍啦⋯！」李逸彤點點頭，然後望一望邱旻顥嘅手，「你好暖！」








IG Link: https://www.instagram.com/nd_cotttoncandy/?hl=zh-tw