「我每晚都有搽Hand cream㗎!」沈心怡微微一笑,「你隻手都好好睇呀~」

「冇你咁白⋯」李逸彤扁着嘴講道,邱旻顥嘅目光悄悄地落喺李逸彤嘅手上

「其實佢隻手都好滑⋯拖起嚟嘅時候都會察覺到⋯」邱旻顥喺心裏道,佢自己咁樣諗完之後,自己都覺得有啲難為惰,於是將目光移開

「你同邱旻顥隻手邊個大啲?」沈心怡忽然間對潘景諭問道,「你地要唔要度下?」

「吓?唔好啦,唔想同佢咁樣手貼手⋯」潘景諭一臉嫌棄地望一望邱旻顥講道



「我都未嫌棄你,你憑咩嫌棄我?」邱旻顥反一下白眼講道

「不過我諗你地隻手,一定大過我同彤彤隻手一節⋯」沈心怡順口地講道

「男仔嘛。」潘景諭講道,然後將自己隻手伸咗出嚟,手心垂直朝沈心怡嘅方向,「唔通同你隻手一樣大咩⋯?」

沈心怡都冇顧慮啲咩,直接就伸出手,將自己嘅手心拍上潘景諭嘅手心

「啱啱好比我隻手大一節~」沈心怡笑了笑講道,將手收回後,將潘景諭嘅手從手背向下㩒,「阿諭隻手都好好睇!」



「邊度⋯?」潘景諭無奈地問道

「骨感。」沈心怡指住潘景諭嘅手背講道

「心怡係手控?」李逸彤好奇地問道

「冇特別係,但都會留意一下。」沈心怡微微搖頭

「你好凍?」潘景諭輕皺一下眉頭後問道,「你隻手好冰⋯」



「呀?唔係呀~」沈心怡講道,然後笑了笑,「平時我隻手都係咁凍,好少可會暖⋯要真係喺室內唔開窗先會暖。」

沈心怡收起拉住潘景諭嘅手,雙手放到兩邊臉頰上取暖,暖烘烘嘅臉頰隨即傳嚟一陣冰凍嘅感覺;潘景諭默默地留意住沈心怡嘅一舉一動,沈心怡嘅手嘅冰冷,仍然殘留喺潘景諭嘅手上

「好凍⋯佢隻手⋯」潘景諭嘅手隨意地搭喺大腿上,佢仍然感覺着沈心怡嘅手帶嚟嘅餘溫,佢輕輕握拳,「拎個暖包會唔會比較好⋯?明知隻手容易凍,佢都唔帶個暖包⋯」

潘景諭抬眼望向沈心怡,沈心怡嘅雙手捧住臉頰,正同李逸彤講嘢講得開心;沈心怡將雙手放低,笑起嚟時,雙眼都瞇成一條縫,因為喺外面比風吹過,臉頰都紅紅的⋯

沈心怡笑起嚟嘅時候,同平日佢比人嘅感覺有少許唔一樣,平日嘅沈心怡比人嘅感覺就係可愛乖巧、善解人意,但喺佢嘅笑容中,卻會有種「少咗一份可愛多咗一份溫柔」嘅感覺,令人覺得有一絲暖意

沈心怡冇留意到潘景諭一直凝視住佢;潘景諭見到沈心怡溫柔嘅笑容,心裏覺得沈心怡好可愛,佢中意沈心怡嘅笑容,覺得沈心怡笑起嚟嘅時候好好睇,潘景諭感覺到自己嘅耳根開始有啲熱熱的⋯

潘景諭專心致志地凝視着沈心怡,佢嘅目光總係不自覺地地停留喺沈心怡身上;此時,坐喺潘景諭隔離嘅邱旻顥,察覺到潘景諭嘅小心思⋯

「咳⋯!」邱旻顥故意咳咗一聲,潘景諭瞬間回過神來望向邱旻顥,只見邱旻顥露出一個意味深長嘅笑微望住自己



潘景諭同邱旻顥對上視線,邱旻顥察覺到潘景諭嘅「異樣」而笑,潘景諭見到邱旻顥嘅笑容,渾身唔自在

「你都收得好埋喎~」邱旻顥拎出手機send咗個message比潘景諭

潘景諭望到放喺枱上嘅手機震一震同時螢幕一亮,見到係邱旻顥send咗message過嚟,一臉疑惑地望向邱旻顥

「咩呀⋯」潘景諭有啲心虛地望一眼邱旻顥,細聲地講道

邱旻顥:兄弟,你嘅眼神出賣咗你

潘景諭下意識望咗沈心怡一眼,心臟嘅跳動強烈,感覺全身上下嘅神經線都突突跳動

邱旻顥:收得咁埋呀~雖然都唔太意外會係佢



「最勁係你啦」潘景諭無奈地回覆道

邱旻顥:好耐?

「或者?」潘景諭無棱兩可嘅回答,令邱旻顥哭笑不得

潘景諭當然清楚呢種感覺係由幾時開始,但佢唔想講比任何人知,確實嘅答案,佢想留番比沈心怡⋯

「保密,唔好同任何人講」潘景諭嘅message寫道

邱旻顥當然唔會同任何人講出潘景諭嘅秘密,佢心知潘景諭唔想比人知

「我唔會同你爭,李逸彤唔係我中意嘅類型。」

「煩呀你⋯再唔番到班隊就遲到啦⋯」



「之前佢好似,都冇否認⋯」邱旻顥諗起之前同潘景諭嘅對話,「雖然都唔太意外佢會中意沈心怡就係⋯」

邱旻顥宜家終於知道,當初潘景諭點解可以肯定咁話李逸彤唔係佢中意嘅類型

因為佢中意嘅沈心怡,同李逸彤完完全全係唔同類型嘅女仔嚟⋯一個活潑開朗,一個溫柔可愛

邱旻顥望一望沈心怡,雖然話佢中意嘅人係李逸彤,不過佢都唔否認沈心怡的確係好女仔嚟




IG Link: https://www.instagram.com/nd_cotttoncandy/?hl=zh-tw