李逸彤拎住英文書喺自己位坐低,坐喺佢身後嘅邱旻顥微微向右側,一臉期待地望住李逸彤枱上嘅英文書

「邱旻顥小學雞⋯」李逸彤喺心裏講道同時打開英文書

一掀開書就見到喺第一頁嘅角落畫咗個比Yeah手勢嘅簡單公仔圖案

李逸彤拎起書回頭望向邱旻顥,邱旻顥朝李逸彤比咗個Yeah手勢

「噗⋯!」李逸彤忍唔住一下子笑咗出嚟,然後伸手喺邱旻顥嘅前臂上輕捏咗一下,「無聊⋯!」



李逸彤坐番好托住腮,望住邱旻顥畫喺佢書角上嘅公仔,微笑中都夾雜住心底嘅甜意



Lunchtime

「呼⋯搞掂⋯」李逸彤閂上locker門,然後轉身行咗半步到邱旻顥嘅枱邊,「佢地未番嚟⋯」

「可能未落堂,等一陣啦。」邱旻顥一臉悠閒地坐喺位睇手機



潘景諭從課室門口行入嚟,行番埋位放低本書同筆袋

「佢番嚟啦,差心怡。」李逸彤一下子就留意到潘景諭番到嚟

潘景諭望一望沈心怡嘅座位,然後朝邱旻顥同李逸彤行去

「沈心怡人呢?未落堂?」潘景諭問道

「嗯,應該未落堂⋯」李逸彤微微點頭,然後抬頭望向課室門口,「我地等埋心怡先再出去啦~你地有冇咩想食?」



「學校附近都係食嗰啲,食番嗰間越南嘢?」潘景諭提議道

「好呀好呀~」李逸彤點點頭,然後望向邱旻顥

沈心怡攬住畫簿從走廊行入嚟課室,行到自己嘅座位將畫簿放入櫃桶,一臉疲倦地走向三人

「食飯⋯!」沈心怡行到過嚟後嘅第一句,係食飯

沈心怡嘅肚都餓到咕咕聲,啱啱上視藝堂嘅時候,肚子一直喺度叫,拎住畫筆一邊畫畫,肚子一邊喺度叫,叫到沈心怡都覺得尷尬

邱旻顥企起身,畢竟佢地都已經齊人可以出去食飯;李逸彤同沈心怡行喺前面,邱旻顥同潘景諭跟喺後面

四人去到餐廳坐低,沈心怡同李逸彤一齊坐,李逸彤拎住餐牌同沈心怡share嚟睇

「唔該記得走蔥呀兩位。」邱旻顥喺佢地睇餐牌嘅時候提醒道,「我同潘景諭唔想食蔥花放題。」



「蔥花放題,講得好。」潘景諭隨即附和邱旻顥講嘅嘢

「呿⋯食多兩粒蔥都唔肯,小氣鬼!」李逸彤反一下白眼講道

「你唔食?食兩粒啫~」邱旻顥笑住反問道

「噗⋯!邱旻顥你好衰⋯!」潘景諭不禁笑咗出嚟,沈心怡都笑咗一笑

「我唔中意食嘛!咁心怡又唔食蔥。」李逸彤喺枱底下踢咗邱旻顥一腳,「而且你坐我對面呀!唔比你比邊個?」

「潘景諭,我同你調位⋯」邱旻顥望向潘景諭,一臉無奈地講道

「你同我調位都係一樣,沈心怡都唔食蔥⋯」潘景諭無奈地笑一笑,然後望向沈心怡,沈心怡微微聳肩、吐吐舌頭



「唉!」邱旻顥重重地嘆一口氣

「佢地啱啱唔係叫咗走蔥咩?」潘景諭見到邱旻顥一臉無言嘅表情,都不禁覺得要開蔥花放題有啲慘,「有冇叫,你地。」

潘景諭咁樣一問,邱旻顥望向李逸彤,望一望沈心怡,李逸彤同沈心怡靜咗落嚟,對望咗一眼

「呃⋯好似唔記得咗叫走蔥⋯」沈心怡望住李逸彤,然後輕輕抿唇,唔知仲以為佢做錯咗啲咩事,「我冇叫囉⋯」

「我都⋯冇⋯」李逸彤窒一窒後,一臉無言地講道

兩個女仔同時望向坐喺佢地對面嘅兩個男仔,邱旻顥同潘景諭除咗無奈地嘆一口氣同無言地笑一笑外,都唔知仲可以講啲咩⋯



番到學校之後,距離打鐘上堂仲有少少時間,佢地幾個圍喺潘景諭嘅座位傾計打發時間



沈心怡坐喺自己位,李逸彤靠坐喺沈心怡嘅櫈邊,邱旻顥坐喺潘景諭前面嘅座位

「潘景諭⋯!」一個女仔行過嚟,行到潘景諭嘅旁邊,同李逸彤打對面咁企,「呢份係你㗎~」

嗰個女同學手上拎住幾份WS,大概係因為前面嘅同學未番嚟冇人傳功課嚟後面,所以呢個女仔先親自拎過嚟,當然,亦唔係完全因為咁

「唔該。」潘景諭淡然地講道,然後接過份WS,對摺後放到櫃桶中

「你最近做咩都唔覆我message呀?」嗰個女仔嘅語氣帶着點撒嬌嘅意味

李逸彤稍微抬眼望咗呢個女同學一眼;邱旻顥望一望潘景諭,嘴角微微上揚;本來已經面向住潘景諭坐嘅沈心怡,目光落喺企喺另一邊嘅女同學身上

佢地都知道,基本上,十不離九,又係潘景諭嘅桃花⋯






IG Link: https://www.instagram.com/nd_cotttoncandy/?hl=zh-tw