［愛情純愛］我地之間嘅友誼純度絕對等於零！！！: 24. 反應迅速

「咁突然嘅⋯？」邱旻顥望向李逸彤，李逸彤提早同得佢講，即刻叫佢同佢一齊去買，邱旻顥當然樂意

「你飲唔飲呀？」李逸彤行到去奶茶店門口，喺彤餐牌前先回頭望向邱旻顥

「唔啦～」邱旻顥搖搖頭，「不過你請我飲又另計！」

「你就想呀！」李逸彤無奈地反一下白眼

李逸彤買咗杯凍嘅芝士奶蓋紅茶，一拎上手時，感覺到雙手都凍到變僵





「唔！好飲！」李逸彤瞇起眼講道，口中全都係凍紅茶帶嚟嘅冰涼口感

李逸彤飲咗一大啖後，望向邱旻顥，發現邱旻顥望一望佢後，佢嘅嘴角悄悄地上揚

「你試唔試呀？」李逸彤將奶蓋紅茶遞到邱旻顥嘅面前

「嗯。」邱旻顥微微點頭，伸出手輕輕捉住杯身

李逸彤冰冷嘅手隨即傳嚟一絲溫暖，邱旻顥嘅手心掂到李逸彤嘅手，溫暖嘅感覺傳到去李逸彤嘅心裏





「好暖⋯」李逸彤喺心裏細聲地講道，臉頰泛起淡淡嘅紅霞

邱旻顥飲咗一口啖，冰涼嘅感覺走遍全身，但唯獨臉頰同耳根熱熱的

「好飲⋯」邱旻顥抬起頭，望咗李逸彤一眼後緩緩地將視線移開，「嗯。」

李逸彤微微耷低頭，想掩飾臉頰上嘅紅霞，但又不自覺地偷望邱旻顥，又飲咗一啖紅茶

兩人行到番去屋企樓下，邱旻顥行喺前面伸手拉門，喺電梯落到嚟地面打開門時，李逸彤因為感覺到手機微微嘅震動而拎出手機





媽媽：今晚我唔煮啦，OT，你同唔同爸爸食？

「吓⋯」李逸彤頓時擺出失望嘅表情

「做咩？」邱旻顥問道

「今晚食自己呀⋯！」李逸彤一臉哀怨地講道

就喺邱旻顥打算行入電梯嘅時候，電話響起，邱旻顥向後行咗兩步行番出嚟，李逸彤亦冇行入電梯入面

「仔，我今晚約咗同事食飯，你老豆番去陪嫲嫲食飯，你睇下你同唔同佢一齊番去？」電話裏頭傳嚟邱旻顥媽媽嘅聲音

「哦，咁⋯我自己搞掂啦⋯」邱旻顥淡然地講道，然後對方「咔」一聲收咗線，「李逸彤，今晚一唔一齊食飯？」

「你冇飯食咩？」李逸彤聽到後，心裏嘅雲霧都散開咗一半，不過循例都要問一句





「冇⋯」邱旻顥輕輕搖頭行入電梯裏面，李逸彤跟喺佢嘅身後入去，邱旻顥㩒完自己嘅樓層後，順手幫李逸彤都㩒咗樓層

「咁⋯好呀～」李逸彤笑了笑，心裏嘅雲霧全都散去了，但又唔可以表現得太雀躍

「唉⋯」邱旻顥心情好好咁輕嘆一口氣，然後喺心裏道：「真係人算不如天算⋯」

「6半樓下等？」李逸彤爽快地直接問道

「好呀。」邱旻顥點點頭

兩人各自番到屋企，李逸彤嘅笑意都忍唔住了，諗到今晚可以同邱旻顥一齊食飯就覺得高興

潘景諭陪沈心怡番到屋企樓下，沈心怡停低喺距離大堂入口一段短距離嘅位置





「我到啦，你快啲番去啦⋯！」沈心怡嘅雙手放喺身前輕輕地扣着，同時對潘景諭微笑地講道

「嗯，知啦。」潘景諭點點頭，然後伸手摸一摸沈心怡嘅頭，「你都快啲番去。」

「整亂我啲頭髮啦！」沈心怡撥開潘景諭嘅手，第一時間整番好頭髮

「都冇亂～」潘景諭笑道，「仲係好整齊啦～」

此時喺旁邊嘅空地有幾個小學生喺度玩，一直將籃球拋嚟拋去

「接住！」其中一個男仔用力地將籃球掉比佢對面嘅男仔

「喂！你掉去邊啦！」企喺佢對面嘅男仔朝籃球跑方向跑去，但籃球被拋得太過，佢想接都接唔住

籃球直飛向前，喺接波嘅男仔嘅指尖前飛過





「小、小心呀！」企喺一旁嘅男仔朝潘景諭同沈心怡叫道

潘景諭眼睛嘅餘光見到一個籃球正飛嚟佢地嗯邊，沈心怡望向聲音嘅方向，見到籃球飛緊過嚟時頓時愣住，比唔切反應

潘景諭頓時行近沈心怡，右手提起繞過沈心怡嘅後腦勺擋喺沈心怡嘅頭嘅左邊，左手迅速提起，一下反手將籃球向自己身後嘅位置推開

「啪⋯！」

沈心怡整個人都愣住了，喺潘景諭擋下籃球後，聽到籃球落地嘅聲音後，沈心怡先回神過來，緩緩抬頭望向潘景諭

「對、對唔住！我地冇心㗎！」負責拋波同接波嗰兩個男仔，迅速跑到兩人面前道歉

「下次小心啲。」潘景諭一臉認真地講道





兩個男仔乖巧地點頭後，行到去執波嘅男仔嘅面前，一齊跑去其他地方玩




IG Link: https://www.instagram.com/nd_cotttoncandy/?hl=zh-tw