［愛情純愛］我地之間嘅友誼純度絕對等於零！！！: 45. 夢

邱旻顥企起身打開旁邊嘅衣櫃，將上次帶比李逸彤著嘅外套拎出嚟，邱旻顥拎住衣架，望住外套發呆

「唔知佢聽日，會唔會噴香水⋯」邱旻顥嘅心裏諗起上一次喺佢身上嘅香水味

嗰種甜而不膩嘅味道，好似直接烙咗喺邱旻顥嘅腦海中一樣，一諗起嘅時候，彷彿嗰種香味就喺鼻前飄過一樣

邱旻顥將外套從衣架上拆落嚟，摺好後放到袋中，免得聽日唔記得帶

⋯





「邱旻顥⋯」李逸彤輕喚着邱旻顥嘅名，單膝跪喺邱旻顥跪雙腿之間

李逸彤伸手捉住邱旻顥嘅校呔，手緩緩地向上移，修長嘅手指最終落喺領呔嘅結上

邱旻顥嘅呼吸不禁隨住心跳嘅變快而變的又淺又急，佢用雙手將自己成個人支撐住

「你唔會我拒絕㗎可⋯？」李逸彤望住邱旻顥，擺出一副故意誘惑佢嘅模樣，「我想⋯」

講嘅同時，李逸彤捉住領呔結嘅手，一直將領呔緩緩地向下拉，將邱旻顥嘅領呔解開





「點可能拒絕⋯」邱旻顥直視着李逸彤嘅雙眼，右手提起搭到李逸彤嘅腰上，輕輕地將李逸彤攬住

「咁就好⋯」李逸彤主動地靠近，邱旻顥完全冇辦法抗拒

李逸彤愈湊愈近，左手搭喺邱旻顥嘅膊頭上，兩人嘅鼻尖之間嘅距離愈嚟愈近，彼此嘅呼吸都急促起嚟⋯

「嘟嘟嘟嘟！嘟嘟嘟嘟！嘟嘟嘟⋯！」

邱旻顥聽到鬧鐘嘅聲音，一下子就醒過嚟，佢坐起身將鬧鐘閂咗





「發埋啲咩夢⋯」睡眼惺忪嘅邱旻顥提起右手扶着額角細聲地講道，佢望一望放喺枕頭邊嘅時鐘，「先12點幾⋯」

邱旻顥懶洋洋地從上格層爬落嚟，喺下格床嘅邱茗然仲瞓緊未起身，今日係星期六，唔洗番學嘅日子

等到差唔多時間嘅時候，邱旻顥先換衫出門口；另一邊廂，李逸彤喺換完衫後，拎起放喺枱上嘅香水，朝自己前方嘅位置噴咗兩下，邁步穿過香水幼細嘅水珠，確保身上沾到香水嘅味道

然後又喺手腕上噴咗兩下，左手手腕喺右手手腕輕碰兩下，之後雙手嘅手腕又喺頸上動脈嘅位置抹一下

隨住脈搏同動脈嘅每一下跳動，香水嘅氣味都會更容易散發開嚟

「Okay，出門口～」李逸彤滿意地將香水放回枱上，然後孭起袋出門

當李逸彤落到樓下地面行出大堂時，邱旻顥早就喺度等緊佢，邱旻顥見李逸彤到，便將手機鎖屏然後收入褲袋中

李逸彤小跑兩步朝邱旻顥行去，微風吹起，好似連風都希望將佢快啲送到邱旻顥嘅眼前一樣





「香水味⋯」邱旻顥聞到李逸彤身上嘅香水味，「同上次係一樣嘅香水⋯」

「我到啦～」李逸彤一如既往地開朗，佢行到邱旻顥嘅面前笑了笑道

「行啦，去買飛。」邱旻顥微微一笑講道，然後莫名地有啲尷尬地將視線移開

李逸彤行喺邱旻顥嘅身旁，佢悄悄地將目光落喺邱旻顥嘅身上，邱旻顥比佢高，行喺佢身邊，總覺得有滿滿嘅安全感；佢身上傳嚟嘅天然味道亦同樣地令人安心

邱旻顥嘅雙手插喺外套嘅衫袋中，今日喺出門口嘅時候，因為出面有啲涼，邱旻顥淨係著咗一件單薄嘅Hoodies，所以佢著多咗件外套，將收喺袋中嘅外套拎番出嚟冇帶住

「你做晒功課未呀？」李逸彤用功課打開話題，「我淨係差LS份essay未做咋～」

「中文同英文我都未做，今晚番去或者聽日做。」邱旻顥回答道，佢講嘅時候，目光都冇落過喺李逸彤嘅身上





「你溫咗地理測驗未呀？」李逸彤微微側着頭，望向邱旻顥問道

「未溫呀，聽晚先溫都唔遲。」邱旻顥講道

「你做咩唔望我嘅？」李逸彤留意到邱旻顥喺自己到咗之後都冇正眼望過自己，佢心裏不禁有啲疑惑

「嗯？我冇呀⋯」邱旻顥稍微轉頭望咗李逸彤一眼，視線停留咗一秒便又移開

「你仲話冇？你又唔望我啦！」李逸彤輕皺起眉頭，語氣中夾雜着少許嘅不滿同抱怨，「我今日好醜咩？做咩唔望我呀？」

「冇呀，我咪望咗你。」邱旻顥講道

「嗯？」李逸彤望住邱旻顥嘅眼神係滿滿嘅不信任，佢行到邱旻顥嘅面前直盯着邱旻顥，「真係？」

邱旻顥見到李逸彤行到自己面前，佢頓時頓了一頓停喺原地，李逸彤嘅手捉住斜孭袋嘅孭帶，上身微微前傾，明亮嘅雙眼直盯着邱旻顥





邱旻顥嘅目光不自覺地落喺李逸彤嘅唇上，腦海中諗起佢發嘅嗰個夢，頓時覺得渾身唔自在

呼吸連同心跳一同稍微地急促起嚟，佢感覺到自己嘅臉頰開始有啲熱，佢同李逸彤對望着，佢完全敵不過李逸彤一雙明亮漂亮嘅眼睛，佢默默地後退咗一少步

微風吹過，一陣香味撲鼻而來，甜而不膩嘅味道，係李逸彤嘅香水味；李逸彤將被微風吹起嘅髮絲繞到耳背，邱旻顥望住眼前嘅少女，差啲都要望到入神




IG Link: https://www.instagram.com/nd_cotttoncandy/?hl=zh-tw