［愛情純愛］我地之間嘅友誼純度絕對等於零！！！: 44. 支持

沈心怡先一步踏出課室，李逸彤企喺課室門口回頭望向兩個正在討論槍Game嘅男仔

「好玩㗎？不如去你度試玩下。」潘景諭半開玩笑地講道，「既然你都Down咗。」

「嚟囉！我抽咗隻超勁嘅角色，陣間比你試下！」邱旻顥爽快地答應咗潘景諭嘅玩笑

潘景諭真係同邱旻顥一齊番屋企，李逸彤冇覺得唔自在，大家都咁熟，只係覺得有好大個電燈膽喺度

當然，潘景諭都識做嘅，佢將中間嘅位置留比邱旻顥企：左邊潘景諭，右邊李逸彤嘅狀態





潘景諭去到邱旻顥屋企之後，自然地將書包除落嚟放喺邱旻顥嘅書包旁，佢都唔係第一次嚟邱旻顥嘅屋企

「水自己酙啦，我唔招呼你啦。」邱旻顥直接行咗入房開電腦

「哦，得啦。」潘景諭講道

兩人坐喺電腦枱前，潘景諭拎咗張櫈坐喺邱旻顥隔離，望住電腦load緊嘅畫面

兩人靜咗落嚟，潘景諭耷低頭睇手機，邱旻顥偷瞄咗潘景諭嘅手機螢幕一眼後，拎起自己放喺鍵盤前嘅手機望咗一眼螢幕





「李逸彤冇搵你咩？」潘景諭忽然輕輕一笑，沒頭沒腦地講咗一句

「佢做咩要搵我⋯」邱旻顥邊問邊打開槍Game嘅頁面

「你地唔係成日都講嘢咩，I mean私下。」潘景諭抬頭望咗一眼電腦螢幕，見隻Game未load到後又耷低頭

「哦係呀。」邱旻顥講道，「但都唔係話24小時咁講嘢㗎⋯」

邱旻顥口係咁講，但卻總係不自覺地偷望手機螢幕，睇下李逸彤有冇搵自己





「Di～Di～」放喺枱上嘅手機震咗一震，邱旻顥頓時耷低頭，目光落喺手機亮起嘅螢幕上

「噗⋯！」潘景諭見到邱旻顥嘅反應，忍唔住笑咗出嚟，「你洗唔洗咁緊張呀？」

「咩、咩呀⋯！」邱旻顥瞬間紅了耳根，露出夾雜住慌張同害羞嘅笑容

「你唔解鎖睇下係咪佢呀？」潘景諭瞄一眼邱旻顥嘅手機，視線落番喺自己嘅手機上同時，自然地伸手摸一摸自己嘅後腦勺

「唔知⋯」邱旻顥半信半疑地拎起手機，手機一解鎖，就見到原來只係有人開live嘅通知，「唔係佢囉！」

睇緊手機嘅潘景諭笑咗一笑，抬頭望一望電腦嘅螢幕後打算耷低頭繼續睇手機，但喺佢耷低頭之際，眼尾卻瞄到邱旻顥覆緊李逸彤

「又話唔係李逸彤？」潘景諭無奈地笑問道

「啱啱個通知唔係佢呀！」邱旻顥覆完李逸彤後，免得好似重色輕友咁，佢默默地將手機鎖屏，然後轉移話題到潘景諭身上，「你同沈心怡私下多唔多講嘢？」





「好似你地咁密就一定冇㗎啦～」潘景諭輕嘆一口氣後搖搖頭，「但都會講下嘢嘅⋯」

「你加油，我支持你。」邱旻顥望一望潘景諭後，伸手拍一拍潘景諭嘅膊頭，「嗯。」

「多謝晒喎⋯」潘景諭無奈地笑了笑

「咔—」邱旻顥屋企嘅門被推開，孭住書包嘅邱茗然放學番嚟

一入門口，就見到有兩個書包放咗喺房門口，邱茗然將屋企嘅鐵閘同大門閂上，微微側頭朝睡房望去

邱茗然將除落嚟嘅皮鞋整齊地放喺鞋架上，然後孭住書包行入睡房

「番嚟啦？」邱旻顥回頭稍稍望咗邱茗然一眼，然後又轉頭望番電腦





「嗨～」潘景諭對邱茗然打咗個招呼，大家都見過，都認識對方

「嗨諭哥哥～」邱茗然對潘景諭笑了一笑講道，然後將書包除落嚟放喺床邊，彎腰拎起放喺床上嘅居家服

「邱茗然，你淨係同潘景諭打招呼，又唔見你同我打招呼？」邱旻顥一臉嫌棄地講道

「我日日喺屋企都見住你啦，洗咩同你打招呼⋯」邱茗然嫌棄地反一下白眼，然後直接行出睡房去廁所換衫

「你地嘅兄妹感情真係好。」潘景諭笑了笑講道

「吓？冇囉，好一般。」邱旻顥否認道

兩人研究咗隻Game一陣，潘景諭亦試玩咗兩場，直至去到旁晚時，潘景諭先番屋企

喺潘景諭走咗之後，邱旻顥拎起啱啱比自己放咗喺一旁嘅手機，見到李逸彤send咗message比自己





李逸彤：聽日睇完戲再去食飯？

「係喎⋯星期六睇嗰套新戲⋯」邱旻顥望住手機嘅螢幕喃喃自語地講道，「睇完戲去食飯⋯都好。」

「好呀，約幾點？」邱旻顥諗咗一陣之後回覆李逸彤

李逸彤：我睇到佢有4點2場，睇4點2好唔好

「好，咁3點半等？」邱旻顥回覆問道

李逸彤：Okay～

「聽日又會見⋯」邱旻顥望住李逸彤嘅回覆，喺心裏喃喃自語地講道








IG Link: https://www.instagram.com/nd_cotttoncandy/?hl=zh-tw