［愛情純愛］我地之間嘅友誼純度絕對等於零！！！: 30. 令人尷尬

「唔得閒。」潘景諭抬頭望住女同學，皮笑肉不笑地回答道

「我嗰日講嘅嘢，係講笑㗎咋～你唔洗擺喺心～」女同學微微一笑講道，但佢無法掩蓋喺佢嘅微笑下嘅尷尬感，「係佢地叫我咁講，想玩下咋～」

李逸彤同沈心怡對望咗一眼，佢地都唔明白，點解呢個女同學要當住佢地面講啲咁令人尷尬嘅事，但佢地隱隱約約地估到，呢個女仔對潘景諭講咗啲咩

「哦，我知，我冇擺喺心。」潘景諭微微點頭

「嗯⋯咁，好啦⋯」女同學尷尷尬尬地講道，然後直接轉身就走





「你啲桃花，一睇就知⋯」李逸彤細細聲地講道

「唔洗佢講到明，我地都知佢講咗啲咩⋯」邱旻顥同兩個女仔交換過眼神，大家都微微點頭

「救命⋯」潘景諭微微耷低頭，手托着額，細聲地講道

「好尷尬⋯」沈心怡擺出一個難以言喻嘅表情，大概係輕皺着眉頭，再加一個「旁觀者尷尬」嘅表情，「點解要當住我地面講⋯」

「我都覺。」潘景諭望住沈心怡無奈地講道





邱旻顥望一望周圍，見啱啱個女同學唔喺課室便細聲地講道：「佢係唔係期望你表達啲咩？喺我地面前。」

「我冇嘢可以表達⋯」潘景諭搖搖頭

「係唔係你做咗啲咩令人地誤會啦？」李逸彤細聲地問道，因為唔想比其他人聽到

「就係冇⋯」潘景諭嘅上身傾前，三個人默契地湊近聽潘景諭講嘢，「次次都係佢主動搵我，我偶爾覆一兩句好普通嘅嘢都係。」

「你啲桃花⋯」邱旻顥坐番好個人，伸手拍一拍潘景諭嘅膊頭，「你加油啦⋯」





⋯

「昕婷，幫我派番測驗改正比大家。」老師企喺老師枱前，拎起一疊用橡根綁住嘅紙遞比科長

喺上堂嘅時候，坐喺前面嘅昕婷起身行出去幫手派番測驗改正比大家，沈心怡一望到佢，就諗起啱啱喺上堂前，昕婷對潘景諭講嘅嘢

「昕婷好似係中意阿諭？」沈心怡喺心裏講道，「之前聽啲女仔講，好似話佢中意阿諭⋯」

喺女仔之間，其實早就講過昕婷中意潘景諭呢個緋聞，女仔圈子中嘅緋聞傳得最快，所以沈心怡聽過都不足為奇

「佢都好勇，直接私下搵潘景諭講嘢⋯」沈心怡嘅目光落喺昕婷嘅身上，視線隨住佢喺黑板前行嚟行去移動着，「比我就唔敢直接去搵對方講嘢啦～」

沈心怡自然地望向潘景諭，潘景諭仍然做緊阿sir叫佢地做喺堂課簿嘅數學題；潘景諭好似知道沈心怡望佢一樣，抬起頭就望向沈心怡

潘景諭對沈心怡微笑，頭微微一側，沈心怡見到潘景諭笑，佢嘅嘴角都上揚起嚟





沈心怡提手掩着嘴笑同時，將視線稍微移開，佢悄悄地望向潘景諭，見到潘景諭嘅左手摸着後頸，微微耷低頭，臉上掛着淡淡嘅笑容

沈心怡稍微一怔，視線隨即收回，輕輕抿唇，臉頰嘅溫度好似上升咗，溫暖嘅感覺從掂住臉嘅尖指開始擴散⋯

潘景諭悄然抬頭，偷望咗沈心怡一眼⋯

課室嘅風扇開着，陣陣嘅微風隨住轉動着嘅扇葉吹出，沈心怡額兩邊嘅髮碎髮絲被風吹動，沈心怡嘅指尖將髮碎往耳背繞

心臟傳嚟嘅感覺，明顯得令潘景諭自己都清楚感受到心跳嘅頻率改變

「呼⋯」潘景諭嘗試令自己冷靜落嚟，微微耷低頭同時輕呼一口氣

「潘景諭，傳嘢呀！」坐喺潘景諭後面嘅男仔叫咗潘景諭一聲





潘景諭頓時回神過來一樣，抬起頭抽起自己嗰份後，將其他嘢傳到後面

沈心怡將前面同學傳嚟嘅嘢，抽出自己嗰份然後疊好放到櫃桶，下意識伸手撥一撥頭髮，將髮絲撥開繞到耳背

「沈心怡。」潘景諭叫咗沈心怡一聲，沈心怡瞬間抬頭望向潘景諭，「借一借cal機比我。」

「你冇帶咩？」沈心怡雖然口裏疑惑咁問，但都係拎起放喺枱上嘅cal機遞比潘景諭

「唔知放咗去邊。」潘景諭接過cal機同時講道

喺接過沈心怡遞過嚟嘅cal機時，潘景諭嘅手不經意地掂到沈心怡嘅指尖

「好冰⋯」潘景諭下意識喺心入面講道

沈心怡嘅手好似放過喺雪櫃一樣，指尖都係冰冷的，手心一啲都唔暖，手握成拳嘅話，大概都只會感受到寒意





「做咩⋯？」沈心怡見潘景諭接過cal機後仍然望住佢便微微側一側頭問道

「冇⋯」潘景諭搖搖頭， 然後將手收回

沈心怡定睛望咗潘景諭兩秒，然後細聲地「哦」咗一聲，默默地耷低頭繼續做題




IG Link: https://www.instagram.com/nd_cotttoncandy/?hl=zh-tw