［愛情純愛］我地之間嘅友誼純度絕對等於零！！！: 49. 鄙視

沈心怡將手機放喺牆邊靠着，咁佢就可以騰番雙手出嚟

「嗨襪子～」沈心怡對鏡頭打咗個招呼

白襪望住手機嘅螢幕，見到螢幕入面有人覺得好有趣，前腳爬到枱上，後半身有潘景諭托住，伸出著住白襪嘅手拍咗手機一下

「喂。」潘景諭捉住白襪嘅手番嚟，然後對白襪講道：「姐姐掛住你，你點可以打人㗎？」

「唔⋯喵⋯」白襪好似知道自己唔啱一樣，委屈地低聲道





「快啲同姐姐道歉啦～」潘景諭望住白襪，然後瞄咗螢幕一眼

「喵～」白襪叫咗一聲，逗得沈心怡笑得開心

白襪一下子跳到枱上，用鼻子聞咗螢幕兩下

「就知你掛住我啦襪子～」沈心怡高興地講道，眼睛都瞇成一條線

潘景諭望住沈心怡嘅笑容，佢自己都耷低頭笑咗一笑





「好啦，你擋住晒個螢幕啦⋯」潘景諭抱起白襪，將白襪抱番去自己嘅懷中

「你唔叫我姐姐嘅？」沈心怡故意問潘景諭，因為啱啱潘景諭叫自己做姐姐叫得好順口

「咩呀？」潘景諭裝作咩都唔知，然後耷低頭望住白襪，白襪抬頭一副乖巧嘅模樣望住潘景諭，「你擋住成個螢幕嘅話，心怡見唔到你㗎啦～」

沈心怡對於潘景諭直接叫自己嘅名有啲意外，因為潘景諭好多時都係連名帶姓咁叫佢，好少直接叫佢心怡

「你唔叫我姐姐呀？」沈心怡笑着再一次問道





「心怡。」潘景諭瞄咗沈心怡一眼後講道，「沈心怡。」

「咩呀～」沈心怡左手托住腮，右手拎住筆，定睛地望住手機螢幕

白襪坐喺潘景諭嘅大腿上打咗個大大嘅喊露，然後起身跳到地上，伸咗個懶腰後從門縫中出咗去

「襪子要去瞓晏覺啦？」沈心怡講道

「佢應該係出去食嘢。」潘景諭托住腮講道

兩個人再講多咗一陣就收線，潘景諭望住手機有啲無奈

「冇良心⋯」潘景諭無奈地講道

潘景諭企起身打算行出廳搵白襪嘅時候，一轉身就發現白襪就坐咗喺佢嘅床上





「白襪呀白襪～」潘景諭坐喺床邊，側身就灘咗落床，佢伸出手指摸着白襪嘅貓手，「你睇下你個心怡姐姐對我幾冇良心呀⋯」

白襪緩緩地轉頭望住潘景諭，然後打咗個喊露

「襪襪你要幫我追到心怡呀～」潘景諭輕輕地捉住白襪嘅手笑道，白襪卻擺出一副「我先唔要」嘅表情，「你識唔識後空翻之類？」

白襪一臉不屑地望住潘景諭，打咗個喊露後灘低喺床上

「幫我追個女仔都唔肯⋯枉我咁錫你⋯」潘景諭邊摸着白襪嘅背邊無奈地講道

潘景諭嘅手搭喺白襪嘅背上，然後同白襪自拍咗一張，當然白襪佔咗成張相嘅三分之二，然後潘景諭將張相send咗比沈心怡

「佢鄙視咁望咗我一眼⋯」潘景諭隨相片附上一句caption





「噗⋯」沈心怡一打開IG就見到潘景諭send過嚟嘅相同message，一下子就笑起嚟，然後回覆：「你做咗咩搞到襪子鄙視你（笑喊）」

潘景諭望住沈心怡send嘅message，嘴角上揚不禁一笑

「唔通話你知我叫佢幫我追你咩⋯」潘景諭細聲地自言自語道，然後諗咗一諗後回覆道：「我叫佢幫我做功課」

沈心怡：難怪襪子鄙視你啦（笑喊）

沈心怡：叫主子幫你做功課（笑喊）傻唔傻

「叫佢幫我追你，我都覺得好傻⋯」潘景諭自己都無語地笑起嚟

潘景諭拎住手機，一個轉身仰卧喺床上，佢都覺得自己叫隻貓幫自己追女仔好傻，但佢都唔知道要點樣追沈心怡先啱⋯

⋯





李逸彤帶着不悅嘅心偷偷地抬眼望一望邱旻顥，邱旻顥嘅左手拎住匙羹，右手拎住手機，視線一直停留喺手機上面

「嘖⋯一直睇手機係想點啦⋯」李逸彤喺心裏不滿地講道，「今日佢都奇奇怪怪咁嘅⋯」

李逸彤望住邱旻顥拎住手機嘅右手，姆指一直輕輕地敲打着螢幕，心裏不禁就猜測佢同邊個傾緊計

「同人傾計得啦⋯都唔洗理我⋯」李逸彤喺心裏不滿地抱怨道，「係唔係同女仔講緊嘢⋯？同我出街但就掛住同其他女仔WhatsApp⋯」

李逸彤嘅心裏其實有啲不安，就算邱旻顥真係同其他女仔傾緊計，佢都冇可以呷醋嘅理由，佢中意邱旻顥係佢自己嘅事，但冇身份去呷醋⋯

唔係唔可以用朋友嘅身份呷醋，而係李逸彤冇辦法企喺朋友嘅角度呷醋，當對一個人嘅感覺已經超過咗朋友嘅程度時，就冇辦法再以朋友嘅身份去做任何事








IG Link: https://www.instagram.com/nd_cotttoncandy/?hl=zh-tw