「你地得未呀?」沈心怡行到李逸彤嘅座位問道,潘景諭行喺佢嘅身後

「邱旻顥,全世界等緊你呀⋯!」李逸彤朝邱旻顥反咗下白眼,「連潘景諭都快過你執好嘢,檢討下!」

「執完啦!」邱旻顥將手機同銀包收入褲袋中

李逸彤見邱旻顥都可以了,便拎起搭喺櫈背上嘅校褸著上;潘景諭見李逸彤著上校褸,望一望只係著住長䄂冷衫嘅沈心怡

「你唔洗著校褸呀?」潘景諭問沈心怡道,「出面好凍。」



「要呀要呀!」沈心怡回神過來一樣,連忙轉身小跑到自己跑座位拎校褸著上

沈心怡行到去黑板前同李逸彤佢地匯合,李逸彤同沈心怡都冇將拉鍊拉上,沈心怡嘅頸上戴住頸巾,都唔太怕會凍到

「嗯?」沈心怡感覺到有人拉咗佢嘅衫領一下,便回頭望

「你個衫領反咗。」潘景諭幫沈心怡將反起咗嘅衫領整番好,「Okay啦。」

「唔該~」沈心怡對潘景諭微微一笑,佢嘅笑容總係甜甜的



沈心怡挽着李逸彤嘅手臂,兩人有講有笑的,女仔之間總有講唔完嘅秘密

邱旻顥留意着潘景諭嘅微表情,用手肘輕撞咗潘景諭一下;潘景諭無奈地望向邱旻顥一副表達着「我知道秘密而想笑,但又唔可以笑出嚟」嘅忍笑表情

潘景諭用手肘輕撞番邱旻顥一下還擊,示意佢唔好亂嚟;潘景諭嘅目光落喺行喺佢前面嘅沈心怡身上,望住嘅沈心怡嘅側臉,佢嘅心跳都會自動加速⋯

「食嘢食嘢~」李逸彤拎起餐牌同時,講嘢都帶着節奏,好似唱歌一樣

邱旻顥聽到後聽唔住耷低頭笑,李逸彤伸手拍咗坐喺佢對面嘅邱旻顥一下



「笑咩呀!」李逸彤微微鼓起兩泡腮,佢明知道邱旻顥笑緊自己,但都要問一句先安心

「我有笑咩?」邱旻顥扮傻,不解地望住李逸彤,然後又耷低頭睇餐牌,「你睇錯啦~」

「你就睇錯!」李逸彤反一下白眼講道,然後偷偷地喺枱底踩咗邱旻顥一腳

邱旻顥抬眼望向李逸彤,李逸彤同邱旻顥嘅視線對上,李逸彤調皮地吐吐舌頭,然後用表情講一個「哼!」後同沈心怡一齊睇食咩好

邱旻顥輕輕一笑,耷低頭瞄一眼枱底,李逸彤嘅雙腿稍微伸前向前,佢嘅鞋頭同邱旻顥嘅鞋頭好近

只要邱旻顥嘅腳一郁,就會踢到李逸彤

邱旻顥小心翼翼地將腳移開,將腳放到李逸彤嘅鞋旁邊

「邱旻顥你食咩呀?」潘景諭拍一下邱旻顥問道



「C4。」邱旻顥指一指餐牌,指尖喺餐牌上輕敲兩下,「你食咩?」

「C7。」潘景諭望一眼餐牌後講道,「叫人過嚟落單。」

「你地呢?食咩呀?」邱旻顥問李逸彤同沈心怡

「我同心怡都食B2~」李逸彤講道

兩個女仔坐喺度睇手機,點餐嘅重任,就交比邱旻顥,平時都係咁樣,一切如常



番到學校之後,因為佢地早咗番到學校,仲有少少時間可以休息一陣



「彤彤,你去唔去廁所?」沈心怡行到啱啱開完locker番埋位嘅李逸彤旁邊

「哦哦,好呀~」李逸彤將書同筆記放低喺枱上,然後就同沈心怡一齊行出課室去廁所

邱旻顥坐喺位拎住手機睇,潘景諭見李逸彤行開咗便暫時借佢嘅座位坐一下

「新戲⋯?」邱旻顥望住喺IG睇到嘅新戲上映預告同poster

邱旻顥諗咗一陣,然後將電影嘅預告send比李逸彤;李逸彤同沈心怡行到去廁所推門入去,沈心怡輕輕推開每一個廁格嘅門,睇下邊一格比較乾淨

「我唔去,我喺度等你呀~」李逸彤對沈心怡講道,然後企喺洗手盆前睇手機

李逸彤一拎出手機,手機嘅螢幕便亮起嚟,螢幕一亮起嚟,用Face ID自動解鎖時,李逸彤頓時留意邱旻顥喺IG send咗兩個message比自己

邱旻顥:睇唔睇?



「科幻片⋯?」李逸彤望到電影嘅poster嘅一刻便喺心裏講道,然後睇一下佢嘅預告片,「但我對科幻片又冇咩太大興趣⋯」

李逸彤其實對科幻片都冇咩太大興趣,佢睇科幻片嘅次數,可能真係一隻手都數得晒,佢睇得最多嘅,應該都係愛情片

「冇咩興」李逸彤回覆嘅message打到一半,李逸彤將成個message刪去再重打一次,最後回覆一句:「好呀,你想幾時睇?我星期六日都可以」

坐喺課室嘅邱旻顥第一時間見到李逸彤嘅回覆,嘴角不禁上揚起嚟,拎好手機回覆李逸彤:「照舊星期六」

李逸彤:好呀~

企喺洗手盆前嘅李逸彤望住邱旻顥嘅message甜甜地笑起嚟






IG Link: https://www.instagram.com/nd_cotttoncandy/?hl=zh-tw