［愛情純愛］我地之間嘅友誼純度絕對等於零！！！: 43. 小小心意

「講到好似每個星期六都同佢約好咗一樣咁～」李逸彤喺心裏笑着講道，「不過我又唔太介意連星期六都要見佢嘅～」

潘景諭眼睛嘅餘光見到邱旻顥莫名其妙地笑，好奇地望向佢，邱旻顥感覺到潘景諭望住自己，視線從手機嘅螢幕上移開

兩人對望，潘景諭冇出聲，只係輕輕一笑；邱旻顥見到潘景諭偷笑起嚟，佢默默地退出咗IG嘅頁面

此時李逸彤同沈心怡去完廁所番嚟，潘景諭見李逸彤番到嚟便默默地企番起身

坐喺位嘅邱旻顥嘅目光離開手機螢幕，同行到番嚟位嘅李逸彤對上視線，兩人默契地笑了笑，但又要做到若無其事一樣淡定





「都唔知佢兩個扮咩⋯」企喺李逸彤旁邊嘅沈心怡喺心裏無奈地講道，「明明大家都知佢地有啲嘢⋯愈係咁神秘感覺愈有嘢⋯」

沈心怡都知李逸彤對邱旻顥係咩一回事，佢地兩個之間嘅小曖昧都唔係第一日嘅事，沈心怡唔係蠢，佢當然會察覺到

「不過算啦⋯佢兩個都低調開嘅⋯」沈心怡無奈一笑同時喺心裏道

「叮噹叮噹⋯叮噹叮噹～」上堂嘅鐘聲響起，沈心怡同潘景諭番到自己嘅座位坐低

喺老師未嚟嘅時候，李逸彤回頭望向邱旻顥，邱旻顥托住下巴，定睛地望住李逸彤





「你食緊咩？」邱旻顥見李逸彤食緊嘢便隨口問道

「薄荷糖，你食唔食？」李逸彤問邱旻顥道

「你啱啱番嚟嗰陣有買糖咩？」邱旻顥問道

「唔係呀，琴日買㗎，一直放咗喺書包唔記得拎番出嚟。」李逸彤邊講邊彎腰，伸手拉開書包前隔嘅拉鍊，拎咗位用粉紅色鐵盒裝住嘅薄荷糖出嚟，「嗱。」

李逸彤望一望門口，見老師未嚟，便將盒蓋打開遞比邱旻顥





邱旻顥伸手拎咗一粒薄荷糖出嚟，喺將糖拎出嚟之後，邱旻顥望一望粒糖，係半粉半白嘅心型薄荷糖

「情人節限定包裝。」李逸彤開口補充道，然後自己都拎咗一粒放到口中，笑一笑講道，「小小心意，不成敬意。」

邱旻顥笑一笑後將粒糖放到口中，感覺上本來就比較甜嘅蜜桃味，宜家變得更甜了

「上堂，大家拎好書未？」拎住教科書嘅老師喺踏入課室嘅門口同時講道，「打開上次未講完嗰度繼續講埋。」

李逸彤聽到老師把聲，頓時將成盒糖收到自己嘅裙袋中，同時轉身坐番好，手飛快地拎起書掀開

上堂嘅時候，老師拎住粉筆企喺黑板前，講兩句又轉身喺黑板寫下重點

邱旻顥托住腮、側着頭、手拎住原子筆聽書，聽到都覺得有啲攰，可能係飯氣攻心

「呵～欠⋯」邱旻顥耷低頭打咗個喊露，然後又繼續努力地聽書





潘景諭悄悄地望向沈心怡，沈心怡嘅枱上放着Memo紙，沈心怡Mark完重點後就將Memo撕落嚟貼喺筆記中，然後拎起螢光筆喺書上Highlight一下

沈心怡抬起頭望一望黑板，然後又微微耷低頭望書，頭稍微側着，拎住筆嘅右手輕托着額角，沈心怡無意識地望住書抿一下唇後扁起嘴，思考完畢後右手放低後喺書上寫了寫，寫完後，沈心怡自然地微微鼓起兩泡腮、嘟起嘴

「Opps⋯」一直偷望着沈心怡嘅潘景諭，比沈心怡突然間無意識嘅自然舉動可愛到了，不禁衝口而出細聲地講道

潘景諭連忙耷低頭，感覺啱啱沈心怡嘅舉動好似對自己嘅心臟造成重擊一樣，心跳完全冇辦法平靜落嚟

「差啲要，心臟病發⋯」潘景諭喺心裏講道，佢耷低頭撥一撥頭髮，感覺心跳完全冇平靜落嚟嘅打算一樣

「呀⋯」沈心怡嘅手不經意一掃，唔小心將擦膠都掃到地上

擦膠好似有預謀一樣彈咗兩下，彈到潘景諭嘅櫈邊，沈心怡望一眼跌喺地上嘅擦膠，又望一望潘景諭





「阿諭⋯」沈心怡細聲地叫咗潘景諭一聲，潘景諭回過神來望向沈心怡

沈心怡嘅手指指住喺地上嘅擦膠，潘景諭耷低頭，沿住沈心怡手指指住嘅方向望去

潘景諭一手扶着枱邊彎下腰，另一隻手伸手執起地上嘅擦膠，然後將擦膠輕輕一拋，拋到去沈心怡嘅枱上

沈心怡怕擦膠又跌落去，於是雙手蓋住喺枱面上彈起嘅擦膠，一臉無奈地望住潘景諭

潘景諭調皮地吐一吐舌頭，微微聳肩；沈心怡都冇佢咁好氣，直接無言地反一下白眼回答佢

⋯

「叮噹叮噹⋯叮噹叮噹～」

喺放學嘅鐘聲響起後，老師都識趣地落堂，餘下嘅部份聽日再講





四人都執好嘢後便起行離開課室

「我最近Down咗隻新Game，你玩唔玩？」邱旻顥問潘景諭

「咩Game？槍呀？」潘景諭有啲感興趣

「嗯，我send個名比你。」邱旻顥邊講邊喺手機中打咗Game名send比潘景諭，「得啦。」




IG Link: https://www.instagram.com/nd_cotttoncandy/?hl=zh-tw