「潘景諭中意沈心怡⋯都正常⋯」邱旻顥喺心裏講道,佢望一望潘景諭,潘景諭若無其事地睇手機

「阿諭,有冇紙巾?」沈心怡摸一摸裙袋後問潘景諭,「我冇拎出嚟⋯」

「哦有呀。」潘景諭隨即從褲袋中拎出一包紙巾比沈心怡,「嗱。」

「Thank you~」沈心怡伸手接過紙巾,潘景諭耷低頭食嘢

「難怪冇人發現佢有中意嘅人⋯」邱旻顥瞄一眼潘景諭後喺心裏道,「佢都太自然,收得太埋⋯唔係咁啱留意到嘅話,根本察覺唔到⋯」



潘景諭就好似平時一樣同大家講嘢,佢嘅心思完全唔會放到臉上,就算會,都唔會好明顯,一直冇察覺到係正常

「我唔記得叫走蔥⋯」沈心怡一臉抱歉地抬眼望向潘景諭

「你有邊次記得?搵次記住走蔥好唔好⋯?」潘景諭明明用着嫌棄嘅聲線講,但拎住筷子嘅手卻默默地移開

「嘻嘻⋯下次記得啦一定!」沈心怡坐好個人,帶着正經嘅表情同認真嘅語氣講道,「下次提我一下~」

「最好係⋯」潘景諭敷衍地點頭



佢知道下次沈心怡一定又會唔記得叫走蔥,因為每一次沈心怡都話佢下次會,叫潘景諭提佢;而潘景諭,佢每次都記得沈心怡叫自己提佢叫走蔥,但佢每一次都故意唔提沈心怡

潘景諭稍微抬眼,望住正將蔥夾到自己碗裏嘅沈心怡,嘴角不禁微微上揚⋯



翌日

「潘景諭,今日好凍呀,你洗唔洗戴頸巾?」潘媽媽拎住一杯剛沖好嘅咖啡,坐喺餐枱前望住電視播緊嘅天氣報告講道



「唔洗,我著咗校褸。」潘景諭蹲喺門前繫緊鞋帶

「哦,咁你凍就自己買個暖包啦。」潘媽媽飲一啖咖啡後講道,白襪此時從梳化跳落嚟,跳到枱上,「襪襪都凍呀?今日媽媽幫你睇下有冇小頸巾,買比你戴好唔好?」

「都唔知邊個先係你親生⋯」潘景諭企起身,望住握住白襪嘅手嘅媽媽,無奈地反一下白腿講道,「我出門口啦。」

「嗯,拜拜。」潘媽媽一手握住白襪嘅手,一手拎住咖啡杯對潘景諭講道

潘景諭一踏出家門,就將校褸嘅拉鍊拉到最上,然後左手塞到衫袋中,騰出右手拎手機

潘景諭行到去地鐵站,經過咗喺地鐵站入面嘅7仔

「暖包⋯」潘景諭停喺原地,回頸望一望7仔嘅標誌,猶疑咗一下

潘景諭嘅雙腳自動去朝7仔嘅方向行去,潘景諭從貨架上拎起一個暖包,然後就拎去比錢



「拆咗先⋯」潘景諭將暖包嘅包裝袋拆開,將白色嘅暖包上下搖咗兩下後塞到自己嘅衫袋中,將手抽番出嚟之後順手地輕拍一下衫袋,免得風吹到暖包令暖包暖唔起

潘景諭將手機拎住喺手上,邊睇手機邊行番學校

「陣間番到去將個暖包比沈心怡就係⋯」潘景諭喺心裏講道,然後停低落嚟企喺班馬線前,「反正⋯我都唔用暖包⋯」

此時嘅沈心怡行喺番學嘅路上,差唔多行到去馬路前嘅時候,佢見到一個熟悉嘅身影企喺度等緊燈

當沈心怡行到去馬路前時,紅綠燈剛好由紅燈轉成綠燈,本來企喺班馬線前嘅人都邁步行

「阿諭!」沈心怡小跑上前拍一下潘景諭嘅膊頭,「早晨!」

潘景諭聽到沈心怡嘅聲音,雖然對於番學時間可以撞到沈心怡有啲意外,但心裏都係忍唔住開心



「早晨⋯」潘景諭下意識地微微一笑

潘景諭嘅手伸入去校褸嘅衫袋中,手握着啱啱喺7仔買嘅暖包,心裏猶疑着要唔要拎出嚟比沈心怡

「阿諭你今日咁早嘅?你平時都好遲先番到㗎~」沈心怡行喺潘景諭嘅旁邊,好奇地問道,「唔通你未做完功課?」

「唔係呀,只係早咗起身所以早咗出門口。」潘景諭望一望沈心怡道,「平時我都唔係好遲啫~」

「哦⋯都係嘅,今日又凍番啦,我今朝早凍醒咗⋯」沈心怡邊通邊將雙手放到嘴前掩着嘴同鼻,然後輕呵一口氣,「呵⋯」

「你好凍呀?」潘景諭試探般問道,佢小心翼翼地觀察着沈心怡嘅表情,手一直握住放喺衫袋裏嘅暖包

「嗯嗯!今日真係好凍⋯!」沈心怡輕皺起眉頭,哭喪著臉講道

今日好似又比平時凍咗啲,近年嚟天氣都好反常,完全觸摸唔到天氣嘅變化,時凍時熱,今日除咗凍,仲好大風



潘景諭垂眼,目光落喺沈心怡著住中長襪嘅腿上,然後又望向沈心怡嘅臉頰,感覺沈心怡嘅臉頰紅紅的,或者係風太大吹到紅紅的;沈心怡嘅校褸裏仲要著咗長袖冷衫,校褸嘅拉鍊直接拉到最上,頸上仲要繫着頸巾,但沈心怡都係覺得有啲凍




IG Link: https://www.instagram.com/nd_cotttoncandy/?hl=zh-tw